Дўрман овули - меҳнат, ҳамжиҳатлик ва тараққиёт маскани

Амударё туманининг Дўрман овули ҳудуднинг йирик қишлоқ хўжалиги маҳсулотлари етиштириладиган, аҳолиси меҳнатсеварлиги, ҳамжиҳатлиги ва тинч-осойишта ҳаёт тарзи билан ажралиб турадиган овулларидан биридир. Асрлар давомида шаклланган деҳқончилик ва чорвачилик анъаналари бугун замонавий ёндашувлар билан уйғунлашиб, овул тараққиётининг муҳим омилига айланмоқда.

Бугунги кунда Дўрман овулида “Маҳалла еттилиги” вакилларининг самарали ва тизимли фаолияти натижасида ҳудудда ижтимоий-иқтисодий ривожланиш изчил таъминланмоқда. Маҳалла фаоллари, масъул ташкилотлар ҳамкорлигида аҳоли муаммолари жойида ўрганилиб, уларни бартараф этиш бўйича амалий ишлар олиб борилмоқда.

Овулда ҳозирги кунда 514 та хонадонда 774 та оила таркибида жами 2677 нафар аҳоли ўзаро аҳил-иноқ яшаб келмоқда. Ҳудудда 2 та умумтаълим мактаби, 1 та мактабгача таълим муассасаси, 3 та озиқ-овқат дўкони, 1 та сартарошхона, 1 та ичимлик сувини тозалаш ва етказиб бериш шохобчаси фаолият юритиб, аҳолига доимий хизмат кўрсатмоқда.

Аҳолини иш билан таъминлаш, томорқа ерларидан самарали фойдаланиш, кичик бизнес ва хусусий тадбиркорликни ривожлантириш орқали аҳоли даромадларини ошириш масалалари устувор вазифа сифатида белгиланган.

Олиб борилган тизимли ва манзилли ишлар натижасида жорий йилнинг 12 ойи давомида овулда яшовчи 26 нафар ишсиз фуқарога жами 470 миллион сўм миқдорида имтиёзли кредитлар ажратилди. Натижада 86 нафар фуқаро ўзини ўзи банд қилган, 91 нафар фуқаро доимий иш ўрнига эга бўлган.

Миграциядан қайтиб келган 4 нафар фуқаронинг 2 нафарига кредит ажратилиб, уларнинг меҳнат фаолияти йўлга қўйилди. Шунингдек, йил бошидан буён 8 та янги тадбиркорлик субъекти фаолияти йўлга қўйилиб, ҳудуд иқтисодий салоҳияти янада мустаҳкамланди.

Дўрман овулида яратилаётган имкониятлардан унумли фойдаланиб, барқарор даромад олаётган аҳоли вакиллари сафи тобора кенгаймоқда. Жумладан, ҳудудда яшовчи Ислом Қурбанов кўп йиллардан буён чорвачилик билан шуғулланиб келади. Бугунги кунда 22 бош қорамол боқиб, қишлоқ хўжалиги тармоқларидан барқарор даромад топмоқда. Унинг келгусидаги режалари ҳам катта – фаолиятини кенгайтириб, йирик чорвачилик хўжалиги ташкил этиш ва янги иш ўринлари яратиш устувор мақсадларидан саналади.

Шунингдек, Хайтбой Жуманиёзов 10 йилдан буён асаларичилик билан шуғулланиб, бугунги кунда 100 та асалари қутисига эга. Оилавий меҳнат асосида олиб борилаётган бу фаолият натижасида оила фаровонлиги тобора ошиб бормоқда.

Овулда ёшларни ҳар томонлама қўллаб-қувватлаш борасидаги ишлар ҳам изчил давом этмоқда. 2025 йилнинг 9 ойи давомида 8 нафар ёш “Ёшлар дафтари”га киритилиб, уларга манзилли ёрдамлар кўрсатилди. Жумладан, 3 нафар ёшнинг тўлов-контракт суммаси тўлаб берилди, 2 нафар ёшга имтиёзли кредит ажратилди, 2 нафар ёш келажак касбларига ўқитилди, 1 нафар ёшга субсидия асосида чорва моллари учун тарози олиб берилди.

Хотин-қизлар бандлигини таъминлаш борасида ҳам эътиборга молик ишлар амалга оширилмоқда. Ҳудудда яшовчи Муқаддас Аҳмедова 5 йилдан буён тикувчилик билан шуғулланиб, 10 нафардан ортиқ шогирд тайёрлади. У ўз меҳнати билан нафақат оиласининг фаровонлигини таъминламоқда, балки кўплаб хотин-қизларнинг банд бўлишига муносиб ҳисса қўшиб келмоқда.

Ҳудудда оилавий тадбиркорлик ҳам ривожланиб бормоқда. “Хива чойхонаси” оилавий корхонасида нон ва нон маҳсулотлари ҳамда миллий таомлар тайёрланиб, бозорга чиқарилмоқда. Ушбу фаолият орқали оиланинг барча аъзолари иш билан банд бўлиб, барқарор даромад манбаига эга.

Бугун Дўрман овули – меҳнат, ташаббус ва ҳамжиҳатлик уйғунлашган, аҳолиси эртанги кунга ишонч билан қараётган ҳудуддир. Амалга оширилаётган ислоҳотлар, яратилаётган имкониятлар ва аҳоли фаоллиги туфайли овул ижтимоий-иқтисодий жиҳатдан янада равнақ топиб, фаровон ҳаёт сари дадил одимламоқда.

Чарос Арслонова, туман ҳокимлигининг Ахборот хизмати раҳбари.