Уйшин маҳалласида замонавий тиббиёт маскани аҳолига сифатли тиббий хизмат кўрсатмоқда

Бугун юртимизда аҳолининг саломатлигини мустаҳкамлаш, тиббий хизматлар сифатини ошириш давлат сиёсатининг устувор йўналишларидан бирига айланган. Бу борада давлат билан бир қаторда саховатпеша тадбиркорларнинг ижтимоий масъулиятини ҳис этиб, халқ манфаатини кўзлаб амалга ошираётган эзгу ишлари алоҳида эътирофга лойиқ. Ана шундай хайрли ташаббуслардан бири Амударё тумани Уйшин маҳалласида барпо этилган замонавий оилавий шифокорлик пункти бўлди.

Мазкур тиббиёт маскани бугунги кунда маҳалла аҳолиси саломатлигини мустаҳкамлаш, касалликларнинг олдини олиш ва бирламчи тиббий хизматларни сифатли кўрсатишда муҳим аҳамият касб этмоқда. Энг муҳими, бу иншоот тўлиқ саховатпеша тадбиркор ҳомийлигида қурилиб, хусусий секторнинг ижтимоий соҳадаги фаол иштирокини яққол намоён этди.

Авваллари Уйшин маҳалласи аҳолиси тиббий хизмат олиш учун Қипчоқ шаҳарчасида жойлашган 1-сонли оилавий поликлиникага боришга мажбур эди. Ушбу поликлиника маҳалладан 8–9 километр узоқликда жойлашгани сабабли, айниқса кексалар, ногиронлиги бўлган фуқаролар ва ёш болали аёллар учун бу масофа жиддий муаммолар туғдирарди. Қишнинг совуқ, изғиринли кунлари ёки ёзнинг жазирама иссиғида транспорт топиш мушкуллиги тиббий хизматдан фойдаланишни янада қийинлаштирган.

Аҳолининг ана шу долзарб эҳтиёжлари инобатга олиниб, тадбиркор ташаббуси қўллаб-қувватланди ҳамда Қорақалпоғистон Республикаси Соғлиқни сақлаш вазирлиги томонидан Уйшин маҳалласида янги тиббий пункт қуриш лойиҳаси тасдиқланди. Натижада қисқа вақт ичида барча замонавий талаб ва стандартларга жавоб берадиган тиббиёт муассасаси барпо этилди.

Бугунги кунда мазкур оилавий шифокорлик пункти ультра товуш текшируви (УЗИ), электрокардиография (ЭКГ), стоматология хизматлари учун зарур ускуналар, замонавий компьютер техникалари ва бошқа илғор тиббий жиҳозлар билан тўлиқ таъминланган. Бу эса маҳалла аҳолисига турли текширув ва даволанишларни узоқ йўл босмасдан, ўз яшаш ҳудудида амалга ошириш имконини бермоқда.

Оилавий шифокорлик пунктида тажрибали шифокорлар ҳамда мутахассислар фаолият олиб бормоқда. Хусусан, умумий амалиёт шифокори, педиатр, акушер-гинеколог, стоматолог ҳамда қатор мутахассислар аҳолига малакали тиббий хизмат кўрсатмоқда. Шунингдек, ҳамширалар ва ўрта тиббиёт ходимлари томонидан эмлаш, профилактик кўриклар, оналар ва болалар саломатлигини муҳофаза қилишга қаратилган чора-тадбирлар мунтазам амалга оширилмоқда.

Натижада маҳалла аҳолиси турли касалликлар бўйича дастлабки ташхис ва маслаҳатларни ҳудуднинг ўзида, тезкор ва қулай тарзда олиш имкониятига эга бўлмоқда.

Шубҳасиз, бундай тиббиёт масканининг ташкил этилганлиги нафақат тиббий инфратузилманинг кенгайиши, балки аҳолининг ҳаёт сифати яхшиланиши, соғлом турмуш тарзини шакллантириш ва касалликларни эрта аниқлаш борасида муҳим қадамдир. Энг асосийси, бу эзгу иш халқ билан тадбиркор, давлат билан жамият ўртасидаги ҳамкорлик самарадорлигининг ёрқин ифодасидир.

Уйшин маҳалласида барпо этилган ушбу оилавий шифокорлик пункти келгусида ҳам аҳоли саломатлигини муҳофаза қилиш йўлида ишончли таянч бўлиб хизмат қилиши шубҳасиз. Саховат, ташаббус ва эзгулик уйғунлашган бундай лойиҳалар юртимизда тобора кўпайиб бораётгани эса барчамизни қувонтиради.

Чарос Арслонова, туман ҳокимлигининг Ахборот хизмати раҳбари.