Қутуриш касаллиги тарқалишининг олдини олиш бўйича махсус тактик-ўқув машқи ўтказилди

Амударё туманида “Одамлар ва ҳайвонлар ўртасида қутуриш касаллиги тарқалишининг олдини олиш” мавзусида махсус тактик-ўқув машқи ўтказилди. Машқ Манғит шаҳридаги Олмазор маҳалласи ҳудудида ташкил этилиб, қутуриш касаллигига доир фавқулодда вазият юзага келган тақдирда Фавқулодда вазиятларнинг олдини олиш ва бартараф этиш давлат қуйи тизими Амударё тумани бўғинининг ўзаро ҳамкорликдаги ҳаракатлари амалда намойиш этилди.

Махсус тактик-ўқув машқи 3 босқичда ўтказилди. Биринчи босқичда маҳалла ҳудудидаги ўйингоҳда тегишли хизматларнинг саф кўриги ташкил этилди. Масъуллар аҳоли ўртасида қутуриш касаллиги тарқалишининг олдини олиш ва бартараф этиш бўйича керакли куч ва воситаларнинг шайлигини кўрикдан ўтказдилар. Ҳар бир хизмат ўз функционал вазифасидан келиб чиқиб амалга ошириши лозим бўлган чора-тадбирларни аниқ белгилаб олди.

Иккинчи босқичда маҳалла ҳудудидаги 82-сонли мактаб биносида кўргазмали ўқув семинар бўлиб ўтди. Семинарда “Аҳоли ўртасида қутуриш касаллиги тарқалиши билан боғлиқ фавқулодда вазиятлар юзага келиши хавфи, уларнинг олдини олиш ва бартараф этишда давлат қуйи тизимининг аҳамияти” мавзусида маърузалар тингланди.

Амударё тумани Санитария-эпидемиология осойишталик ва жамоат саломатлиги бўлими масъуллари ҳудудда қутуриш касаллигининг олдини олиш бўйича амалга оширилаётган профилактик ишлар ҳақида ахборот бериб, касалликнинг юқиш йўллари ва ҳимоя чоралари юзасидан тушунтиришлар бердилар.

Амударё тумани Тиббиёт бирлашмаси Кўп тармоқли марказий поликлиникаси шифокорлари “Қутуриш касаллигининг келиб чиқиши, клиникаси, даволаш ва профилактика усуллари” мавзусида маъруза қилдилар. Уларда қутуриш вирусли юқумли касаллик экани, асосан зарарланган ҳайвон тишлаши ёки тирналиши орқали юқиши, марказий асаб тизимини зарарлаши ва ўз вақтида даволанмаса ўлимга олиб келиши мумкинлиги алоҳида таъкидланди. Шу боис, ҳар қандай тишланиш ҳолатида зудлик билан тиббий муассасага мурожаат қилиш зарурлиги қайд этилди.

Амударё тумани Ветеринария ва чорвачиликни ривожлантириш бўлими ходимлари ҳудудда қутуриш касаллиги бўйича мавжуд вазият, уй ҳайвонларини мунтазам эмлаш ва назорат қилиш бўйича амалга оширилаётган ишлар ҳақида маълумот бердилар.

Машғулотнинг учинчи босқичида қутуриш касаллигига гумон қилинган бемор аниқланган ҳолатда хизматларнинг амалий ҳаракатлари намойиш этилди. Тиббиёт бирлашмасида юқумли касалликлар шифокори гумон қилинган фуқарони қабул қилиб, қутуришга хос клиник белгиларни аниқлади ва тегишли тиббий муолажаларни бошлади. Белгиланган тартибга мувофиқ, ҳолат юзасидан тезкор ахборот узатилди.

Санитария-эпидемиология бўлими эпидемиолог-шифокори жабрланган ҳудудда эпидемиологик анамнез йиғди. Ветеринария ходимлари беморга жабр етказган ҳайвон ва ҳудуддаги бошқа уй ҳайвонларини текширувдан ўтказиб, 10 кунлик назоратга олдилар. Қутуриш ташхиси тасдиқланган тақдирда амалга ошириладиган чоралар ҳам кўргазмали равишда намойиш этилди. Ободонлаштириш бошқармасининг қаровсиз ҳайвонларни тутиш бригадаси томонидан ҳайвонни ушлаш ва махсус назорат жойига етказиш жараёни амалда кўрсатиб берилди.

Сўнгги босқичда ўқув машғулотининг якунлари муҳокама қилинди. Йиғилишда иштирокчиларнинг камчиликлари кўрсатилиб, келгусида бундай ҳолатларга йўл қўймаслик юзасидан таклиф ва тавсиялар берилди. Шу билан бирга, хизматлар ўртасидаги ўзаро ҳамкорликни янада мустаҳкамлаш, фавқулодда вазиятларга тезкор ва мувофиқлашган тарзда жавоб қайтариш муҳим экани алоҳида таъкидланди.

Мазкур махсус тактик-ўқув машқи аҳоли саломатлигини муҳофаза қилиш, қутуриш касаллиги тарқалишининг олдини олиш ва соҳалар ўртасидаги ҳамкорликни мустаҳкамлаш йўлида муҳим амалий қадам бўлди.