Ватанпарварлик ойлиги давом этмоқда
Мамлакатимизда ўсиб келаётган ёш авлодни ватанпарварлик руҳида тарбиялаш, уларни миллий-маънавий қадриятларга садоқатли, жасур инсонлар қилиб камолга етказиш бугунги куннинг устувор вазифаларидан бири ҳисобланади. Айниқса, она Ватанни шунчаки севиш эмас, киндик қони томган табаррук маконни фидойилик билан ҳимоя қилиш, шу муқаддас макон билан фахрланиш туйғуси билан яшашга ўргатиш, ана шундай садоқатли ёшлар ҳисобига миллий армиямиз таркибини мустаҳкамлашга қаратилган амалий чора-тадбирлар муҳим аҳамиятга эга.
Бу борада Давлат хавфсизлик хизмати Чегара қўшинлари ҳарбий хизматчилари ва ҳамкор ташкилотлар томонидан чегараолди ҳудудларда истиқомат қилувчи ёшлар ўртасида “Ватанпарварлик ойлиги” доирасида олиб борилаётган ватанпарварлик мавзусидаги тарғибот-ташвиқот тадбирлари ўзининг ижобий самарасини бермоқда ва кундан-кунга ушбу тадбирларда қатнашиш истагидаги ёшлар қамрови ортиб бормоқда.
Ўзбекистон Республикаси Президентининг 2025 йил 1 декабрдаги “Ўзбекистон Республикаси Қуролли Кучлари ташкил этилганлигининг 34 йиллиги ҳамда Ватан ҳимоячилари куни байрамига тайёргарлик кўриш ва уни юқори савияда ўтказиш дастурини ижро этиш тўғрисида”ги фармонига кўра, айни кунларда мамлакатимизнинг барча ҳудудларида “Ватанпарварлик ойлиги” муносабати билан ёшлар иштирокида маънавий-маърифий мавзулардаги учрашувлар, Қуролли Кучларимизнинг бугунги қудрати хусусидаги мулоқот тадбирлари ўтказилмоқда.
Ана шундай тадбирлардан бири яқинда Қорақалпоғистон Республикаси Давлат хавфсизлик хизмати Чегара қўшинлари ҳарбий қисми ҳарбий хизматчилари ва Амударё тумани мутасадди ташкилотлари масъуллари билан ҳамкорликда амалга оширилди. Туманнинг чегараолди ҳудудида жойлашган мактаб ўқувчилари иштирокида ўтказилган “Очиқ эшиклар куни” тадбирида юқори синфлар ўқувчилари, уларнинг чақирувга қадар бошланғич тайёргарлик фани ўқитувчилари иштирок этдилар.
Тадбирда мактаб ўқувчиларига Давлат хавфсизлик хизмати Чегара қўшинлари ҳарбий зобитлари томонидан Миллий Армиямизнинг бугунги қудрати, ҳарбийлар салоҳияти, Қуролли Кучларининг жанговарлик ҳолати тўғрисида қимматли маълумотлар тақдим этилди. Шунингдек, тадбир жараёнида замонавий ҳарбий техникалар ва қурол-аслаҳалар, хизмат ҳайвонларидан ҳарбий хизмат жараёнида фойдаланиш тўғрисида кўргазмали чиқишлар намойиш қилинди. Айниқса, ҳарбий хизмат жараёнида хизмат итларидан фойдаланиш борасидаги кўргазмали чиқиш ёшларда катта қизиқиш уйғотди. Унда хизмат итининг турли буйруқларни бенуқсон бажариши, шунингдек, шартли чегара бузувчини ушлаб беришдаги жасорати она Ватан ҳимоячиси бўлиш орзусидаги ёшларда унутилмас таассуротлар қолдирди.
“Очиқ эшиклар куни” тадбири давомида ҳарбий хизматчилар билан мактаб ўқувчилари иштирокида давра суҳбати ҳам ўтказилди. Давра суҳбати мактаб ўқувчилари учун қизиқарли таассуротларга бой бўлди. Унда ўқувчи-ёшлар ҳарбий хизмат йўналишлари, мамлакатимиздаги олий ҳамда ўрта махсус ҳарбий билим юртларидаги мутахассисликлар, мазкур билим юртларига қабул жараёнлари, Қуролли Кучлар сафида хизмат қилиш қонун-қоидалари бўйича ўзларини қизиқтирган саволлар билан мурожаат қилдилар ва барча саволларига ҳарбийлар томонидан батафсил жавоблар олдилар.
Шунингдек, тадбир давомида ёшлар ўртасида спортнинг арқон тортиш йўналиши бўйича куч синаш мусобақалари ҳамда мактаб ўқувчилари ва ҳарбий хизматчилари ўртасида “Заковат” интеллектуал ўйини ташкиллаштирилди. Арқон тортишиш мусобақалари ҳамда “Заковат” интеллектуал ўйинида фаоллик кўрсатган ғолиб жамоага диплом ва эсдалик совғалар топширилди.
“Ватанпарварлик ойлиги” доирасидаги бу каби тадбирлар Қорақалпоғистон Республикаси бўйлаб давом этмоқда.
Робия Йўлдошева
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
