“Ekologik madaniyat — sogʻlom kelajak asosi” loyihasi doirasida ijodkor yoshlar oʻrtasida insholar va rasmlar tanlovi oʻtkazildi

Butun dunyoda iqlim oʻzgarishi bilan bogʻliq muammolar geografiyasi tobora kengayib, ekologik beqarorlik xavfi ortib bormoqda. Bemavrid suv toshqinlari bilan bir vaqtda yer yuzining turli burchaklarini qamrab olayotgan suvsizlik, qurgʻoqchilik oqibatida insoniyat boshiga yogʻilayotgan talofatlar tabiat bilan oʻylab, oqilona munosabatda boʻlishni taqozo etmoqda.

Ana shunday murakkab sharoitda ekologik vaziyatni yaxshilash, atrof-muhitni muhofaza qilish orqali insonlar uchun sogʻlom havo muhitini yaratish barcha davlatlar, shu jumladan, mamlakatimiz siyosatining ustuvor yoʻnalishlaridan biriga aylandi. Ayni paytda bu dolzarb muammoni hal qilish borasidagi saʼy-harakatlarda nafaqat davlat boshqaruvi organlari, balki nodavlat tashkilotlar ham faol ishtirok etishmoqda.

Amudaryo tumanida faoliyat olib boruvchi “Jayxun ilhomlari” nodavlat notijorat tashkilotining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Ekologik madaniyat — sogʻlom kelajak asosi” grant loyihasi doirasida amalga oshirilayotgan targʻibot-tashviqot tadbirlari ham aholi, ayniqsa, yoshlarni ekologik va atrof-muhitga, tabiatga ehtiyotkorona munosabatda boʻlishga, tabiiy resurslardan tejab-tergab, oqilona foydalanishga daʼvat etish, ularning ekologik bilimlarini oshirishga qaratilgani bilan muhim ahamiyat kasb etmoqda.

Yaqinda mazkur grant loyihasi ish rejasiga muvofiq “Jayxun ilhomlari” nodavlat notijorat tashkiloti hamda “Taraqqiyot koʻzgusi” gazetasi tahririyati hamkorligida tashkil etilgan “Yashil tabiatni asrash — oʻz qoʻlimizda” mavzusidagi insholar tanlovida ham oʻquvchi-yoshlar faollik bilan ishtirok etishib, oʻz ijodiy ishlari orqali atrof-muhit muhofazasiga, ona tabiatga, shu barobarida ekologik muammolarga befarq emasliklarini amalda namoyon etdilar.

Tanlov avvalo umumtaʼlim maktablarida oʻtkazilib, oʻquvchilar tomonidan yozilgan eng yaxshi insholar ona tili va adabiyot oʻqituvchilarining xulosalari asosida tanlovning hakamlar hayʼatiga tavsiya etilib, gʻoliblar shaffoflik asosida aniqlandi va “Jayxun ilhomlari” nodavlat notijorat tashkiloti tomonidan faxriy yorliqlar va esdalik sovgʻalari bilan taqdirlandilar.

Joriy yilning 23-dekabr sanasida esa 9-sonli Bolalar musiqa va sanʼat maktabi binosida “Ekologik madaniyat — sogʻlom kelajak asosi” loyihasi doirasida “Jayxun ilhomlari” nodavlat notijorat tashkilotiga aʼzo shoir va yozuvchilar, jurnalistlarning yosh ijodkorlar bilan uchrashuvi tashkil etilib, ekologiya va atrof-muhit musaffoligi, yashil maskanlarning ahamiyati, kelajak avlodga musaffo havo va toza ekologik muhit qoldirish mavzusida rasmlar tanlovi tashkil etildi.

Tanlov avvalida tadbir ishtirokchilari mazkur maktab oʻquvchi-yoshlarining ijodiy ishlari koʻrgazmasi bilan yaqindan tanishdilar. Rasmlar tanlovining yuqori saviyada, shaffoflik asosida oʻtkazilishini taʼminlash maqsadida yosh rassomlar uchun qulay va zarur shart-sharoitlar yaratilib, jarayon maktabning tasviriy sanʼat yoʻnalishi boʻyicha malakali oʻqituvchisi Muhriddin Xoliqov tomonidan kuzatib borildi.

Tanlov yakunida yosh ijodkor-rassomlarning ekologik muammolarni bartaraf etish, yashil oʻrmonzorlarni koʻpaytirish, hayvonot dunyosini asrab-avaylash borasidagi munosabatlari aks etgan ijodiy ishlari tanlab olinib, gʻoliblar tanlov tashkilotchilari tomonidan faxriy yorliqlar, esdalik sovgʻalari bilan taqdirlandilar.

Grant loyihasi doirasida umumtaʼlim maktablari oʻquvchi-yoshlari oʻrtasida oʻtkazilayotgan ekologiya mavzusiga bagʻishlangan bu kabi insholar tanlovlari, shuningdek, shoir va yozuvchilar, jurnalistlarning yosh ijodkorlar bilan uchrashuvlari oʻsib kelayotgan yosh avlod qalbida tabiatga mehr-muhabbat tuygʻularini uygʻotib, ularning ekologik savodxonligini oshirishga hissa qoʻshishi shubhasiz.

Robiya Yoʻldosheva