Yoʻl harakati xavfsizligi — hayot xavfsizligi: Amudaryoda aholi murojaatlari tinglandi

Bugungi kunda yurtimizda avtomobil yoʻllaridagi tirbandliklarning oldini olish, piyodalar va haydovchilar uchun qulay infratuzilma yaratish, eng muhimi, yoʻl-transport hodisalariga barham berish maqsadida tizimli ishlar amalga oshirilmoqda. Ayniqsa, rahbarlarning bevosita joylarga chiqib, xalq bilan yuzma-yuz muloqot qilishi, ularning dardu tashvishlari va takliflarini tinglashi sohadagi mavjud muammolarga tezkor yechim topishda muhim omil boʻlmoqda. Amudaryo tumanida oʻtkazilgan navbatdagi sayyor qabul ham aynan ana shu ezgu maqsadlarga — yoʻllardagi xavfsizlikni taʼminlash va aholining haqli eʼtirozlariga sabab boʻlayotgan masalalarni bartaraf etishga qaratildi.

Mazkur tadbir Qoraqalpogʻiston Respublikasi Ichki ishlar vazirligi Jamoat xavfsizligi xizmati Yoʻl harakati xavfsizligi boshqarmasi boshligʻi Sherzod Abdunazarov tomonidan oʻtkazildi.

Ochiq va samimiy ruhda tashkil etilgan qabulda asosiy eʼtibor tuman hududidagi yoʻllarda yuzaga kelayotgan tirbandliklarni bartaraf etish, avariyaviy holatlarning oldini olish hamda fuqarolarning sohani takomillashtirish borasidagi taklif va murojaatlarini oʻrganishga qaratildi.

Muloqot davomida amudaryoliklar oʻzlarini qiynayotgan muammolar va yoʻl harakati xavfsizligini taʼminlash boʻyicha takliflar bilan faol ishtirok etdilar. Xususan, aholi tomonidan bildirilgan eng dolzarb masalalardan biri — bu taʼlim muassasalari, yaʼni maktablar atrofida oʻquvchilar xavfsizligini taʼminlash boʻldi. Fuqarolar maktablar yaqinida transport vositalarining harakat tezligini cheklashga qaratilgan maxsus belgilarni oʻrnatish, shuningdek, mahalliy yoʻllardagi tartibga solinmagan piyodalar oʻtish joylariga zamonaviy talablar asosida maxsus qavariq piyodalar yoʻlaklarini qurish taklifini ilgari surdilar. Bu takliflar bolalar va piyodalar xavfsizligini taʼminlashda nihoyatda muhim ahamiyatga ega ekanligi qayd etildi.

Sayyor qabulning eng eʼtiborli jihatlaridan biri shunda boʻldiki, muammolar faqat qogʻozda qayd etilibgina qolmay, ularning yechimi boʻyicha shu joyning oʻzida amaliy harakatlar boshlandi. Masalan, fuqarolar tomonidan tuman markazidagi bozor atrofida avtotransport vositalarining tirbandligi yuzaga kelayotgani, bu esa aholiga noqulaylik tugʻdirayotgani haqida murojaat qilindi. Ushbu murojaatga zudlik bilan munosabat bildirgan boshqarma boshligʻi Sherzod Abdunazarov vaziyatni bevosita bozor hududiga borib, oʻz koʻzi bilan oʻrgandi. Vaziyat tahlil qilinib, bozor atrofidagi tartibsizliklarni bartaraf etish, avtoulovlar va piyodalar harakatini toʻgʻri tashkil qilish maqsadida Yoʻl patrul xizmati xodimlari aynan shu hududga biriktirildi va ularga qatʼiy topshiriqlar berildi. Bunday tezkor yondashuv aholi tomonidan iliq kutib olindi.

Shuningdek, uchrashuv davomida tuman yoʻllaridagi mavjud yoʻl belgilarini xatlovdan oʻtkazish, eskirganlarini yangilash va zarurat boʻlgan joylarga yangi belgilar oʻrnatish boʻyicha ham masʼullarga aniq koʻrsatmalar berildi. Qabulda koʻtarilgan murojaatlarning aksariyatiga joyida huquqiy tushuntirishlar berilib, amaliy yechimlar topildi. Vaqt, muddat va mablagʻ talab etadigan masalalar esa alohida nazoratga olinib, tegishli tashkilot rahbarlariga ijro uchun yoʻnaltirildi.

Amudaryo tumanida oʻtkazilgan mazkur sayyor qabul yoʻl harakati ishtirokchilari uchun xavfsiz va qulay shart-sharoitlar yaratish, "Yoʻl harakati intizomdan boshlanadi" shiorini amalda namoyon etish yoʻlidagi muhim qadam boʻldi. Zero, tartibli yoʻl va ongli haydovchi — xavfsiz hayot garovidir.