Қрим-Конго геморрагик иситмаси касаллигига қарши тактик ўқув машқи ўтказилди

Баҳор мавсуми кириб келиши билан чорва молларидан одамларга юқиши мумкин бўлган айрим юқумли касалликлар хавфи ҳам ортиб боради. Айниқса, Қрим-Конго геморрагик иситма касаллиги табиий ўчоқли ва хавфли инфекция сифатида соҳа мутахассислари, тиббиёт ходимлари ҳамда аҳоли эътиборида бўлиши зарур.

Шуларни инобатга олган ҳолда Амударё туманида Қрим-Конго геморрагик иситма касаллигига қарши курашиш бўйича махсус тактик ўқув машқи ўтказилди. Унда туман Санитария-эпидемиологик осойишталик ва жамоат саломатлиги маркази, Тиббиёт бирлашмаси, Фавқулодда вазиятлар бўлими, Ветеринария ва чорвачиликни ривожлантириш бўлими, Ободонлаштириш бошқармаси, Ички ишлар бўлими ходимлари, шунингдек, фуқаролар йиғинлари раислари иштирок этди.

Мазкур тадбирдан кўзланган асосий мақсад — касаллик аниқланган вазиятда мутасадди ташкилотлар ўртасидаги ҳамкорликни янада кучайтириш, тезкор ҳаракат қилиш механизмларини синовдан ўтказиш ва аҳоли хавфсизлигини таъминлашдан иборат бўлди.

Махсус тактик ўқув машқини Амударё тумани Фавқулодда вазиятлар бўлими бошлиғи Зафар Аҳмедов очиб берди. У ўз нутқида Қрим-Конго геморрагик иситма касаллиги қайд этилган тақдирда ҳамкор ташкилотлар билан биргаликда амалга ошириладиган чора-тадбирлар ҳақида атрофлича тушунтириш берди. Таъкидланганидек, бундай ҳолатларда ҳар бир хизматнинг вазифаси аниқ белгилаб олиниши, тезкор ахборот алмашинуви ва мувофиқлаштирилган ҳаракат муҳим аҳамият касб этади.

Ўқув машқининг назарий қисми Амударё тумани Тиббиёт бирлашмаси ходимлари иштирокида ўтказилди. Унда туман Санитария-эпидемиологик осойишталик ва жамоат саломатлиги бўлими эпидемиолог врачи Дурбек Бабажанов сўзга чиқиб, Қрим-Конго геморрагик иситма касаллигининг эпидемиологияси, этиологияси, профилактикаси ҳамда эпидемияга қарши курашиш чора-тадбирлари ҳақида маълумот берди. Шундан сўнг Амударё тумани Ветеринария ва чорвачиликни ривожлантириш бўлими ходими Баҳодир Бекчанов ҳайвонларда ушбу касалликнинг эпизоотик хусусиятлари ва профилактика чоралари тўғрисида сўз юритди.

Тадбир давомида касалликнинг асосий белгилари, унинг олдини олиш ва даволаш чоралари ҳақида ҳам батафсил маълумотлар берилди. Мутахассислар таъкидлаганидек, юқори ҳарорат, умумий ҳолсизлик, бош ва мушак оғриқлари, кўнгил айниши, айрим ҳолларда қон кетиш аломатлари касалликка шубҳа уйғотиши мумкин. Бундай вазиятда ўзбошимчалик билан даволанишга уриниш эмас, балки зудлик билан тиббиёт муассасасига мурожаат қилиш ҳаётни сақлаб қолишда муҳим омилдир.

Назарий қисмдан кейин Боғ маҳалласи ҳудудида амалий машғулотлар ташкил этилди. Унда Қрим-Конго геморрагик иситма касаллиги қайд қилинганида эпидемияга қарши курашиш бўйича амалий ҳаракатлар намойиш этилди. Жумладан, шартли равишда касаллик аломатлари аниқланган ҳолат саҳналаштирилиб, бундай пайтда фавқулодда вазиятлар тизими, тиббиёт, ветеринария ва бошқа хизматларнинг ҳаракатланиш тартиби амалда кўриб чиқилди. Бу эса реал шароитда йўл қўйилиши мумкин бўлган камчиликларни олдиндан аниқлаш ва уларни бартараф этишга хизмат қилиши билан аҳамиятлидир.

Амалий машғулотларда шартли беморни кана чаққан ҳолатда унга кўрсатиладиган биринчи тиббий ёрдам тиббиёт ходимлари томонидан кўргазмали тарзда намойиш қилинди. Ветеринария ва чорвачиликни ривожлантириш бўлими ходимлари эса касаллик ўчоғи сифатида белгиланган хонадон, ҳовли ва чорва моллари сақланадиган жойларда дезинфекция ишларини амалга оширди. Шу орқали касаллик тарқалишининг олдини олишда санитария қоидалари ва дезинфекция тадбирларининг нақадар муҳим экани яна бир бор кўрсатиб берилди.

Мутахассислар аҳолига касалликдан сақланиш бўйича қатор тавсиялар бердилар. Хусусан, чорва моллари ва улар сақланадиган жойларни мунтазам назорат қилиш, канага қарши ишлов бериш, ҳимоя кийимларидан фойдаланиш, танага кана ёпишиб олган ҳолатда уни эҳтиётсизлик билан узиб ташламаслик, балки дарҳол шифокорга мурожаат қилиш зарурлиги уқтирилди. Шунингдек, касаллик аниқланганида биринчи навбатда тиббиёт муассасасига хабар бериш, беморни алоҳидалаштириш ва мутахассислар кўрсатмасига қатъий амал қилиш лозимлиги таъкидланди.

Махсус тактик ўқув машқи сўнгида унда қатнашган барча соҳалар масъуллари ва ходимлари йўл қўйилган камчиликларни муҳокама қилдилар. Қайд этилганидек, бу каби тадбирлар реал вазиятларда фавқулодда ёрдам хизматларининг аниқ, тезкор ва тартибли ҳаракат қилишини таъминлашда муҳим аҳамиятга эга. Энг муҳими, бундай ўқув машқлари аҳоли саломатлигини муҳофаза қилиш, хавфли юқумли касалликлар тарқалишининг олдини олиш ва соҳа идоралари ўртасидаги ҳамкорликни мустаҳкамлашга хизмат қилади.