“Уч авлод учрашуви” тадбири ўтказилди

Юртимизда инсон қадрини улуғлаш, кекса авлод вакилларига эҳтиром кўрсатиш, ёшларни миллий қадриятлар ва ҳаётий сабоқлар руҳида тарбиялашга қаратилган эзгу анъаналар изчил давом этмоқда. Айниқса, нуронийларнинг бой тажрибасини жамият тараққиётига дахлдор муҳим маънавий бойлик сифатида қадрлаш, уларнинг ҳаёт йўли ва ибратли фаолиятини ёш авлодга намуна қилиб кўрсатиш бугунги кунда алоҳида аҳамият касб этмоқда. Ана шундай маънавий-маърифий аҳамиятга эга тадбирлардан бири Амударё туманида ўтказилган “Уч авлод учрашуви” бўлди.

Мазкур тадбир мазмун-моҳияти билан нафақат уч авлод — ёшлар, ўрта ва кекса авлод вакилларини бир даврада жамлагани, балки улар ўртасидаги маънавий боғлиқликни янада мустаҳкамлагани билан аҳамиятли бўлди. Учрашув давомида ҳаётнинг турли синовларидан ўтган, меҳнат ва жамоат фаолиятида катта тажриба тўплаган нуронийлар билан ёшлар ўртасида самимий мулоқот майдони яратилди.

Тадбирда “Нуроний” жамғармаси Қорақалпоғистон Республикаси бўлими раиси Турсунбой Абдижаббаров, жамғарманинг туман бўлими раиси Бекман Аллаберганов, шунингдек турли соҳаларда фаолият юритиб, туманнинг ижтимоий-иқтисодий, маънавий ва маданий ривожига муносиб ҳисса қўшган, айни пайтда нафақада кексалик гаштини сураётган нуронийлар иштирок этдилар. Учрашувда фахрийлар ҳаёт йўли, меҳнат фаолияти, юрт равнақи йўлида қилинган хизматлар ва бугунги тинч-осойишта ҳаётнинг қадри ҳақида фикр алмашдилар.

Айниқса, ёши улуғ фахрийларнинг ҳаёти ва меҳнат фаолияти давомида тўплаган бой тажрибаси, ёшлик давридаги ўзига хос қийинчиликлар, меҳнат палласидаги машаққатлар, ниҳоят нуронийлик пайтида кўрсатилаётган ҳурмат-эҳтиром ҳақида айтган дил сўзлари тадбир иштирокчиларида катта таассурот қолдирди.

Нуронийлар ҳар бир даврнинг ўз синови, ўз масъулияти бўлишини, бироқ ҳалол меҳнат, сабр, матонат ва ватанга садоқат инсонни ҳамиша юксакликка олиб чиқишини алоҳида таъкидладилар. Уларнинг самимий хотиралари, ҳаётий мисоллар билан бойитилган фикр-мулоҳазалари, айниқса ёшлар учун ўзига хос ҳаёт дарси бўлди.

Учрашув давомида туманда давлат органларида, жамоат ташкилотларида бир неча йиллар самарали меҳнат қилган Рустам Рўзметовга “Ардақлы нураный” кўкрак нишони топширилди. Бу эътироф унинг кўп йиллик самарали меҳнати, эл-юрт хизматидаги фидойилигига берилган муносиб баҳо бўлди.

Рустам Рўзметов меҳнат фаолиятининг илк йилларида туманимиздаги 30-сонли мактабда ўқитувчи бўлиб ишлаган. Кейинчалик туман ижроия қўмитасида фаолият юритган. 1991-1996 йилларда Ўзбекистон Халқ демократик партиясининг Амударё тумани Кенгаши котиби, биринчи котиби лавозимларида, 1996-2004 йилларда эса туман ҳокимлигида ҳокимнинг биринчи ўринбосаригача бўлган лавозимларда сидқидилдан меҳнат қилган. Унинг айниқса “Маҳалла” хайрия жамоат фондининг туман бўлинмаси раиси сифатида маҳаллани аҳолига чинакам хизмат кўрсатувчи халқчил тузилмага айлантириш борасидаги хизматлари алоҳида эътирофга сазовор.

Тадбир давомида, шунингдек, маҳалла ҳаётидаги самарали иштироки, ёш авлодни миллий қадриятлар, одоб-ахлоқ ва ватанпарварлик руҳида тарбиялаш йўлидаги ибратли меҳнати, шунингдек маҳаллада тинчлик, аҳиллик ва тотувликни мустаҳкамлашга қўшаётган муносиб ҳиссаси учун бир гуруҳ нуронийлар туман ҳокимлигининг ташаккурномаси билан тақдирланди.

Тадбир давомида кекса авлод вакилларининг жамият ҳаётидаги ўрни, уларнинг оила ва маҳалладаги ўрнак бўларли фаолияти, тинчлик ва тотувликни мустаҳкамлашдаги ҳиссаси ҳақида ҳам алоҳида сўз юритилди. Қайд этилганидек, нуронийлар — маҳалланинг файзи, хонадонларнинг баракаси, ёшлар учун эса донишманд маслаҳатгўйдир. Шу боис уларга эҳтиром кўрсатиш, ҳолидан хабар олиш, ҳаётий тажрибасидан баҳраманд бўлиш халқимизга хос юксак қадриятлардан биридир.

Шу куни “Нуроний” жамғармаси Қорақалпоғистон Республикаси бўлими раиси Турсунбой Абдижаббаров бошчилигидаги масъуллар туманнинг Беруний маҳалласида истиқомат қилувчи Йўлдош Аллаберганов хонадонида ҳам бўлдилар. У ерда оила раҳбари билан самимий мулоқот ўтказилиб, унинг ҳаёт йўли, меҳнат фаолияти, маҳалла ва туман тараққиётига қўшган ҳиссаси ҳақида илиқ фикрлар билдирилди. Туманнинг ижтимоий-иқтисодий ривожига муносиб ҳисса қўшган Йўлдош Аллабергановга ҳам “Ардақлы нураный” кўкрак нишони топширилди.

Бу эътироф нуронийларнинг кўп йиллик ҳалол меҳнати, эл манфаати йўлидаги хизматлари ҳеч қачон унутилмаслиги, уларнинг ҳаёт йўли бугунги ва эртанги авлод учун ҳамиша ибрат мактаби бўлиб қолишини англатади. Зеро, юрт тараққиёти йўлида фидокорона меҳнат қилган инсонларни қадрлаш — бу жамиятнинг ўз тарихи, ўз қадриятлари ва ўз келажагига бўлган ҳурматидир.

Шунингдек, шу маҳаллада истиқомат қилувчи 97 ёшли нуроний Қувват Абдураҳмонов ҳолидан ҳам хабар олинди. Муборак Рамазон ойи муносабати билан табаррук отахонга байрам совғалари топширилиб, дуолари олинди. Бундай эътибор ва ғамхўрлик нуронийлар қалбидаги мамнуниятни янада ошириши, жамиятда меҳр-оқибат, ҳурмат ва инсонпарварлик муҳитини мустаҳкамлаши билан қимматлидир.

Хулоса ўрнида айтиш жоизки, Амударё туманида ўтказилган “Уч авлод учрашуви” тадбири авлодлар ўртасидаги маънавий кўприкни мустаҳкамлаш, нуронийларнинг бой ҳаёт тажрибасини эътироф этиш ва ёшларни шу руҳда тарбиялашга хизмат қилган муҳим маънавий тадбир бўлди. У нафақат кекса авлодга эҳтиром ифодаси, балки келажак эгалари