AHOLI SALOMATLIGI — BOSh MEZON
Jamiyat salomatligini muhofaza qilish, aholiga yetkazib berilayotgan isteʼmol mahsulotlarining xavfsizligini taʼminlash va yuqumli kasalliklarning oldini olish har qanday davlatning ijtimoiy siyosatida muhim oʻrin tutadi. Bu borada Amudaryo tumani Sanitariya-epidemiologik osoyishtalik va jamoat salomatligi boʻlimi qoshidagi laboratoriya majmuasi tuman aholisi uchun oʻziga xos “salomatlik qalqoni” vazifasini oʻtamoqda.
Bugungi kunda oziq-ovqat xavfsizligi va ekologik omillar inson salomatligiga taʼsir etuvchi asosiy kuchga aylangan bir paytda, laboratoriya tekshiruvlarining ahamiyati har qachongidan ham ortgan. Amudaryo tumani Sanitariya-epidemiologik osoyishtalik va jamoat salomatligi boʻlimi xodimlari aynan shu masʼuliyatni his qilgan holda, tun-u kun aholi xizmatida faoliyat yuritmoqda.
Mazkur laboratoriyaning bosh maqsadi — tuman hududida sanitariya-epidemiologik barqarorlikni saqlashdir. Buning uchun muassasa oldiga bir qator vazifalar qoʻyilgan. Jumladan, bozorlar, savdo shaxobchalari va umumiy ovqatlanish korxonalarida sotilayotgan mahsulotlarning kimyoviy va biologik tarkibini tekshirish, ularning isteʼmolga yaroqliligini aniqlash, aholi orasida yuqumli va parazitar kasalliklarni erta aniqlash, oʻchoqlarni bartaraf etish uchun bakteriologik hamda virusologik tahlillarni oʻtkazish shular jumlasidandir. Qolaversa, aholi isteʼmol qiladigan ichimlik suvi, ochiq suv havzalari va tuproq tarkibidagi zararli moddalarni aniqlash, jamoat joylarida aholidan namunalar olib, turli yuqumli va mavsumiy kasalliklar tarqalishining oldini olish ham laboratoriya xodimlarining vazifalari qatoriga kiradi.
Laboratoriya faoliyatining asosiy qismini oziq-ovqat mahsulotlari sifati va tarkibini tekshirish faoliyati tashkil etadi. Tuman hududidagi dehqon bozorlari, supermarketlar va mahalla doʻkonlaridan namunalar olinadi. Xususan, qishloq xoʻjaligi mahsulotlari — poliz ekinlari, meva va sabzavotlar tarkibidagi nitrat miqdori mavsumiy ravishda tekshirib boriladi. Goʻsht va sut mahsulotlarining bakteriologik tozaligi va tarkibi chuqur tahlil qilinadi. Agar biror mahsulotda meʼyordan ortiq kimyoviy moddalar yoki kasallik qoʻzgʻatuvchi bakteriyalar aniqlansa, u zudlik bilan savdodan olib tashlanadi va yoʻq qilinadi. Bu esa aholi oʻrtasida ommaviy zaharlanishlarning oldini olishda hal qiluvchi omildir.
Laboratoriyaning yana bir muhim yoʻnalishi — klinik-bakteriologik tadqiqotlardir. Aholidan, shuningdek, maktabgacha taʼlim tashkilotlari va maktablar xodimlaridan profilaktik maqsadlarda olingan namunalar turli yuqumli kasalliklarga qarshi tekshiriladi.
Bu jarayonda mutaxassislar zamonaviy mikroskoplar va analizatorlar yordamida inson organizmidagi gijja tuxumlari, dizenteriya, tif va boshqa xavfli infektsiya qoʻzgʻatuvchilarini aniqlaydilar. Tashxisning aniq va tezkor qoʻyilishi shifokorlarga bemorni toʻgʻri davolash, epidemiologlarga esa kasallik tarqalishining oldini olish imkonini beradi.
Amudaryo tumani Sanitariya-epidemiologik osoyishtalik va jamoat salomatligi boʻlimi laboratoriyasi zamonaviy tibbiy asbob-uskunalar, reaktivlar va oʻlchov vositalari bilan jihozlangan. Ish uslubi davlat standartlari hamda sanitariya qoidalari va meʼyorlariga qatʼiy rioya qilgan holda tashkil etilgan.
Namuna olishdan to yakuniy xulosa berishgacha boʻlgan jarayon yuqori malakali vrach-laborantlar va oʻrta tibbiy xodimlar tomonidan amalga oshiriladi. Har bir tahlil natijasi maxsus qayd daftarlariga kiritilib, elektron bazaga joylashtiriladi. Laboratoriya xodimlarining koʻzga koʻrinmas, ammo masʼuliyatli mehnati tumanimiz aholisining salomatligini asrash, dasturxonlarimiz toʻkin va xavfsiz boʻlishini taʼminlashga xizmat qilmoqda.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
