Маҳалла — жамият таянчи, инсон қадрининг мезони

Амударё туманида жорий йилнинг 22 март куни «Маҳалла тизими ходимлари куни» муносабати тантанали байрам кечаси ташкил этилди. Ушбу тадбир юртимизда маҳалла институтига қаратилаётган юксак эътиборнинг яна бир ёрқин ифодасига айланди. Тумандаги “Diamond” ресторанида ташкил этилган ушбу тадбир нафақат байрамона кайфият, балки эътироф ва эҳтиром уйғунлиги билан ажралиб турди.

Тадбирда туман ҳокими Собир Хўжаметов, туман прокурори Баҳрам Машарипов, ҳоким ўринбосарлари, бўлим ва ташкилотлар раҳбарлари иштирок этиб, маҳалла тизими ходимларини самимий қутладилар. Уларнинг фидокорона меҳнати, халқ билан бир нафасда яшаб, муаммоларни жойида ҳал этишга интилаётган саъй-ҳаракатлари алоҳида эътироф этилди.

Дарҳақиқат, кейинги йилларда мамлакатимизда маҳалла институтини ривожлантириш давлат сиёсатининг устувор йўналишларидан бирига айланди. Ҳурматли Президентимиз раҳнамолигида амалга оширилаётган ислоҳотлар натижасида маҳалла тизими том маънода жамият ва давлат ўртасидаги мустаҳкам кўприкка айланиш йўлида изчил ривожланиб бормоқда. Кам таъминланган оилаларни қўллаб-қувватлаш, ижтимоий муаммоларни аниқлаш ва тезкор бартараф этиш, ёшлар ва хотин-қизлар билан манзилли ишлаш — буларнинг барчаси бугунги маҳалла фаолиятининг ажралмас қисмига айланди.

Сўнгги йилларда қабул қилинган қонун, фармон ва қарорлар маҳалла тизимини тубдан янгилаш, унинг ваколат ва имкониятларини кенгайтиришга хизмат қилмоқда. Бу эса ўз навбатида маҳаллани аҳолининг ишончли суянчи, дардига малҳам бўладиган масканга айлантиришга замин яратмоқда.

Жорий йилнинг “Маҳаллани ривожлантириш ва жамиятни юксалтириш йили” деб эълон қилиниши бу борадаги ислоҳотларнинг мантиқий давоми бўлди. Бу ташаббус маҳалла институтини янада мустаҳкамлаш, унинг жамият ҳаётидаги ўрнини кучайтириш, энг муҳими, инсон қадрини улуғлашга хизмат қилади. Зеро, маҳалла — бу нафақат ҳудудий бирлик, балки меҳр-оқибат, ҳамжиҳатлик ва инсоний қадриятлар мужассам бўлган маскандир.

“Маҳаллани ривожлантириш ва жамиятни юксалтириш йили” доирасида амалга оширилаётган ишлар орқали аҳолининг ижтимоий ҳимоясини кучайтириш, бандликни таъминлаш, муаммоларни жойида ҳал этиш тизими янада такомиллаштирилмоқда. Энг чекка ҳудудларгача кириб бораётган эътибор ва ғамхўрлик эса давлат сиёсатининг марказида инсон манфаатлари турганининг яққол далилидир.

Бугунги кунда маҳалла тизими ходимлари зиммасига юкланган вазифалар ниҳоятда масъулиятли ва шарафлидир. Улар ҳар бир хонадонга кириб бориб, одамларнинг қувончу ташвишларига шерик бўлмоқда, муаммоларни ечишда кўмакчи бўлмоқда. Шу боис уларнинг меҳнати ҳар қанча эътирофга лойиқ.

Тантанали тадбир давомида ўзининг фидойилиги, ташаббускорлиги ва самарали фаолияти билан ажралиб турган бир гуруҳ ходимлар туман ҳокимининг ташаккурномалари ва эсдалик совғалари билан тақдирланди. Бу эса соҳа вакилларига берилган юксак баҳо, уларнинг меҳнатига кўрсатилган эҳтиром ифодаси бўлди.

Байрам кечаси санъат ва маданият ходимлари томонидан тайёрланган концерт дастури билан давом этиб, иштирокчиларга кўтаринки кайфият улашди.

Маҳалла — бу жамиятнинг юраги. Унинг ривожи — юрт тараққиёти, унинг ободлиги — халқ фаровонлигидир.  Унинг мустаҳкамлиги, аввало, унда фаолият олиб бораётган инсонларнинг фидойилиги, ҳалоллиги ва масъулиятига боғлиқ.

Чарос Арслонова, туман ҳокимлигининг Ахборот хизмати раҳбари.