Грант лойиҳаси доирасида аҳолига LED лампочкалар бепул тарқатилди
“Жайхун илҳомлари” нодавлат нотижорат ташкилотининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Экологик маданият – соғлом келажак асоси” номли лойиҳаси доирасида аҳоли ўртасида кенг қамровли тарғибот ишлари амалга оширилмоқда. Лойиҳада овул ва маҳаллаларда учрашувлар ўтказиш, фуқароларга экология ва атроф-муҳитни муҳофаза қилиш соҳасидаги қонун ҳужжатлари талабларини тушунтириш, аҳоли онгида экологик масъулиятни шакллантириш асосий вазифа этиб белгиланган.
Шунингдек, лойиҳа доирасида Амударё телеканали ҳамда Тараққиёт кўзгуси газетаси таҳририятлари билан ҳамкорликда тарғибот материалларини кенг жамоатчиликка етказиш кўзда тутилган. Бу эса экологик маданиятни шакллантиришда оммавий ахборот воситаларининг ўрни нақадар муҳим эканини яна бир бор кўрсатади.
Грант лойиҳасининг иш режасига мувофиқ Амударё тумани Маҳаллалар уюшмаси билан ҳамкорликда Дўстлик маҳалласида аҳоли вакиллари иштирокида очиқ мулоқот ва тарғибот йиғилиши ўтказилди. Учрашув давомида иштирокчиларга ҳудудларнинг санитария ҳолатини яхшилаш, чиқиндиларни белгиланган жойларга ташлаш, ҳаво ва тупроқ ифлосланишининг олдини олишнинг аҳамияти атрофлича тушунтирилди.
Мутасаддилар аҳолига дарахт экиш ва яшил ҳудудларни кўпайтириш, табиатни асраб-авайлаш, ноқонуний дарахт кесилишининг олдини олиш, “яшил” технологиялардан фойдаланиш каби масалалар юзасидан амалий тавсиялар бердилар. Шу билан бирга, хонадонларда ёритиш тизимларини энергия тежамкор ускуналар билан жиҳозлаш, ортиқча электр сарфини камайтириш ва табиий ресурслардан оқилона фойдаланишнинг аҳамияти алоҳида таъкидланди.
Аҳолини энергия тежовчи қурилмалардан фойдаланишга рағбатлантириш мақсадида йиғилиш иштирокчиларига энерготежамкор LED лампочкалар тарқатилди. Бу ташаббус орқали нафақат оилалар харажатини камайтириш, балки электр энергияси сарфини қисқартириш, шу орқали атроф-муҳитни муҳофаза қилишга ҳисса қўшиш кўзда тутилган.
Экологик масъулият — бу фақат табиатни яхши кўриш эмас, балки ҳар бир фуқаронинг кундалик одати ва бурчидир. Аҳоли онгида экологик маданият шаклланса, ҳудудларнинг санитария ҳолати ҳам яхшиланади: кўча-кўйлар тозаланади, маиший чиқиндилар белгиланган жойларга ташланади, атроф-муҳитдаги салбий ҳолатлар кескин камаяди. Яшил ҳудудлар инсон саломатлиги учун табиий қалқон ҳисобланади. Шу сабабли дарахт экиш, кўчатларни парваришлаш, маҳалла ва ташкилотларда яшил зоналарни кўпайтириш орқали ҳаво тозалиги сақланади, чанг камаяди.
“Экологик маданият – соғлом келажак асоси” лойиҳаси доирасида амалга оширилаётган бундай тарғибот тадбирлари аҳолида экологик масъулиятни шакллантириш, табиатга эҳтиёткорона муносабатни кучайтириш ва барқарор турмуш тарзини қарор топтиришда муҳим аҳамият касб этмоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
