Quturish kasalligi tarqalishining oldini olish boʻyicha maxsus taktik-oʻquv mashqi oʻtkazildi

Amudaryo tumanida “Odamlar va hayvonlar oʻrtasida quturish kasalligi tarqalishining oldini olish” mavzusida maxsus taktik-oʻquv mashqi oʻtkazildi. Mashq Mangʻit shahridagi Olmazor mahallasi hududida tashkil etilib, quturish kasalligiga doir favqulodda vaziyat yuzaga kelgan taqdirda Favqulodda vaziyatlarning oldini olish va bartaraf etish davlat quyi tizimi Amudaryo tumani boʻgʻinining oʻzaro hamkorlikdagi harakatlari amalda namoyish etildi.

Maxsus taktik-oʻquv mashqi 3 bosqichda oʻtkazildi. Birinchi bosqichda mahalla hududidagi oʻyingohda tegishli xizmatlarning saf koʻrigi tashkil etildi. Masʼullar aholi oʻrtasida quturish kasalligi tarqalishining oldini olish va bartaraf etish boʻyicha kerakli kuch va vositalarning shayligini koʻrikdan oʻtkazdilar. Har bir xizmat oʻz funktsional vazifasidan kelib chiqib amalga oshirishi lozim boʻlgan chora-tadbirlarni aniq belgilab oldi.

Ikkinchi bosqichda mahalla hududidagi 82-sonli maktab binosida koʻrgazmali oʻquv seminar boʻlib oʻtdi. Seminarda “Aholi oʻrtasida quturish kasalligi tarqalishi bilan bogʻliq favqulodda vaziyatlar yuzaga kelishi xavfi, ularning oldini olish va bartaraf etishda davlat quyi tizimining ahamiyati” mavzusida maʼruzalar tinglandi.

Amudaryo tumani Sanitariya-epidemiologiya osoyishtalik va jamoat salomatligi boʻlimi masʼullari hududda quturish kasalligining oldini olish boʻyicha amalga oshirilayotgan profilaktik ishlar haqida axborot berib, kasallikning yuqish yoʻllari va himoya choralari yuzasidan tushuntirishlar berdilar.

Amudaryo tumani Tibbiyot birlashmasi Koʻp tarmoqli markaziy poliklinikasi shifokorlari “Quturish kasalligining kelib chiqishi, klinikasi, davolash va profilaktika usullari” mavzusida maʼruza qildilar. Ularda quturish virusli yuqumli kasallik ekani, asosan zararlangan hayvon tishlashi yoki tirnalishi orqali yuqishi, markaziy asab tizimini zararlashi va oʻz vaqtida davolanmasa oʻlimga olib kelishi mumkinligi alohida taʼkidlandi. Shu bois, har qanday tishlanish holatida zudlik bilan tibbiy muassasaga murojaat qilish zarurligi qayd etildi.

Amudaryo tumani Veterinariya va chorvachilikni rivojlantirish boʻlimi xodimlari hududda quturish kasalligi boʻyicha mavjud vaziyat, uy hayvonlarini muntazam emlash va nazorat qilish boʻyicha amalga oshirilayotgan ishlar haqida maʼlumot berdilar.

Mashgʻulotning uchinchi bosqichida quturish kasalligiga gumon qilingan bemor aniqlangan holatda xizmatlarning amaliy harakatlari namoyish etildi. Tibbiyot birlashmasida yuqumli kasalliklar shifokori gumon qilingan fuqaroni qabul qilib, quturishga xos klinik belgilarni aniqladi va tegishli tibbiy muolajalarni boshladi. Belgilangan tartibga muvofiq, holat yuzasidan tezkor axborot uzatildi.

Sanitariya-epidemiologiya boʻlimi epidemiolog-shifokori jabrlangan hududda epidemiologik anamnez yigʻdi. Veterinariya xodimlari bemorga jabr yetkazgan hayvon va hududdagi boshqa uy hayvonlarini tekshiruvdan oʻtkazib, 10 kunlik nazoratga oldilar. Quturish tashxisi tasdiqlangan taqdirda amalga oshiriladigan choralar ham koʻrgazmali ravishda namoyish etildi. Obodonlashtirish boshqarmasining qarovsiz hayvonlarni tutish brigadasi tomonidan hayvonni ushlash va maxsus nazorat joyiga yetkazish jarayoni amalda koʻrsatib berildi.

Soʻnggi bosqichda oʻquv mashgʻulotining yakunlari muhokama qilindi. Yigʻilishda ishtirokchilarning kamchiliklari koʻrsatilib, kelgusida bunday holatlarga yoʻl qoʻymaslik yuzasidan taklif va tavsiyalar berildi. Shu bilan birga, xizmatlar oʻrtasidagi oʻzaro hamkorlikni yanada mustahkamlash, favqulodda vaziyatlarga tezkor va muvofiqlashgan tarzda javob qaytarish muhim ekani alohida taʼkidlandi.

Mazkur maxsus taktik-oʻquv mashqi aholi salomatligini muhofaza qilish, quturish kasalligi tarqalishining oldini olish va sohalar oʻrtasidagi hamkorlikni mustahkamlash yoʻlida muhim amaliy qadam boʻldi.