Хавфсиз маҳалла – осойишта ҳаёт таянчи: Амударёда замонавий қўриқлаш тизимлари қандай ишламоқда?
Мамлакатимизда “Хавфсиз маҳалла” тамойилини ҳаётга татбиқ этиш, фуқароларнинг тинч ва осойишта ҳаёт кечиришини таъминлаш, ҳуқуқбузарликларнинг барвақт олдини олиш ҳамда жамоат тартибини мустаҳкамлаш давлат сиёсатининг устувор йўналишларидан бири ҳисобланади. Бу жараёнда замонавий ахборот технологиялари, интеллектуал қўриқлаш тизимлари ва тезкор назорат механизмларининг ўрни тобора ортиб бормоқда. Айниқса, Ўзбекистон Республикаси Президентининг 2025 йил 3 январдаги “Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги қарори соҳага янги мазмун ва амалиёт олиб кирди.
Мазкур қарорда белгиланган вазифалар ижросини таъминлаш мақсадида Амударё тумани Ички ишлар бўлими ҳузуридаги Қўриқлаш хизмати томонидан кенг кўламли чора-тадбирлар амалга оширилмоқда. Хусусан, маҳаллаларда жиноятчиликка қарши самарали профилактика ишларини йўлга қўйиш, аҳоли мол-мулкини ишончли ҳимоя қилиш ва хавфсиз муҳитни яратиш борасида салмоқли натижаларга эришилмоқда.
2025 йил давомида туман ҳудудида жойлашган 320 та фуқаро хонадонлари ҳамда 252 та давлат ва тадбиркорлик субъектларига тегишли объектлар замонавий қўриқлаш пультлари, ёнғиндан огоҳлантириш сигнализация воситалари ва махсус “ташвиш” тугмалари билан жиҳозланиб, Қўриқлаш хизмати тизимига уланди. Мазкур техник воситалар орқали объектлардаги вазият доимий равишда масофадан назорат қилиниб, ҳар қандай шубҳали ҳолат ёки хавф юзага келганда тезкор чора кўриш имконияти яратилди.
Аҳоли зич жойлашган кўп қаватли уйларда хавфсизликни таъминлаш масаласи ҳам эътибор марказида бўлди. Жумладан, тумандаги 36 та кўп қаватли уйнинг кириш йўлакларига замонавий қўриқлаш тизимлари, видеокузатув ускуналари ва “ташвиш” тугмалари ўрнатилди. Бу орқали ушбу уйларда истиқомат қилаётган 730 та хонадон эгаларининг хавфсизлиги, мулкининг дахлсизлиги ва умумий осойишталиги таъминланди. Бундай тизимлар нафақат жиноятларнинг олдини олиш, балки фуқароларда хавфсиз ҳаётга бўлган ишончни мустаҳкамлашга ҳам хизмат қилмоқда.
Шунингдек, одамлар гавжум бўладиган жамоат жойлари, савдо мажмуалари ва бозорларда тезкорликни таъминлаш алоҳида аҳамият касб этмоқда. Хусусан, Манғит шаҳрининг Навоий маҳалласи ҳудудидаги Манғит деҳқон бозорига 6 та, Беруний маҳалласида жойлашган “Манғит савдо комплекси”га 5 та ҳамда ушбу савдо мажмуасининг Навоий маҳалласи ҳудудидаги филиалига 2 та “ташвиш” тугмалари ўрнатилди. Мазкур тизимлар орқали фавқулодда ҳолатларда Қўриқлаш хизмати ходимлари қисқа вақт ичида воқеа жойига етиб келиб, зарур чораларни кўриш имкониятига эга бўлмоқда.
Бугунги кунда Амударё тумани Ички ишлар бўлими ҳузуридаги Қўриқлаш хизматининг 1 ва 2-сонли Техник қўриқлаш марказлари томонидан жами 550 та давлат ва турли йўналишдаги тадбиркорлик объектлари, 371 та якка тартибдаги фуқаро хонадонлари ҳамда кўп қаватли уйлардаги юзлаб хонадонлар туну кун узлуксиз назорат остида қўриқланмоқда. Бу эса туман ҳудудида жиноятчилик даражасини камайтириш, ҳуқуқбузарликларнинг олдини олиш ва аҳолининг осойишта ҳаёт кечиришини таъминлашда муҳим омил бўлиб хизмат қилмоқда.
Соҳадаги ислоҳотлар изчил давом эттирилмоқда. Давлатимиз раҳбарининг 2026 йил 5 январдаги “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги қарори ижросини таъминлаш мақсадида айни кунларда Қўриқлаш хизмати ходимлари томонидан маҳаллаларда хатлов ишлари олиб борилмоқда. Ушбу жараёнда аҳоли билан яқин мулоқот ўрнатилиб, замонавий қўриқлаш хизматларининг афзалликлари, хавфсизликни таъминлашда фуқароларнинг фаол иштирокининг аҳамияти кенг тушунтирилмоқда. Зеро, ҳар бир хонадон, ҳар бир маҳалла ва бутун жамият хавфсизлиги ҳар бир фуқаронинг масъулиятига боғлиқ. Ўз уйимиз, маҳалламиз ва юртимиз тинчлигини асраш — барчамизнинг муқаддас бурчимиздир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
