Рамазон — меҳр-мурувват ва саховат ойи: Амударёда хайрия ишлари изчил давом этмоқда
Ўзбекистон Республикаси Президентининг Рамазон ойини муносиб кутиб олиш ва юқори савияда ўтказишга доир қарори юртимизнинг барча ҳудудларида бўлгани каби Амударё туманида ҳам эзгу амаллар, хайрия тадбирлари ва саховат ишларининг янада кенг қулоч ёйишига замин яратмоқда. Мазкур қарорда илгари сурилган “Рамазон – меҳр-мурувват, аҳиллик ва шукроналик ойи” деган улуғ ғоя асосида аҳолининг эҳтиёжманд қатламларини қўллаб-қувватлаш, кам таъминланган ва ижтимоий ҳимояга муҳтож оилалар ҳолидан хабар олиш, уларга маънавий ва амалий кўмак кўрсатишга алоҳида эътибор қаратилмоқда.
Хусусан, “Юсуф эшон бобо” жомеъ масжиди имом-хатиби Абдураҳмон Матсапоев ва ноиб имом Содиқ Тўраев томонидан маҳаллаларда истиқомат қилаётган эҳтиёжманд, боқувчисини йўқотган ва кам таъминланган оилалар ҳолидан хабар олиниб, уларга меҳр-эътибор кўрсатилмоқда.
Масъуллар Чойкўл овулида яшовчи, боқувчисини йўқотган Қундузой Ўразбоева хонадонида бўлишиб, у ерда ифторлик дастурхони ёздилар. Бу хайрли тадбир орқали бир хонадонга нафақат моддий, балки катта маънавий далда ҳам берилди.
Шунингдек, Ўртақалъа овулида яшовчи кам таъминланган оила вакили Зарифбой Давлетов хонадонидан ҳам хабар олиниб, бу ерда ҳам ифторлик дастурхони ташкил этилди. Ушбу хайрли амаллар аҳоли орасида саховат ва инсонийлик фазилатларини янада кучайтиришга хизмат қилмоқда. Зеро, Рамазон ойида қилинган ҳар бир яхшилик, ҳар бир савобли иш инсонлар қалбида шукроналик туйғусини мустаҳкамлашга ҳисса қўшади.
Хайрия ишлари фақат ифторлик дастурхонлари билан чекланиб қолмаяпти. Мутасаддилар Чойкўл овулида яшовчи Қундузой Ўразбоева хонадонида ҳам бўлишиб, ҳомийларни жалб қилган ҳолда унинг таъмирталаб уйида қурилиш ва таъмирлаш ишларини амалга ошириш жараёни билан танишдилар. Имом-хатиб, ноиб имом ва маҳалла имоми ушбу хонадонда олиб борилаётган қурилиш ишларини кўздан кечириб, эзгу ташаббуснинг амалий ижросига алоҳида эътибор қаратдилар. Бу эса Президент қарорида белгиланган эҳтиёжманд инсонларни ҳар томонлама қўллаб-қувватлаш вазифаси жойларда самарали амалга оширилаётганининг ёрқин намунасидир.
Хайрия тадбирлари доирасида Дўстлик маҳалласида яшовчи кам таъминланган оила вакили, 2-гуруҳ ногирони Қўчқор Холмурадов хонадонида ҳам ифторлик дастурхони ёзилди. Мазкур хайрия тадбири ногиронлиги бўлган фуқароларга эътибор ва ғамхўрлик кўрсатиш, уларнинг ҳаётига енгиллик ва кўнглига таскин бағишлаш йўлидаги муҳим қадамлардан бири бўлди.
Амударё туманида амалга оширилаётган бу каби хайрли ишлар юртимизда инсон қадрини юксалтириш, эҳтиёжманд инсонларни қўллаб-қувватлаш борасида олиб борилаётган давлат сиёсати жойларда изчил ва самарали ижро этилаётганини кўрсатади. Айниқса, муқаддас Рамазон ойида диний-маърифий соҳа вакиллари, маҳалла фаоллари, ҳомийлар ва жамоатчиликнинг бирлашиб, савобли ишларда елкадош бўлаётгани жамиятимиздаги аҳиллик ва ҳамжиҳатлик муҳитини янада мустаҳкамламоқда.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
