Йўл ҳаракати хавфсизлиги — ҳаёт хавфсизлиги: Амударёда аҳоли мурожаатлари тингланди
Бугунги кунда юртимизда автомобиль йўлларидаги тирбандликларнинг олдини олиш, пиёдалар ва ҳайдовчилар учун қулай инфратузилма яратиш, энг муҳими, йўл-транспорт ҳодисаларига барҳам бериш мақсадида тизимли ишлар амалга оширилмоқда. Айниқса, раҳбарларнинг бевосита жойларга чиқиб, халқ билан юзма-юз мулоқот қилиши, уларнинг дарду ташвишлари ва таклифларини тинглаши соҳадаги мавжуд муаммоларга тезкор ечим топишда муҳим омил бўлмоқда. Амударё туманида ўтказилган навбатдаги сайёр қабул ҳам айнан ана шу эзгу мақсадларга — йўллардаги хавфсизликни таъминлаш ва аҳолининг ҳақли эътирозларига сабаб бўлаётган масалаларни бартараф этишга қаратилди.
Мазкур тадбир Қорақалпоғистон Республикаси Ички ишлар вазирлиги Жамоат хавфсизлиги хизмати Йўл ҳаракати хавфсизлиги бошқармаси бошлиғи Шерзод Абдуназаров томонидан ўтказилди.
Очиқ ва самимий руҳда ташкил этилган қабулда асосий эътибор туман ҳудудидаги йўлларда юзага келаётган тирбандликларни бартараф этиш, авариявий ҳолатларнинг олдини олиш ҳамда фуқароларнинг соҳани такомиллаштириш борасидаги таклиф ва мурожаатларини ўрганишга қаратилди.
Мулоқот давомида амударёликлар ўзларини қийнаётган муаммолар ва йўл ҳаракати хавфсизлигини таъминлаш бўйича таклифлар билан фаол иштирок этдилар. Хусусан, аҳоли томонидан билдирилган энг долзарб масалалардан бири — бу таълим муассасалари, яъни мактаблар атрофида ўқувчилар хавфсизлигини таъминлаш бўлди. Фуқаролар мактаблар яқинида транспорт воситаларининг ҳаракат тезлигини чеклашга қаратилган махсус белгиларни ўрнатиш, шунингдек, маҳаллий йўллардаги тартибга солинмаган пиёдалар ўтиш жойларига замонавий талаблар асосида махсус қавариқ пиёдалар йўлакларини қуриш таклифини илгари сурдилар. Бу таклифлар болалар ва пиёдалар хавфсизлигини таъминлашда ниҳоятда муҳим аҳамиятга эга эканлиги қайд этилди.
Сайёр қабулнинг энг эътиборли жиҳатларидан бири шунда бўлдики, муаммолар фақат қоғозда қайд этилибгина қолмай, уларнинг ечими бўйича шу жойнинг ўзида амалий ҳаракатлар бошланди. Масалан, фуқаролар томонидан туман марказидаги бозор атрофида автотранспорт воситаларининг тирбандлиги юзага келаётгани, бу эса аҳолига ноқулайлик туғдираётгани ҳақида мурожаат қилинди. Ушбу мурожаатга зудлик билан муносабат билдирган бошқарма бошлиғи Шерзод Абдуназаров вазиятни бевосита бозор ҳудудига бориб, ўз кўзи билан ўрганди. Вазият таҳлил қилиниб, бозор атрофидаги тартибсизликларни бартараф этиш, автоуловлар ва пиёдалар ҳаракатини тўғри ташкил қилиш мақсадида Йўл патруль хизмати ходимлари айнан шу ҳудудга бириктирилди ва уларга қатъий топшириқлар берилди. Бундай тезкор ёндашув аҳоли томонидан илиқ кутиб олинди.
Шунингдек, учрашув давомида туман йўлларидаги мавжуд йўл белгиларини хатловдан ўтказиш, эскирганларини янгилаш ва зарурат бўлган жойларга янги белгилар ўрнатиш бўйича ҳам масъулларга аниқ кўрсатмалар берилди. Қабулда кўтарилган мурожаатларнинг аксариятига жойида ҳуқуқий тушунтиришлар берилиб, амалий ечимлар топилди. Вақт, муддат ва маблағ талаб этадиган масалалар эса алоҳида назоратга олиниб, тегишли ташкилот раҳбарларига ижро учун йўналтирилди.
Амударё туманида ўтказилган мазкур сайёр қабул йўл ҳаракати иштирокчилари учун хавфсиз ва қулай шарт-шароитлар яратиш, "Йўл ҳаракати интизомдан бошланади" шиорини амалда намоён этиш йўлидаги муҳим қадам бўлди. Зеро, тартибли йўл ва онгли ҳайдовчи — хавфсиз ҳаёт гаровидир.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
