Хорижда қонуний ишлаш истагидаги фуқаролар учун меҳнат ярмаркаси ўтказилди

Бугунги кунда мамлакатимизда аҳоли бандлигини таъминлаш, фуқароларнинг барқарор даромад манбаларини яратиш ва меҳнат миграцияси жараёнларини тизимли тарзда тартибга солиш борасида қатор амалий ишлар қилинмоқда. Айниқса, хорижда меҳнат қилиш истагида бўлган юртдошларимизнинг ҳуқуқ ва манфаатларини ҳимоя қилиш, уларнинг хавфсизлигини таъминлаш, қонуний меҳнат фаолиятини ташкиллаштириш ҳамда ноқонуний миграциянинг олдини олиш борасида кенг кўламли ислоҳотлар амалга оширилмоқда.

Шу мақсадда аҳолини касб-ҳунарга ўқитиш, хорижий тилларни ўргатиш, иш берувчи давлатлар билан тузилаётган икки томонлама келишувлар асосида фуқароларни ривожланган мамлакатларга ташкиллаштирилган тартибда юбориш тизими босқичма-босқич такомиллаштирилмоқда. Ана шундай амалий ташаббуслардан бири сифатида Амударё тумани Маданият бўлими биносида “Хорижда иш” деб номланган махсус меҳнат ярмаркаси ташкил этилди.

Мазкур тадбир Қорақалпоғистон Республикаси Жўқорғи Кенгеси, Ўзбекистон Республикаси Вазирлар Маҳкамаси ҳузуридаги Миграция агентлиги, Қорақалпоғистон Республикаси Камбағалликни қисқартириш ва бандлик вазирлиги, шунингдек, қатор хусусий бандлик агентликлари ҳамкорлигида юқори савияда ўтказилди. Ярмаркада туманнинг турли маҳаллаларидан келган юзлаб фуқаролар иштирок этди.

Тадбирнинг асосий мақсади — аҳолига хорижий давлатларда мавжуд бўш иш ўринлари ҳақида ишончли ва ҳаққоний маълумот бериш, фуқароларни алдов ва ноқонуний йўллардан асраш, уларга қонуний, хавфсиз ҳамда муносиб даромад келтирадиган меҳнат фаолиятини таклиф этишдан иборат бўлди. Шу билан бирга, меҳнат миграцияси билан боғлиқ ҳуқуқий тартиб-қоидаларни тушунтириш орқали аҳолининг ҳуқуқий саводхонлигини оширишга алоҳида эътибор қаратилди.

Ярмарканинг очилиш маросимида сўзга чиққан Амударё тумани ҳокими Собир Хўжаметов давлатимиз раҳбари ташаббуси билан меҳнат миграцияси соҳасида яратилаётган янги имкониятлар, фуқароларни ижтимоий ва ҳуқуқий жиҳатдан ҳимоя қилишга қаратилган чора-тадбирлар ҳақида атрофлича тўхталиб ўтди. У ўз нутқида хорижда қонуний ишлаш фуқароларнинг нафақат даромадини ошириш, балки уларнинг меҳнат ҳуқуқлари кафолатланиши, тиббий суғурта ва ижтимоий ҳимоя билан таъминланишида муҳим аҳамият касб этишини таъкидлади.

Ярмарка давомида иштирокчиларга Европа ва Осиёнинг етакчи давлатларидаги саноат, қишлоқ хўжалиги, хизмат кўрсатиш, қурилиш ва логистика соҳаларида мавжуд юқори даромадли бўш иш ўринлари тақдим этилди. Иш берувчилар ҳамда масъул агентлик вакиллари ҳар бир йўналиш бўйича меҳнат шароитлари, ойлик маош миқдори, иш вақти, яшаш жойи билан таъминланиш, тиббий хизмат ва бошқа ижтимоий кафолатлар ҳақида батафсил маълумот бердилар.

Шунингдек, фуқароларга меҳнат шартномаларини тузиш тартиби, виза расмийлаштириш жараёнлари, зарур ҳужжатлар рўйхати ҳамда хорижда меҳнат қилишда юзага келиши мумкин бўлган ҳуқуқий масалалар бўйича тушунтиришлар берилди. Мутахассислар томонидан ноқонуний миграциянинг салбий оқибатлари ҳақида ҳам алоҳида тўхталиб ўтилди.

Эътиборли жиҳати шундаки, тадбир доирасида фақат хорижда ишлаш истагидаги фуқаролар эмас, балки маҳаллий меҳнат бозорида иш топишни хоҳловчилар учун ҳам имкониятлар яратилди. Қорақалпоғистон Республикаси ҳудудидаги корхона ва ташкилотларда мавжуд бўш иш ўринлари тақдим этилиб, маҳаллий аҳоли учун кенг танлов имконияти яратилди.

Меҳнат ярмаркаси қизғин мулоқот ва савол-жавобтларга бой руҳда ўтди. Иштирокчилар хорижий тилларни ўрганиш марказлари, касбга қайта тайёрлаш курслари ҳамда янги муҳитга мослашув бўйича зарур маълумотларга эга бўлдилар.

Амударё туманида ташкил этилган мазкур “Хорижда иш” меҳнат ярмаркаси аҳоли бандлигини таъминлаш, хавфсиз ва тартибли меҳнат миграциясини ривожлантириш ҳамда фуқаролар турмуш даражасини ошириш йўлидаги муҳим амалий қадамлардан бири бўлди. Бу каби тадбирлар юртдошларимизнинг дунё меҳнат бозорида ўз ўрнини топишига, алданиб қолиш ҳолатларининг олдини олишга ва жамият фаровонлигини юксалтиришга хизмат қилади.