Grant loyihasi doirasida aholiga LED lampochkalar bepul tarqatildi
“Jayxun ilhomlari” nodavlat notijorat tashkilotining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi tomonidan moliyalashtirilgan “Ekologik madaniyat – sogʻlom kelajak asosi” nomli loyihasi doirasida aholi oʻrtasida keng qamrovli targʻibot ishlari amalga oshirilmoqda. Loyihada ovul va mahallalarda uchrashuvlar oʻtkazish, fuqarolarga ekologiya va atrof-muhitni muhofaza qilish sohasidagi qonun hujjatlari talablarini tushuntirish, aholi ongida ekologik masʼuliyatni shakllantirish asosiy vazifa etib belgilangan.
Shuningdek, loyiha doirasida Amudaryo telekanali hamda Taraqqiyot koʻzgusi gazetasi tahririyatlari bilan hamkorlikda targʻibot materiallarini keng jamoatchilikka yetkazish koʻzda tutilgan. Bu esa ekologik madaniyatni shakllantirishda ommaviy axborot vositalarining oʻrni naqadar muhim ekanini yana bir bor koʻrsatadi.
Grant loyihasining ish rejasiga muvofiq Amudaryo tumani Mahallalar uyushmasi bilan hamkorlikda Doʻstlik mahallasida aholi vakillari ishtirokida ochiq muloqot va targʻibot yigʻilishi oʻtkazildi. Uchrashuv davomida ishtirokchilarga hududlarning sanitariya holatini yaxshilash, chiqindilarni belgilangan joylarga tashlash, havo va tuproq ifloslanishining oldini olishning ahamiyati atroflicha tushuntirildi.
Mutasaddilar aholiga daraxt ekish va yashil hududlarni koʻpaytirish, tabiatni asrab-avaylash, noqonuniy daraxt kesilishining oldini olish, “yashil” texnologiyalardan foydalanish kabi masalalar yuzasidan amaliy tavsiyalar berdilar. Shu bilan birga, xonadonlarda yoritish tizimlarini energiya tejamkor uskunalar bilan jihozlash, ortiqcha elektr sarfini kamaytirish va tabiiy resurslardan oqilona foydalanishning ahamiyati alohida taʼkidlandi.
Aholini energiya tejovchi qurilmalardan foydalanishga ragʻbatlantirish maqsadida yigʻilish ishtirokchilariga energotejamkor LED lampochkalar tarqatildi. Bu tashabbus orqali nafaqat oilalar xarajatini kamaytirish, balki elektr energiyasi sarfini qisqartirish, shu orqali atrof-muhitni muhofaza qilishga hissa qoʻshish koʻzda tutilgan.
Ekologik masʼuliyat — bu faqat tabiatni yaxshi koʻrish emas, balki har bir fuqaroning kundalik odati va burchidir. Aholi ongida ekologik madaniyat shakllansa, hududlarning sanitariya holati ham yaxshilanadi: koʻcha-koʻylar tozalanadi, maishiy chiqindilar belgilangan joylarga tashlanadi, atrof-muhitdagi salbiy holatlar keskin kamayadi. Yashil hududlar inson salomatligi uchun tabiiy qalqon hisoblanadi. Shu sababli daraxt ekish, koʻchatlarni parvarishlash, mahalla va tashkilotlarda yashil zonalarni koʻpaytirish orqali havo tozaligi saqlanadi, chang kamayadi.
“Ekologik madaniyat – sogʻlom kelajak asosi” loyihasi doirasida amalga oshirilayotgan bunday targʻibot tadbirlari aholida ekologik masʼuliyatni shakllantirish, tabiatga ehtiyotkorona munosabatni kuchaytirish va barqaror turmush tarzini qaror toptirishda muhim ahamiyat kasb etmoqda.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
