“Экологик маданият — соғлом келажак асоси” лойиҳаси доирасида ижодкор ёшлар ўртасида иншолар ва расмлар танлови ўтказилди

Бутун дунёда иқлим ўзгариши билан боғлиқ муаммолар географияси тобора кенгайиб, экологик беқарорлик хавфи ортиб бормоқда. Бемаврид сув тошқинлари билан бир вақтда ер юзининг турли бурчакларини қамраб олаётган сувсизлик, қурғоқчилик оқибатида инсоният бошига ёғилаётган талофатлар табиат билан ўйлаб, оқилона муносабатда бўлишни тақозо этмоқда.

Ана шундай мураккаб шароитда экологик вазиятни яхшилаш, атроф-муҳитни муҳофаза қилиш орқали инсонлар учун соғлом ҳаво муҳитини яратиш барча давлатлар, шу жумладан, мамлакатимиз сиёсатининг устувор йўналишларидан бирига айланди. Айни пайтда бу долзарб муаммони ҳал қилиш борасидаги саъй-ҳаракатларда нафақат давлат бошқаруви органлари, балки нодавлат ташкилотлар ҳам фаол иштирок этишмоқда.

Амударё туманида фаолият олиб борувчи “Жайхун илҳомлари” нодавлат нотижорат ташкилотининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Экологик маданият — соғлом келажак асоси” грант лойиҳаси доирасида амалга оширилаётган тарғибот-ташвиқот тадбирлари ҳам аҳоли, айниқса, ёшларни экологик ва атроф-муҳитга, табиатга эҳтиёткорона муносабатда бўлишга, табиий ресурслардан тежаб-тергаб, оқилона фойдаланишга даъват этиш, уларнинг экологик билимларини оширишга қаратилгани билан муҳим аҳамият касб этмоқда.

Яқинда мазкур грант лойиҳаси иш режасига мувофиқ “Жайхун илҳомлари” нодавлат нотижорат ташкилоти ҳамда “Тараққиёт кўзгуси” газетаси таҳририяти ҳамкорлигида ташкил этилган “Яшил табиатни асраш — ўз қўлимизда” мавзусидаги иншолар танловида ҳам ўқувчи-ёшлар фаоллик билан иштирок этишиб, ўз ижодий ишлари орқали атроф-муҳит муҳофазасига, она табиатга, шу баробарида экологик муаммоларга бефарқ эмасликларини амалда намоён этдилар.

Танлов аввало умумтаълим мактабларида ўтказилиб, ўқувчилар томонидан ёзилган энг яхши иншолар она тили ва адабиёт ўқитувчиларининг хулосалари асосида танловнинг ҳакамлар ҳайъатига тавсия этилиб, ғолиблар шаффофлик асосида аниқланди ва “Жайхун илҳомлари” нодавлат нотижорат ташкилоти томонидан фахрий ёрлиқлар ва эсдалик совғалари билан тақдирландилар.

Жорий йилнинг 23 декабрь санасида эса 9-сонли Болалар мусиқа ва санъат мактаби биносида “Экологик маданият — соғлом келажак асоси” лойиҳаси доирасида “Жайхун илҳомлари” нодавлат нотижорат ташкилотига аъзо шоир ва ёзувчилар, журналистларнинг ёш ижодкорлар билан учрашуви ташкил этилиб, экология ва атроф-муҳит мусаффолиги, яшил масканларнинг аҳамияти, келажак авлодга мусаффо ҳаво ва тоза экологик муҳит қолдириш мавзусида расмлар танлови ташкил этилди.

Танлов аввалида тадбир иштирокчилари мазкур мактаб ўқувчи-ёшларининг ижодий ишлари кўргазмаси билан яқиндан танишдилар. Расмлар танловининг юқори савияда, шаффофлик асосида ўтказилишини таъминлаш мақсадида ёш рассомлар учун қулай ва зарур шарт-шароитлар яратилиб, жараён мактабнинг тасвирий санъат йўналиши бўйича малакали ўқитувчиси Муҳриддин Холиқов томонидан кузатиб борилди.

Танлов якунида ёш ижодкор-рассомларнинг экологик муаммоларни бартараф этиш, яшил ўрмонзорларни кўпайтириш, ҳайвонот дунёсини асраб-авайлаш борасидаги муносабатлари акс этган ижодий ишлари танлаб олиниб, ғолиблар танлов ташкилотчилари томонидан фахрий ёрлиқлар, эсдалик совғалари билан тақдирландилар.

Грант лойиҳаси доирасида умумтаълим мактаблари ўқувчи-ёшлари ўртасида ўтказилаётган экология мавзусига бағишланган бу каби иншолар танловлари, шунингдек, шоир ва ёзувчилар, журналистларнинг ёш ижодкорлар билан учрашувлари ўсиб келаётган ёш авлод қалбида табиатга меҳр-муҳаббат туйғуларини уйғотиб, уларнинг экологик саводхонлигини оширишга ҳисса қўшиши шубҳасиз.

Робия Йўлдошева