АҲОЛИ САЛОМАТЛИГИ — БОШ МЕЗОН
Жамият саломатлигини муҳофаза қилиш, аҳолига етказиб берилаётган истеъмол маҳсулотларининг хавфсизлигини таъминлаш ва юқумли касалликларнинг олдини олиш ҳар қандай давлатнинг ижтимоий сиёсатида муҳим ўрин тутади. Бу борада Амударё тумани Санитария-эпидемиологик осойишталик ва жамоат саломатлиги бўлими қошидаги лаборатория мажмуаси туман аҳолиси учун ўзига хос “саломатлик қалқони” вазифасини ўтамоқда.
Бугунги кунда озиқ-овқат хавфсизлиги ва экологик омиллар инсон саломатлигига таъсир этувчи асосий кучга айланган бир пайтда, лаборатория текширувларининг аҳамияти ҳар қачонгидан ҳам ортган. Амударё тумани Санитария-эпидемиологик осойишталик ва жамоат саломатлиги бўлими ходимлари айнан шу масъулиятни ҳис қилган ҳолда, тун-у кун аҳоли хизматида фаолият юритмоқда.
Мазкур лабораториянинг бош мақсади — туман ҳудудида санитария-эпидемиологик барқарорликни сақлашдир. Бунинг учун муассаса олдига бир қатор вазифалар қўйилган. Жумладан, бозорлар, савдо шахобчалари ва умумий овқатланиш корхоналарида сотилаётган маҳсулотларнинг кимёвий ва биологик таркибини текшириш, уларнинг истеъмолга яроқлилигини аниқлаш, аҳоли орасида юқумли ва паразитар касалликларни эрта аниқлаш, ўчоқларни бартараф этиш учун бактериологик ҳамда вирусологик таҳлилларни ўтказиш шулар жумласидандир. Қолаверса, аҳоли истеъмол қиладиган ичимлик суви, очиқ сув ҳавзалари ва тупроқ таркибидаги зарарли моддаларни аниқлаш, жамоат жойларида аҳолидан намуналар олиб, турли юқумли ва мавсумий касалликлар тарқалишининг олдини олиш ҳам лаборатория ходимларининг вазифалари қаторига киради.
Лаборатория фаолиятининг асосий қисмини озиқ-овқат маҳсулотлари сифати ва таркибини текшириш фаолияти ташкил этади. Туман ҳудудидаги деҳқон бозорлари, супермаркетлар ва маҳалла дўконларидан намуналар олинади. Хусусан, қишлоқ хўжалиги маҳсулотлари — полиз экинлари, мева ва сабзавотлар таркибидаги нитрат миқдори мавсумий равишда текшириб борилади. Гўшт ва сут маҳсулотларининг бактериологик тозалиги ва таркиби чуқур таҳлил қилинади. Агар бирор маҳсулотда меъёрдан ортиқ кимёвий моддалар ёки касаллик қўзғатувчи бактериялар аниқланса, у зудлик билан савдодан олиб ташланади ва йўқ қилинади. Бу эса аҳоли ўртасида оммавий заҳарланишларнинг олдини олишда ҳал қилувчи омилдир.
Лабораториянинг яна бир муҳим йўналиши — клиник-бактериологик тадқиқотлардир. Аҳолидан, шунингдек, мактабгача таълим ташкилотлари ва мактаблар ходимларидан профилактик мақсадларда олинган намуналар турли юқумли касалликларга қарши текширилади.
Бу жараёнда мутахассислар замонавий микроскоплар ва анализаторлар ёрдамида инсон организмидаги гижжа тухумлари, дизентерия, тиф ва бошқа хавфли инфекция қўзғатувчиларини аниқлайдилар. Ташхиснинг аниқ ва тезкор қўйилиши шифокорларга беморни тўғри даволаш, эпидемиологларга эса касаллик тарқалишининг олдини олиш имконини беради.
Амударё тумани Санитария-эпидемиологик осойишталик ва жамоат саломатлиги бўлими лабораторияси замонавий тиббий асбоб-ускуналар, реактивлар ва ўлчов воситалари билан жиҳозланган. Иш услуби давлат стандартлари ҳамда санитария қоидалари ва меъёрларига қатъий риоя қилган ҳолда ташкил этилган.
Намуна олишдан то якуний хулоса беришгача бўлган жараён юқори малакали врач-лаборантлар ва ўрта тиббий ходимлар томонидан амалга оширилади. Ҳар бир таҳлил натижаси махсус қайд дафтарларига киритилиб, электрон базага жойлаштирилади. Лаборатория ходимларининг кўзга кўринмас, аммо масъулиятли меҳнати туманимиз аҳолисининг саломатлигини асраш, дастурхонларимиз тўкин ва хавфсиз бўлишини таъминлашга хизмат қилмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
