Газ таъминоти барқарорлиги — турмуш фаровонлигининг муҳим омилидир

Аҳоли фаровонлигини таъминлашда энергетика тизимининг барқарорлиги муҳим аҳамият касб этади. Зеро, хонадонлардаги файз ва барака, аввало, уйимиздаги иссиқлик ва ёруғлик билан бевосита боғлиқдир. Айни шу мақсад йўлида "Ҳудудгаз Қорақалпоғистон" газ таъминоти филиалининг "Амударётумангаз" бўлими томонидан тизимли ва изчил ишлар амалга оширилмоқда.

Хусусан, Амударё туманида табиий газ етиб бормаган ҳудудларни суюлтирилган газ билан таъминлаш масаласи алоҳида назоратга олинган бўлиб, бу жараёнда ҳар бир истеъмолчининг манфаати ва хавфсизлиги бош мезон этиб белгиланган.

Бугунги кунда туман бўйича суюлтирилган газ истеъмолчиларининг умумий сони 25 минг 933 тани ташкил этмоқда. Уларнинг асосий қисми, яъни 25 минг 893 таси аҳоли хонадонларидир. Бу кўрсаткич туман аҳолисининг салмоқли қисми айнан мана шу турдаги ёқилғи турига эҳтиёж сезишини ва тизимнинг масъулияти нечоғлик юқори эканлигини кўрсатади.

Географик жиҳатдан кенг ҳудудни қамраб олган Амударё туманида газ таъминотининг логистикаси ва инфратузилмаси ҳам замон талабларига мос равишда шакллантирилган. Айни пайтда туман бўйича жами 38 та овул ва маҳалла тўлиқ суюлтирилган газ истеъмолига мослаштирилган. Ушбу маҳаллаларда истиқомат қилувчи фуқароларга қулайлик яратиш, газ баллонларини ўз вақтида ва сифатли етказиб бериш мақсадида махсус тизим йўлга қўйилган. Хусусан, туман ҳудудида 1 та ихтисослаштирилган сервис маркази ҳамда 7 та тарқатиш шахобчаси фаолият юритмоқда. Мазкур масканлар орқали суюлтирилган газ истеъмолчиларга белгиланган графиклар асосида, тартибли равишда етказиб берилмоқда.

Нафақат суюлтирилган, балки табиий газ билан истеъмолчиларни узлуксиз таъминлаш масаласи ҳам соҳа ходимларининг диққат марказида. Таҳлиллар шуни кўрсатдики, 2024 ва 2025 йилларда келиб тушган мурожаатларнинг асосий қисми айнан табиий газ босимининг пастлиги билан боғлиқ бўлган. Истеъмолчиларнинг ҳақли эътирозларини инобатга олган ҳолда, "Ҳудудгаз Қорақалпоғистон" газ таъминоти филиали томонидан махсус режа ишлаб чиқилди ва туманда кенг кўламли модернизация ишлари бошлаб юборилди.

2024 йилнинг ўзида жами 8,3 километр узунликдаги газ қувурлари янгидан реконструкция қилинди. Ушбу жараёнда туманнинг Чордара, Навоий, Бўстон ва Ойбек номли маҳаллалари ҳамда Ўрта қалъа овули ҳудудларида газ қувурлари ҳалқасимон тарзда янгидан монтаж қилинди. Ушбу мураккаб муҳандислик ечими аҳоли ва улгуржи истеъмолчиларга табиий газни ҳеч қандай узилишларсиз ва бир маромда етказиб бериш имконини яратди. Эндиликда мазкур ҳудудларда қишнинг энг совуқ кунларида ҳам газ босимининг барқарорлиги таъминланмоқда, бу эса юзлаб оилаларнинг мушкулини осон қилди.

Ишлар кўлами жорий йилда ҳам сусайтирилмаган ҳолда давом эттирилмоқда. Белгиланган истиқболли режага мувофиқ, истеъмолчиларга таюбиий газни йўқотишларсиз ва узлуксиз етказиб бериш мақсадида Беруний маҳалласида 1,2 километр узунликдаги янги ўрта босимли газ қувури монтаж қилинди. Шунингдек, Тош ёп маҳалласида йиллар давомида йиғилиб қолган муаммоларга чек қўйилиб, 14,2 километрлик қўшқатор ва тартибсиз ҳолатга келиб қолган газ қувурлари тўлиқ тартибга келтирилди. Нафақат техник созлаш, балки эстетик ташқи кўриниш ва ташқи муҳит таъсиридан ҳимояни таъминлаш мақсадида қувурларни бўяш ишлари ҳам сифатли амалга оширилди. Бу каби тадбирлар тармоқдаги техник йўқотишларни камайтириш билан бирга, хавфсизлик чораларини кучайтиришга хизмат қилади.

Амалга оширилаётган мазкур саъй-ҳаракатларнинг самарадорлигини рақамлар ва аниқ фактлар мисолида яққол кўриш мумкин. Агар эътибор қаратадиган бўлсак, фуқароларнинг давлат органларига бўлган ишончи ва мурожаатлар билан ишлаш маданияти юксалаётган бир даврда, муаммоларнинг жойида ҳал этилиши мурожаатлар сонининг камайишига хизмат қилмоқда. Масалан, 2024 йил давомида Виртуал қабулхона орқали жами 171 та мурожаат келиб тушган бўлса, 2025 йилга келиб бу кўрсаткич 53 тани ташкил этди. Бу эса мурожаатлар сонининг сезиларли даражада, яъни 69 фоизга камайганидан далолат беради. Бундай ижобий натижа, ўз-ўзидан пайдо бўлгани йўқ, балки тизимдаги камчиликларни олдиндан таҳлил қилиш ва уларни бартараф этиш йўлидаги қатъий қадамлар ҳосиласидир.

Жойларда ўтказилаётган сайёр қабулларда аҳоли томонидан билдирилаётган эътирозлар имкон қадар шу жойнинг ўзида бартараф қилинмоқда. Газ таъминотини яхшилаш борасидаги ушбу амалий ишлар шунчаки расмиятчилик учун эмас, балки халқимизнинг розилигини олиш йўлидаги муҳим қадамдир. Тизимли ёндашув ва аниқ ҳисоб-китоб асосида олиб борилаётган ишлар яқин истиқболда ҳудуднинг энергетик хавфсизлигини янги босқичга олиб чиқади. Зеро, соҳа ходимларининг тинимсиз меҳнати ва давлатимиз томонидан яратилаётган имкониятлар бир мақсадга – ҳар бир хонадонда зангори олов ўчмаслигига, ҳар бир юртдошимизнинг турмуши фаровон бўлишига қаратилган. Мақсад аниқ, режалар эса изчиллик билан ҳаётга татбиқ этилмоқда, демак, кўзланган натижаларга албатта эришилади.

М.РАЖАПОВ, “Амударётумангаз” газ таъминоти бўлимининг назорат ва мурожаатлар бўйича етакчи мутахассиси