Манғит деҳқон бозори атрофида ҳаракат хавфсизлигини таъминлаш чоралари кўрилмоқда
Амударё тумани Ички ишлар бўлими Жамоат хавфсизлиги хизмати Йўл ҳаракати хавфсизлиги бўлими инспекторлари ҳамда профилактика инспекторлари билан ўзаро ҳамкорликда Амударё туманининг Манғит шаҳри, Навоий номли маҳалласи ҳудудида жойлашган Манғит деҳқон бозори олдида кенг қамровли рейд тадбирлари ташкил этилди. Мазкур тадбирлар ҳудудда йўл ҳаракати хавфсизлигини таъминлаш, транспорт воситалари ҳаракатида юзага келаётган тирбандликларни бартараф этиш, шунингдек, йўл-транспорт ҳодисаларининг олдини олиш мақсадида амалга оширилди.
Маълумки, Манғит деҳқон бозори Амударё туманидаги энг гавжум савдо масканларидан бири ҳисобланиб, айниқса кундузги вақтда бу ҳудудда транспорт оқими кескин ошади. Натижада Буюк Турон ва Бердақ кўчалари кесишмасида тирбандликлар юзага келиб, ҳайдовчилар ва пиёдалар учун ноқулайликлар туғдирарди. Айрим ҳолларда йўл ҳаракати қоидаларига амал қилмаслик ҳолатлари кузатилиб, бу эса авария хавфининг ортишига сабаб бўлар эди. Шу боис мазкур ҳудудда манзилли ва тизимли чоралар кўриш зарурати туғилди.
Рейд тадбирлари давомида Йўл ҳаракати хавфсизлиги бўлими инспекторлари томонидан транспорт воситаларини бошқаришда йўл ҳаракати қоидаларини бузаётган ҳайдовчиларга нисбатан қонунчиликда белгиланган тартибда маъмурий чоралар кўрилди. Хусусан, белгиланмаган жойларда тўхтаб туриш, йўл четида тартибсиз парковка қилиш, пиёдалар ўтиш жойларида ҳаракат қоидаларини бузиш каби ҳолатлар аниқланиб, уларнинг ҳар бири юзасидан тегишли баённомалар расмийлаштирилди.
Шу билан бирга, рейд фақатгина жазолаш билан чекланиб қолмади. Туман Ички ишлар бўлими масъуллари, Йўл ҳаракати хавфсизлиги бўлими ҳамда профилактика инспекторлари томонидан ҳайдовчилар билан тушунтириш ва профилактик суҳбатлар олиб борилди. Ушбу суҳбатлар давомида йўл ҳаракати қоидаларига риоя этишнинг аҳамияти, ҳар бир ҳайдовчининг мажбуриятлари, йўл-транспорт ҳодисаларининг оғир оқибатлари ҳақида батафсил тушунтиришлар берилди.
Аниқланган муаммоларни бартараф этиш мақсадида Манғит деҳқон бозори атрофидаги инфратузилмани яхшилаш бўйича ҳам қатор амалий ишлар амалга оширилди. Хусусан, мазкур ҳудуддаги айрим светофорлар техник носоз ҳолатга келиб қолгани аниқланиб, улар тезкор равишда қайта таъмирланди ва соз ҳолатга келтирилди. Светафорларнинг тўлиқ ишлаши транспорт воситалари ва пиёдалар ҳаракатини тартибга солишда муҳим аҳамият касб этиши инобатга олинди.
Шунингдек, тирбандликларнинг олдини олиш ва ҳаракат хавфсизлигини доимий таъминлаш мақсадида ушбу ҳудудга икки нафар Йўл ҳаракати хавфсизлиги бўлими инспектори доимий равишда бириктирилди. Улар кун давомида транспорт оқимини назорат қилиб боради, қоидабузарликларнинг олдини олади ҳамда ҳайдовчиларга амалий кўмак кўрсатади. Бу эса йўлларда тартиб-интизомни мустаҳкамлашга хизмат қилмоқда.
Келгусида йўл ҳаракати хавфсизлигини янада кучайтириш мақсадида мазкур ҳудудга махсус видео қайд этиш мосламаларини ўрнатиш бўйича ҳам тегишли таклифлар ишлаб чиқилди. Ушбу қурилмалар орқали қоидабузарликларни автоматик аниқлаш, тирбандликлар сабабларини таҳлил қилиш ҳамда тезкор чоралар кўриш имконияти яратилади. Бу ташаббус замонавий технологияларни йўл ҳаракати хавфсизлигини таъминлашга кенг жорий этишга қаратилган.
Кўрилган комплекс чора-тадбирлар натижасида Манғит деҳқон бозори атрофидаги Буюк Турон ва Бердақ кўчаларида юзага келган тирбандликлар бартараф этилди. Айни пайтда транспорт воситаларининг йўлларда тўсиқсиз, эркин ва хавфсиз ҳаракатланиши таъминланиб, пиёдалар учун ҳам қулай шароитлар яратилди.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
