“Экологик маданият — соғлом келажак асоси” лойиҳаси доирасида “Бадай тўқай” қўриқхонасига мароқли саёҳат уюштирилди

Табиатни муҳофаза қилиш, экологик вазиятни барқарор сақлаш, бу борадаги инқирозларнинг олдини олиш бугунги кунда дунё миқёсидаги улкан ижтимоий-иқтисодий ҳамда ҳуқуқий муаммога айланган. Мамлакатимизда ҳам экология билан боғлиқ муаммоларни тизимли равишда ҳал этиш, айниқса, бу борада ёшларнинг экологик саводхонлиги ва маданиятини ошириш, табиат, атроф-муҳитга муҳаббат билан қарашга ўргатиш мақсадида тарғибот-ташвиқот тадбирлари ўтказилиб, бу каби тадбирларга барча ёш тоифасидаги фуқаролар, айниқса, умумтаълим мактабларининг ўқувчи-ёшлари кенг қамраб олинмоқда.

Амударё туманида фаолият олиб борувчи “Жайхун илҳомлари” нодавлат нотижорат ташкилотининг Олий Мажлис ҳузуридаги жамоат фонди томонидан молиялаштирилган “Экологик маданият — соғлом келажак асоси” номли грант лойиҳаси доирасида амалга оширилаётган тарғибот-ташвиқот тадбирларида ҳам туман Мактабгача ва мактаб таълими бўлими тасарруфидаги умумтаълим мактаблари ҳамда “Баркамол авлод” болалар мактабида ташкил этилган “Ёш эколог” тўгараги аъзолари фаол иштирок этишмоқда. Мазкур тўгарак аъзолари лойиҳа координаторлари билан биргаликда ҳудудларни ободонлаштириш, “Яшил макон” умуммиллий ҳаракати доирасида “Оила боғи”ни яратиш каби тадбирларда фаоллик кўрсатишмоқда.

Жорий йилнинг 20 декабрь санасида “Экологик маданият — соғлом келажак асоси” лойиҳаси доирасида Амударё тумани Мактабгача ва мактаб таълими бўлими тасарруфидаги “Баркамол авлод” болалар мактабининг “Ёш эколог” тўгараги аъзолари иштирокида Беруний туманидаги “Бадай тўқай” қўриқхонасига уюштирилган саёҳат ҳам ўсиб келаётган ёш авлод онгида табиатга муҳаббат туйғусини мустаҳкамлашга қаратилгани билан муҳим аҳамиятга эга бўлди.

Саёҳат аввалида ўқувчи-ёшлар Амударё биосфера резервати таркибидаги “Бадай тўқай” қўриқхонаси фаолияти, мазкур қўриқхонанинг фауна ва флораси, табиий бойлиги ҳақида ҳикоя қилувчи “Бадай тўқай қўриқхонаси” музейи билан яқиндан танишдилар. Музей масъуллари томонидан тўқайзор ҳудудида ўсувчи дов-дарахтлар, ҳайвонот дунёси тўғрисида қизиқарли маълумотлар тақдим этилди. Шунингдек, ёш экологларга қўриқхона ҳудудига йилнинг тўрт фаслида учиб келувчи қушлар ва уларнинг турлари, Бухоро хонгули ва сайғоқларни кўпайтириш борасида амалга оширилаётган кенг кўламли ишлар бўйича батафсил маълумотлар тақдим этилиб, уларни қизиқтирган саволларга батафсил жавоблар ҳам берилди.

Шундан сўнг ёш экологлар “Баркамол авлод” болалар мактабининг туризм ва экология йўналиши бўйича услубчиси Холида Йўлдошбоева, “Ёш эколог” тўгараги раҳбари Матлуба Аллаберганова ҳамда лойиҳа координаторлари ҳамроҳлигида “Бадай тўқай” қўриқхонаси бўйлаб, табиат бағрига мароқли саёҳат ўтказилди. Саёҳат жараёнида ўқувчи-ёшлар қўриқхонанинг ноёб ўсимликлар дунёси, мусаффо, гўзал ва бетакрор табиатидан баҳра олдилар.

Ёшлар онгида она табиатга нисбатан меҳр-муҳаббат туйғуларини мустаҳкамлаш, уларни табиатни нафақат севишга, балки атрофимизни ўраб турган табиий яшил оламни асраб-авайлаш, бу бетакрор гўзалликни янада бойитиш борасида ўз шахсий ҳиссаларини қўшишга даъват этиш мақсадида ташкиллаштирилган мазкур саёҳат иштирокчиларда катта таассурот қолдирди.

Робия Йўлдошева