Xorijda qonuniy ishlash istagidagi fuqarolar uchun mehnat yarmarkasi oʻtkazildi

Bugungi kunda mamlakatimizda aholi bandligini taʼminlash, fuqarolarning barqaror daromad manbalarini yaratish va mehnat migratsiyasi jarayonlarini tizimli tarzda tartibga solish borasida qator amaliy ishlar qilinmoqda. Ayniqsa, xorijda mehnat qilish istagida boʻlgan yurtdoshlarimizning huquq va manfaatlarini himoya qilish, ularning xavfsizligini taʼminlash, qonuniy mehnat faoliyatini tashkillashtirish hamda noqonuniy migratsiyaning oldini olish borasida keng koʻlamli islohotlar amalga oshirilmoqda.

Shu maqsadda aholini kasb-hunarga oʻqitish, xorijiy tillarni oʻrgatish, ish beruvchi davlatlar bilan tuzilayotgan ikki tomonlama kelishuvlar asosida fuqarolarni rivojlangan mamlakatlarga tashkillashtirilgan tartibda yuborish tizimi bosqichma-bosqich takomillashtirilmoqda. Ana shunday amaliy tashabbuslardan biri sifatida Amudaryo tumani Madaniyat boʻlimi binosida “Xorijda ish” deb nomlangan maxsus mehnat yarmarkasi tashkil etildi.

Mazkur tadbir Qoraqalpogʻiston Respublikasi Joʻqorgʻi Kengesi, Oʻzbekiston Respublikasi Vazirlar Mahkamasi huzuridagi Migratsiya agentligi, Qoraqalpogʻiston Respublikasi Kambagʻallikni qisqartirish va bandlik vazirligi, shuningdek, qator xususiy bandlik agentliklari hamkorligida yuqori saviyada oʻtkazildi. Yarmarkada tumanning turli mahallalaridan kelgan yuzlab fuqarolar ishtirok etdi.

Tadbirning asosiy maqsadi — aholiga xorijiy davlatlarda mavjud boʻsh ish oʻrinlari haqida ishonchli va haqqoniy maʼlumot berish, fuqarolarni aldov va noqonuniy yoʻllardan asrash, ularga qonuniy, xavfsiz hamda munosib daromad keltiradigan mehnat faoliyatini taklif etishdan iborat boʻldi. Shu bilan birga, mehnat migratsiyasi bilan bogʻliq huquqiy tartib-qoidalarni tushuntirish orqali aholining huquqiy savodxonligini oshirishga alohida eʼtibor qaratildi.

Yarmarkaning ochilish marosimida soʻzga chiqqan Amudaryo tumani hokimi Sobir Xoʻjametov davlatimiz rahbari tashabbusi bilan mehnat migratsiyasi sohasida yaratilayotgan yangi imkoniyatlar, fuqarolarni ijtimoiy va huquqiy jihatdan himoya qilishga qaratilgan chora-tadbirlar haqida atroflicha toʻxtalib oʻtdi. U oʻz nutqida xorijda qonuniy ishlash fuqarolarning nafaqat daromadini oshirish, balki ularning mehnat huquqlari kafolatlanishi, tibbiy sugʻurta va ijtimoiy himoya bilan taʼminlanishida muhim ahamiyat kasb etishini taʼkidladi.

Yarmarka davomida ishtirokchilarga Yevropa va Osiyoning yetakchi davlatlaridagi sanoat, qishloq xoʻjaligi, xizmat koʻrsatish, qurilish va logistika sohalarida mavjud yuqori daromadli boʻsh ish oʻrinlari taqdim etildi. Ish beruvchilar hamda masʼul agentlik vakillari har bir yoʻnalish boʻyicha mehnat sharoitlari, oylik maosh miqdori, ish vaqti, yashash joyi bilan taʼminlanish, tibbiy xizmat va boshqa ijtimoiy kafolatlar haqida batafsil maʼlumot berdilar.

Shuningdek, fuqarolarga mehnat shartnomalarini tuzish tartibi, viza rasmiylashtirish jarayonlari, zarur hujjatlar roʻyxati hamda xorijda mehnat qilishda yuzaga kelishi mumkin boʻlgan huquqiy masalalar boʻyicha tushuntirishlar berildi. Mutaxassislar tomonidan noqonuniy migratsiyaning salbiy oqibatlari haqida ham alohida toʻxtalib oʻtildi.

Eʼtiborli jihati shundaki, tadbir doirasida faqat xorijda ishlash istagidagi fuqarolar emas, balki mahalliy mehnat bozorida ish topishni xohlovchilar uchun ham imkoniyatlar yaratildi. Qoraqalpogʻiston Respublikasi hududidagi korxona va tashkilotlarda mavjud boʻsh ish oʻrinlari taqdim etilib, mahalliy aholi uchun keng tanlov imkoniyati yaratildi.

Mehnat yarmarkasi qizgʻin muloqot va savol-javobtlarga boy ruhda oʻtdi. Ishtirokchilar xorijiy tillarni oʻrganish markazlari, kasbga qayta tayyorlash kurslari hamda yangi muhitga moslashuv boʻyicha zarur maʼlumotlarga ega boʻldilar.

Amudaryo tumanida tashkil etilgan mazkur “Xorijda ish” mehnat yarmarkasi aholi bandligini taʼminlash, xavfsiz va tartibli mehnat migratsiyasini rivojlantirish hamda fuqarolar turmush darajasini oshirish yoʻlidagi muhim amaliy qadamlardan biri boʻldi. Bu kabi tadbirlar yurtdoshlarimizning dunyo mehnat bozorida oʻz oʻrnini topishiga, aldanib qolish holatlarining oldini olishga va jamiyat farovonligini yuksaltirishga xizmat qiladi.