НУКУСДА АФҒОН УРУШИ ФАХРИЙЛАРИНИНГ АНЪАНАВИЙ УЧРАШУВИ БЎЛИБ ЎТДИ

Тарих саҳифаларида муҳрланиб қолган қонли воқеалар, айниқса, инсон тақдири билан боғлиқ фожиали уруш хотиралари ҳеч қачон унутилмайди. 1979–1989 йилларда Афғонистон заминида кечган аёвсиз жанглар тугаб, собиқ иттифоқ қўшинлари Афғон заминидан олиб чиқилганига 37 йил тўлган бўлсада, ўша оғир кунларнинг изтиробли хотираси ҳалигача уруш иштирокчиларининг ёдидан ўчмаган.

14 январь – Ватан ҳимоячилари куни ҳамда Афғонистондан собиқ иттифоқ қўшинлари олиб чиқилганининг 37 йиллиги муносабати билан Нукус шаҳрида ташкил этилган анъанавий учрашув уруш оловидан омон чиққан қуролдошларни яна бир бор бир файзли дастурхон атрофида жамлади. Сўнгги икки йилдан буён анъанага айланган мазкур тадбир Ўзбекистон “VETERAN” жангчи-фахрийлар ва ногиронлар бирлашмасининг Қорақалпоғистон бўлими ташаббуси билан анча кенг миқёсда ўтказилмоқда. Учрашувга Қорақалпоғистон Республикасининг барча шаҳар ва туманларидан Афғон урушида иштирок этган собиқ байналмилалчи жангчилар таклиф этилди.

Тадбир дастлаб Нукус шаҳридаги “Мотамсаро она” ҳайкали зиёрати билан бошланди. Ўзбекистон “VETERAN” жангчи-фахрийлар ва ногиронлар бирлашмасининг Қорақалпоғистон бўлими бошлиғи Юсупбек Алланбеков бошчилигида фахрийлар ҳайкал пойига гулчамбарлар қўйиб, жанг майдонларидан қайтмаган сафдошлари хотирасига чуқур эҳтиром изҳор этдилар.

Хотира майдонида намойиш этилган ҳарбий техникалар — танклар ва жанговар машиналарни томоша қилиш жараёни фахрийларда ўтмишнинг оғир, аммо мардликка тўла манзараларини қайта жонлантирди. Бу техникалар уларга ўқлар ёмғири остида ўтган йилларни, ёнма-ён туриб жанг қилган ва ҳалок бўлган дўстларини яна бир бор эслатди.

Собиқ иттифоқ раҳбариятининг нотўғри сиёсати оқибатида минглаб йигитлар Афғонистон тупроғида мақсадсиз уруш гирдобига тортилган. 1979–1989 йиллар давомида Қорақалпоғистон Республикасидан 3600 нафардан ортиқ йигит Афғон урушида иштирок этган. Улардан 89 нафари жанг майдонларида ҳалок бўлган, юзлаб ҳамюртларимиз эса оғир жисмоний ва руҳий жароҳатлар билан Ватанга қайтган.

Афсуски, уруш асоратлари йиллар ўтиб ҳам ўз таъсирини кўрсатди. Ўтган 30–40 йил давомида кўплаб фахрийлар урушда орттирилган касаллик ва жароҳатлар сабабли ҳаётдан бевақт кўз юмдилар. Бугунги кунда Қорақалпоғистонда 2100 нафардан зиёд собиқ байналмилалчи жангчилар тинч ва осойишта ҳаёт кечириб, жамият тараққиётига муносиб ҳисса қўшиб келмоқда.

Тадбирнинг асосий қисми Нукус шаҳридаги “Қирқ қиз” ресторанида давом этди. Миллий урф-одатларга мувофиқ, дастурхон бошида аввало Ватан йўлида ҳалок бўлган мард ўғлонларнинг руҳига Қуръон тиловат қилиниб, улар ҳақига дуолар ўқилди.

Учрашув давомида айни пайтда хорижда яшаётган ва муборак Умра зиёратини адо этаётган собиқ жангчилар видеоалоқа орқали тадбир иштирокчиларига мурожаат қилиб, қуролдошларини байрам билан табрикладилар. Бу ҳолат масофалар қанчалик узоқ бўлмасин, жанг майдонларида тобланган дўстлик ришталари ҳеч қачон узилмаслигини яна бир бор тасдиқлади.

Шунингдек, тадбир давомида “VETERAN” бирлашмасининг Қорақалпоғистон бўлими ҳамда унинг жойлардаги тузилмаларида фаолият юритаётган бир қатор ходимларга “Фахрий ёрлиқ”лар топширилди. Афғон урушида иштирок этган 135 нафар фахрийга эса эсдалик совғалари улашилди.

Нукус шаҳрида бўлиб ўтган мазкур учрашув нафақат хотира тадбири, балки тинчликнинг қадрини англаш, бугунги осуда кунларга шукроналик келтириш ҳамда ёш авлодни ватанпарварлик руҳида тарбиялашга хизмат қилувчи маънавий тадбир бўлди.