ҚАНГЛИ ОВУЛИ: ЯНГИЛАНИШ ВА ЎЗГАРИШЛАР МАСКАНИ

Қангли овули Амударё туманининг энг чекка ҳудудларидан бири бўлиб, аҳолисининг содда ва самимийлиги, меҳнаткашлиги ҳамда янгиликка интилиши билан ном қозонган. Туркманистон Республикасининг Тошҳовуз вилояти, Губадаг тумани билан чегарадош бўлган ушбу овул таркибига Хонжиғоли, Пишкакли, Вахум ёп ва Матар ёп аҳоли пунктлари киради. Ҳудудда жами 57 та кўча ва 628 та хонадон мавжуд бўлиб, 932 та оилада жами 3482 нафар аҳоли истиқомат қилади. Эътиборли жиҳати шундаки, аҳолининг ярмидан кўпи, яъни 1753 нафари 30 ёшгача бўлган ёшлардан иборат.

Миллатлар кесимида овул аҳлининг асосий қисмини ўзбеклар ташкил этса-да, бу ерда қорақалпоқ, туркман, қозоқ, қирғиз ва татар миллатларига мансуб аҳоли вакиллари ҳам тинч-тотув, ҳамжиҳатликда яшаб келмоқда.

Овул аҳлининг 551 нафари пенсионер, 79 нафари ногиронлиги бўлган шахслардир. 58 та кам таъминланган, 8 та боқувчисини йўқотган оилалар, 15 нафар етим болалар эса доимо давлат ва жамият ғамхўрлигида. Овул ҳудудида 1 та мактабгача таълим ташкилоти, 2 та мактаб фаолият юритиб, уларда жами 688 нафар болалар, ўсмирлар ҳамда ёшлар таълим-тарбия олмоқда.

Овулда бандлик ва тадбиркорлик масалалари ҳам масъулларнинг доимий диққат марказида. Корхона ва ташкилотларда 1189 нафар фуқаро меҳнат қилмоқда. Тадбиркорлик билан банд аҳоли сони 329 нафарни ташкил этади. Айниқса, уларнинг 216 нафари чорвачилик, паррандачилик ва асаларичилик йўналишида фаолият олиб бораётгани овул иқтисодиётида аграр тармоқлар устувор ўрин тутишини кўрсатади.

Мавсумий ишлар билан банд фуқаролар 374 нафарни, ўзини ўзи банд қилганлар эса 117 нафарни ташкил этади. Шу билан бирга, 753 нафар ишсиз фуқаро борлиги келгусида овулда янги иш ўринлари яратиш, касбга ўқитиш ва кичик бизнесни қўллаб-қувватлаш бўйича яянада кўпроқ иш олиб бориш зарурлигини кўрсатади. Фуқаролар йиғини раиси раҳбарлигида “Маҳалла еттилиги” аъзолари бу борада самарали ишларни амалга оширмоқдалар.

“Маҳалла еттилиги”нинг амалий ёрдами билан овул ҳудудида янги иш бошлаган дорихона аҳолига тиббий воситалар ва дори-дармонларни ўз вақтида ҳамда қулай шароитда таклиф қилмоқда. Илгари дори воситалари учун узоқ манзилларга боришга мажбур бўлган фуқаролар энди ҳудуднинг ўзида хизматдан фойдаланмоқда. Энг муҳими, янги дорихона очилиши натижасида қўшимча иш ўринлари ҳам яратилди. Бу эса нафақат соғлиқни сақлаш хизматлари сифатини оширишга, балки аҳоли бандлигини таъминлашга ҳам хизмат қилмоқда.

“Жасурбек-Муяссар” МЧЖ эса хизмат кўрсатиш соҳасида самарали фаолият юритиб, аҳолини сифатли озиқ-овқат маҳсулотлари билан таъминлашга муносиб ҳисса қўшиб келмоқда. Айниқса, корхона томонидан тайёрланаётган нон ва нон маҳсулотларига талаб юқори. Маҳсулотларнинг тўйимлилиги, сифатли ундан тайёрланаётгани ва ўзига хос таъми харидорларга манзур бўлмоқда. Энг муҳими, бундай корхоналар ҳудуд иқтисодиёти ривожига, аҳоли бандлигига ва дастурхонлар тўкинлигига хизмат қилаётгани билан аҳамиятлидир.

