Doʻrman ovuli - mehnat, hamjihatlik va taraqqiyot maskani

Amudaryo tumanining Doʻrman ovuli hududning yirik qishloq xoʻjaligi mahsulotlari yetishtiriladigan, aholisi mehnatsevarligi, hamjihatligi va tinch-osoyishta hayot tarzi bilan ajralib turadigan ovullaridan biridir. Asrlar davomida shakllangan dehqonchilik va chorvachilik anʼanalari bugun zamonaviy yondashuvlar bilan uygʻunlashib, ovul taraqqiyotining muhim omiliga aylanmoqda.

Bugungi kunda Doʻrman ovulida “Mahalla yettiligi” vakillarining samarali va tizimli faoliyati natijasida hududda ijtimoiy-iqtisodiy rivojlanish izchil taʼminlanmoqda. Mahalla faollari, masʼul tashkilotlar hamkorligida aholi muammolari joyida oʻrganilib, ularni bartaraf etish boʻyicha amaliy ishlar olib borilmoqda.

Ovulda hozirgi kunda 514 ta xonadonda 774 ta oila tarkibida jami 2677 nafar aholi oʻzaro ahil-inoq yashab kelmoqda. Hududda 2 ta umumtaʼlim maktabi, 1 ta maktabgacha taʼlim muassasasi, 3 ta oziq-ovqat doʻkoni, 1 ta sartaroshxona, 1 ta ichimlik suvini tozalash va yetkazib berish shoxobchasi faoliyat yuritib, aholiga doimiy xizmat koʻrsatmoqda.

Aholini ish bilan taʼminlash, tomorqa yerlaridan samarali foydalanish, kichik biznes va xususiy tadbirkorlikni rivojlantirish orqali aholi daromadlarini oshirish masalalari ustuvor vazifa sifatida belgilangan.

Olib borilgan tizimli va manzilli ishlar natijasida joriy yilning 12 oyi davomida ovulda yashovchi 26 nafar ishsiz fuqaroga jami 470 million soʻm miqdorida imtiyozli kreditlar ajratildi. Natijada 86 nafar fuqaro oʻzini oʻzi band qilgan, 91 nafar fuqaro doimiy ish oʻrniga ega boʻlgan.

Migratsiyadan qaytib kelgan 4 nafar fuqaroning 2 nafariga kredit ajratilib, ularning mehnat faoliyati yoʻlga qoʻyildi. Shuningdek, yil boshidan buyon 8 ta yangi tadbirkorlik subʼekti faoliyati yoʻlga qoʻyilib, hudud iqtisodiy salohiyati yanada mustahkamlandi.

Doʻrman ovulida yaratilayotgan imkoniyatlardan unumli foydalanib, barqaror daromad olayotgan aholi vakillari safi tobora kengaymoqda. Jumladan, hududda yashovchi Islom Qurbanov koʻp yillardan buyon chorvachilik bilan shugʻullanib keladi. Bugungi kunda 22 bosh qoramol boqib, qishloq xoʻjaligi tarmoqlaridan barqaror daromad topmoqda. Uning kelgusidagi rejalari ham katta – faoliyatini kengaytirib, yirik chorvachilik xoʻjaligi tashkil etish va yangi ish oʻrinlari yaratish ustuvor maqsadlaridan sanaladi.

Shuningdek, Xaytboy Jumaniyozov 10-yildan buyon asalarichilik bilan shugʻullanib, bugungi kunda 100 ta asalari qutisiga ega. Oilaviy mehnat asosida olib borilayotgan bu faoliyat natijasida oila farovonligi tobora oshib bormoqda.

Ovulda yoshlarni har tomonlama qoʻllab-quvvatlash borasidagi ishlar ham izchil davom etmoqda. 2025-yilning 9 oyi davomida 8 nafar yosh “Yoshlar daftari”ga kiritilib, ularga manzilli yordamlar koʻrsatildi. Jumladan, 3 nafar yoshning toʻlov-kontrakt summasi toʻlab berildi, 2 nafar yoshga imtiyozli kredit ajratildi, 2 nafar yosh kelajak kasblariga oʻqitildi, 1 nafar yoshga subsidiya asosida chorva mollari uchun tarozi olib berildi.

Xotin-qizlar bandligini taʼminlash borasida ham eʼtiborga molik ishlar amalga oshirilmoqda. Hududda yashovchi Muqaddas Ahmedova 5-yildan buyon tikuvchilik bilan shugʻullanib, 10 nafardan ortiq shogird tayyorladi. U oʻz mehnati bilan nafaqat oilasining farovonligini taʼminlamoqda, balki koʻplab xotin-qizlarning band boʻlishiga munosib hissa qoʻshib kelmoqda.

Hududda oilaviy tadbirkorlik ham rivojlanib bormoqda. “Xiva choyxonasi” oilaviy korxonasida non va non mahsulotlari hamda milliy taomlar tayyorlanib, bozorga chiqarilmoqda. Ushbu faoliyat orqali oilaning barcha aʼzolari ish bilan band boʻlib, barqaror daromad manbaiga ega.

Bugun Doʻrman ovuli – mehnat, tashabbus va hamjihatlik uygʻunlashgan, aholisi ertangi kunga ishonch bilan qarayotgan hududdir. Amalga oshirilayotgan islohotlar, yaratilayotgan imkoniyatlar va aholi faolligi tufayli ovul ijtimoiy-iqtisodiy jihatdan yanada ravnaq topib, farovon hayot sari dadil odimlamoqda.

Charos Arslonova, tuman hokimligining Axborot xizmati rahbari.