Тарих нафаси ва замонавий тарғибот: Чилпиқ қалъасидаги халқаро промо-тур

2026 йилда бўлиб ўтадиган футбол бўйича Жаҳон чемпионати арафасида Ўзбекистоннинг халқаро майдондаги ижобий имижини янада мустаҳкамлаш, мамлакатимизнинг бой тарихий-маданий мероси ва бетакрор туристик салоҳиятини кенг тарғиб этиш мақсадида “Uzbekistan Road Trip to World Cup 2026” номли йирик халқаро промо-тур лойиҳаси изчил давом этмоқда.

Мазкур лойиҳа доирасидаги навбатдаги манзил сифатида Чилпиқ қалъаси танлангани бежиз эмас. Қадимий тарих ва сир-синоатларга бой ушбу маскан нафақат археологик ёдгорлик, балки бутун Қорақалпоғистон Республикаси туристик салоҳиятининг ёрқин тимсолидир.

13 апрель куни промо-тур иштирокчилари Чилпиқ қалъасида тантанали равишда кутиб олинди. Миллий руҳ акс этган фольклор жамоаларининг чиқишлари меҳмонларга унутилмас таассуротлар улашди. Қадимий куй-қўшиқлар, миллий рақслар ва анъанавий маросимлар орқали меҳмонлар халқимизнинг бой маданияти ва меҳмондўстлигини чуқур ҳис этишди.

Шундан сўнг, кенг аудиторияга эга блогерлар томонидан Чилпиқ қалъаси ҳақида турли форматдаги медиа-контентлар — видеороликлар, фотожамланмалар, ҳикоя ва репортажлар тайёрланди. Ушбу контентлар халқаро ижтимоий тармоқлар орқали тарқатилиб, Ўзбекистоннинг туристик жозибадорлигини намоён этишга хизмат қилмоқда.

Тадбир давомида ҳудуд ёшлари ҳам фаол иштирок этиб, аждодларимиздан мерос бўлиб қолган тарихий обидалар, қадимий урф-одатлар ва миллий қадриятлар ҳақида янги билимларга эга бўлишди. Бу эса ёш авлоднинг миллий ўзликни англаш, тарихга ҳурмат руҳида тарбияланишида муҳим аҳамият касб этади.

Промо-тур дастурига кўра, иштирокчилар Тахтакўпир туманидаги Қаратерен туристик мажмуаси ҳамда Тахтобе туристик мажмуасига ҳам ташриф буюришлари режалаштирилган. Ушбу масканлар ўзининг табиий гўзаллиги, экологик тозалиги ва ўзига хос ландшафтлари билан сайёҳларни ўзига ром этади.

Бугунги кунда ички туризмни ривожлантириш давлат сиёсатининг устувор йўналишларидан бири ҳисобланади. Айниқса, Қорақалпоғистон каби тарихий масканларга бой ҳудудларда туризм инфратузилмасини ривожлантириш, янги йўналишларни очиш, хизматлар сифатини ошириш орқали нафақат хорижий сайёҳларни, балки маҳаллий туристларни ҳам жалб этиш мумкин.

Ички туризмнинг ривожланиши ҳудудий иқтисодиётнинг жонланишига, янги иш ўринларининг яратилишига, миллий ҳунармандчилик ва хизмат кўрсатиш соҳаларининг кенгайишига хизмат қилади. Шу нуқтаи назардан, “Uzbekistan Road Trip to World Cup 2026” каби лойиҳалар нафақат халқаро имижни мустаҳкамлаш, балки ички туризмни рағбатлантиришда ҳам муҳим платформа вазифасини ўтамоқда.

Чилпиқ қалъасида ўтказилган мазкур тадбир яна бир бор шуни кўрсатдики, Ўзбекистон — бу нафақат бой тарих, балки замонавий туризм имкониятлари мужассам бўлган мамлакатдир. Қорақалпоғистоннинг бетакрор табиати, сирли тарихий обидалари ва самимий инсонлари эса уни алоҳида жозибадор масканга айлантиради.

Бундай ташаббуслар орқали Ўзбекистоннинг туристик салоҳияти дунё миқёсида тобора кенг танилиб бораверади.

Чарос Арслонова, туман ҳокимлигининг Ахборот хизмати раҳбари.