МАҲАЛЛАДА ХАВФСИЗ МУҲИТ: ТУМАН ИИБ ХОДИМЛАРИ ОЛДИГА ЯНГИ ВАЗИФАЛАР ҚЎЙИЛДИ
Мамлакатимизда “Хавфсиз маҳалла” тамойили асосида амалга оширилаётган ислоҳотлар жиноятчиликни жиловлаш ва ҳуқуқбузарликларнинг барвақт олдини олишда ўзининг юксак самарасини бермоқда. Жорий йилнинг илк кунларида қабул қилинган Президент қарорлари эса соҳа ходимлари зиммасига янги ва масъулиятли вазифаларни юклади. Шу муносабат билан, 2026 йил 10 январь куни Амударё тумани Ички ишлар бўлимида шахсий таркиб учун муҳим ўқув-амалий семинари ташкил этилди.
Тадбирда Қорақалпоғистон Республикаси Ички ишлар вазирлигидан ташриф буюрган ишчи гуруҳ аъзолари — подполковник Жақсибай Патуллаев ва капитан Бекмурза Абдурашидов, шунингдек, Амударё тумани Ички ишлар бўлими бошлиғи ўринбосарлари — подполковник Шарапат Жолдасбаев ва Умид Уразалиев иштирок этдилар.
Семинарнинг асосий мавзуси Ўзбекистон Республикаси Президентининг 2025 йил 3 январдаги “2025 йилда республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги ҳамда 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги қарорларининг мазмун-моҳиятини ўрганишга қаратилди.
Маърузачилар таъкидлаганидек, 2025 йил 3 январдаги қарор асосида ўтган йил давомида кенг кўламли ишлар амалга оширилди. Натижада маҳаллаларда жиноятчиликни қарийб 1,5 бараварга қисқартиришга эришилди. Бу рақамлар тизимнинг тўғри йўлга қўйилганидан далолат беради.
Янги қабул қилинган қарор ўтган йилги ислоҳотларнинг мантиқий давоми ҳисобланади. Эндиликда асосий эътибор Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилади. Бу — ҳар бир маҳалланинг ўзига хос хусусиятидан келиб чиқиб, "қизил", "сариқ" ва "яшил" тоифаларга ажратган ҳолда, жиноятчилик омилларини бартараф этиш демакдир.
Ўқув семинарида ички ишлар органлари ходимларига ушбу қарорлар талабларидан келиб чиқадиган аниқ вазифалар тушунтирилди. Хусусан, фуқароларнинг ҳуқуқ ва эркинликларини ишончли ҳимоя қилиш, низоли оилалар ва ҳуқуқбузарлик содир этишга мойил шахслар билан индивидуал ишлаш, жамоат тартибини сақлашда замонавий технологиялардан ва жамоатчилик ёрдамидан самарали фойдаланиш масалаларига урғу берилди.
Тадбир фақат маъруза шаклида эмас, балки қизғин савол-жавоб тарзида ўтди. Ички ишлар бўлими ходимлари хизмат фаолияти давомида дуч келаётган муаммоли вазиятлар юзасидан Республика Ички ишлар вазирлиги вакилларига саволлар билан мурожаат қилдилар. Мутахассислар томонидан ҳар бир саволга атрофлича жавоб берилиб, келгусида юзага келиши мумкин бўлган ностандарт вазиятларда қандай ҳаракатланиш бўйича аниқ услубий кўрсатмалар берилди.
Хулоса ўрнида айтиш мумкинки, Амударё тумани ИИБда ўтказилган ушбу семинар ходимларнинг касбий малакасини ошириш, янги қонунчилик ҳужжатларини амалиётга тўғри татбиқ этиш ва пировардида туман аҳолисининг тинчлигини таъминлашда муҳим қадам бўлди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