Ҳудудда яшовчи тадбиркор Анвар Муратов томонидан 2025 йилда икки қаватли тадбиркорлик объектини қуриш ишлари бошланган эди. Айни пайтда ушбу иншоот қуриб битказилиб, фойдаланишга топширилиш арафасида. Режага кўра, мазкур объект жорий йилнинг май ойида ишга туширилади. Янги объектнинг иш бошлаши овул ҳудудида хизмат кўрсатиш ва сервис соҳасининг янада ривожланишига хизмат қилади. Шунингдек, аҳолига турли маиший хизматларни ҳудуднинг ўзида кўрсатиш имконияти яратилади. Бу эса фуқароларга қўшимча қулайлик туғдириб, ҳудуднинг иқтисодий фаоллигини оширишда муҳим аҳамият касб этади.

Қангли овул фуқаролар йиғини маъмурияти ва “Маҳалла еттилиги” томонидан кам таъминланган ҳамда эҳтиёжманд оилаларни қўллаб-қувватлаш борасида ҳам тизимли ишлар амалга оширилмоқда. Айниқса, камбағаликни қисқартириш, оилаларнинг даромад манбаини яратиш ва уларни меҳнатга жалб этишга алоҳида эътибор қаратилмоқда. Овулда яшовчи Гулнора Ражапова камбағалик реестрида тургани боис, унга ҳомийлар томонидан бир сотихлик иссиқхона қуриб берилди. Бугунги кунда мазкур иссиқхона оиланинг барқарор даромад манбаига айланиб, турмуш шароитини яхшилашга хизмат қилмоқда.

Қишлоқ хўжалиги Қангли овули аҳолиси турмушида алоҳида ўрин тутади. Аҳоли ихтиёридаги умумий томорқа майдони 162 гектарни ташкил этиб, 628 та хонадоннинг шахсий томорқаси мавжуд. Шундан 245 та хонадонда қўшимча дала томорқаси бор, 10 та хонадонда эса иссиқхона ташкил этилган. Овулдаги 495 та хонадонда уй ҳайвонлари боқилади. Қолаверса, 519 та оила уй паррандачилиги билан шуғулланиб, жами 34 минг 210 бош парранда парвариш қилинмоқда. 11 та оила асаларичилик билан, 2 та оила эса балиқчилик билан шуғулланади.

Руфат Сапаров чорвачилик бўйича кредит олиб, ушбу соҳа ривожига ҳамда оиласининг моддий фаровонлигига муносиб ҳиссасини қўшмоқда. У келгусида банкдан кредит олиб, фолиятини янада кенгатиришни режалаштирмоқда.

Қангли овулида жами 10 та савдо дўкони, 2 та тўйхона, 4 та умумий овқатланиш шохобчаси, биттадан қишлоқ врачлик пункти ҳамда маданият уйи мавжуд. Аҳолининг яхши кунларида хизмат қилиш мақсадида қанглилик яна бир тадбиркор Шерзод Сапарбаев тўйхона қуриб, яқин кунлар ичида фойдаланишга топшириш арафасида. Энг муҳими, оилавий корхонада 10 та янги иш ўрни яратилиб, овул ёшлари иш билан таъминланди.

Аҳоли турмуш фаровонлиги ва тадбиркорлик ривожи асосан электр энергиясининг узлуксизлигига боғлиқ. Айниқса, “яшил” энергиянинг аҳамияти йил сайин ортиб бормоқда. Шу сабабли давлатимиз томонидан қуёш электр станцияларини қуриш ишлари ҳар томонлама рағбатлантирилмоқда. Қангли овули туманнинг оғир тоифадаги ҳудудларидан бири саналгани боис, овулга давлат томонидан 200 кВт қувватли қуёш панеллари ўрнатилмоқда. Келгусида камбағал оилаларнинг 4 нафар аъзоси бу ерда доимий иш билан таъминланади. Қуёш электр станциясида ишлаб чиқарилган электр энергиясининг сотилишидан тушган даромад эвазига овул ҳудудида бошқа хайрли ишларни молиялаштириш имконияти ҳам яратилади.

Қангли овули туманнинг энг чеккасида жойлашган ҳудуд бўлишига қарамай, бугун бу ерда тараққиёт ва янгиланиш нафаси кезмоқда. Қанглиликлар давлат ва ҳукумат томонидан яратилаётган имкониятлардан унумли фойдаланиб, ғоя ва ташаббусларини лойиҳаларга айлантирмоқда, лойиҳаларни эса ҳаётга татбиқ қилмоқда. Эртанги кунга бўлган ишонч эса уларни янги марралар ва муваффақиятларга етакламоқда.