ПОЙТАХТЛИК ЕТАКЧИ НЕФРОЛОГ ШИФОКОРЛАР ВА АҲОЛИ БИЛАН МУЛОҚОТ ҚИЛДИ

Аҳоли саломатлигини мустаҳкамлаш, касалликларни эрта аниқлаш ва юқори малакали тиббий хизматнинг энг чекка ҳудудларгача кириб боришини таъминлаш — бугунги кун тиббиётининг бош мезонидир. Шу мақсадда Республика Ихтисослаштирилган Нефрология ва Буйрак трансплантацияси Илмий-амалий тиббиёт марказининг етакчи мутахассиси Отабек Мирмаҳаммадов Амударё туманида бўлиб, амалий мулоқотлар ўтказди.

Туман Тиббиёт бирлашмасида ташкил этилган ушбу учрашувда маҳаллий шифокорлар, умумий амалиёт врачлари, ҳамширалар ҳамда аҳоли вакиллари иштирок этишди.

Маълумки, буйрак инсон организмининг энг муҳим "филтр"ларидан бири ҳисобланади. Унинг фаолияти бузилиши бутун организм заҳарланишига ва оғир асоратларга олиб келиши мумкин. Учрашув аввалида сўзга чиққан Республика маркази мутахассиси Отабек Мирмаҳаммадов бугунги кунда нефрология соҳасидаги янгиликлар, буйрак хасталикларининг келиб чиқиш сабаблари ва уларнинг олдини олиш борасидаги замонавий ёндашувлар ҳақида батафсил маълумот берди.

Қайд қилинганидек, буйрак хасталиклари кўпинча нотўғри овқатланиш, кам сув ичиш, юқори қон босими, қандли диабет, инфекциялар ҳамда дори воситаларини назоратсиз қабул қилиш оқибатида келиб чиқади. Уларнинг олдини олиш учун кун давомида етарли миқдорда сув ичиш, тузли таомларни чеклаш, соғлом турмуш тарзига амал қилиш, қон босими ва қанд миқдорини назорат қилиш, шунингдек, вақти-вақти билан тиббий кўрикдан ўтиш муҳим аҳамиятга эга.

Ташрифнинг асосий мақсадларидан бири — бирламчи тиббий бўғин, яъни қишлоқ оилавий поликлиникаларида фаолият юритаётган умумий амалиёт врачларининг малакасини оширишга қаратилди.

Мулоқот давомида буйрак касалликларини яширин даврида аниқлаш усуллари, қандли диабет ва қон босими юқори бўлган беморларда буйрак етишмовчилиги ривожланишининг олдини олиш, аҳоли орасида профилактик текширувларни тўғри ташкил этиш каби масалалар чуқур таҳлил қилинди.

Пойтахтдан келган мутахассис маҳаллий ҳамкасбларига буйрак етишмовчилигининг оғир босқичларига ўтиб кетишига йўл қўймаслик бўйича қимматли тавсиялар берди ва ўзаро тажриба алмашди.

Учрашувда аҳоли вакиллари билан ҳам очиқ мулоқот ташкил этилди. Фуқароларга соғлом турмуш тарзига риоя қилиш, туз ва зарарли маҳсулотларни меъёрида истеъмол қилиш, ўзбошимчалик билан дори воситаларини қабул қилмаслик тушунтирилди. Таъкидландики, ўз вақтида шифокорга мурожаат қилиш ва касалликни эрта босқичда даволаш — буйрак трансплантацияси ёки гемодиализ каби оғир муолажаларга эҳтиёж қолдирмасликнинг энг самарали йўлидир.

Тадбир доирасида Отабек Мирмаҳаммадов томонидан тумандаги оғир ва сурункали буйрак хасталиги бор беморларга амалий ёрдам кўрсатилиб, зарур тиббий маслаҳатлар берилди.

Бу каби тадбирлар амударёликлар саломатлигини асраш, тиббий маданиятни юксалтириш ва соҳадаги муаммоларни жойида ҳал этишда муҳим аҳамият касб этади.