Tarix nafasi va zamonaviy targʻibot: Chilpiq qalʼasidagi xalqaro promo-tur

2026-yilda boʻlib oʻtadigan futbol boʻyicha Jahon chempionati arafasida Oʻzbekistonning xalqaro maydondagi ijobiy imijini yanada mustahkamlash, mamlakatimizning boy tarixiy-madaniy merosi va betakror turistik salohiyatini keng targʻib etish maqsadida “Uzbekistan Road Trip to World Cup 2026” nomli yirik xalqaro promo-tur loyihasi izchil davom etmoqda.

Mazkur loyiha doirasidagi navbatdagi manzil sifatida Chilpiq qalʼasi tanlangani bejiz emas. Qadimiy tarix va sir-sinoatlarga boy ushbu maskan nafaqat arxeologik yodgorlik, balki butun Qoraqalpogʻiston Respublikasi turistik salohiyatining yorqin timsolidir.

13-aprel kuni promo-tur ishtirokchilari Chilpiq qalʼasida tantanali ravishda kutib olindi. Milliy ruh aks etgan folklor jamoalarining chiqishlari mehmonlarga unutilmas taassurotlar ulashdi. Qadimiy kuy-qoʻshiqlar, milliy raqslar va anʼanaviy marosimlar orqali mehmonlar xalqimizning boy madaniyati va mehmondoʻstligini chuqur his etishdi.

Shundan soʻng, keng auditoriyaga ega blogerlar tomonidan Chilpiq qalʼasi haqida turli formatdagi media-kontentlar — videoroliklar, fotojamlanmalar, hikoya va reportajlar tayyorlandi. Ushbu kontentlar xalqaro ijtimoiy tarmoqlar orqali tarqatilib, Oʻzbekistonning turistik jozibadorligini namoyon etishga xizmat qilmoqda.

Tadbir davomida hudud yoshlari ham faol ishtirok etib, ajdodlarimizdan meros boʻlib qolgan tarixiy obidalar, qadimiy urf-odatlar va milliy qadriyatlar haqida yangi bilimlarga ega boʻlishdi. Bu esa yosh avlodning milliy oʻzlikni anglash, tarixga hurmat ruhida tarbiyalanishida muhim ahamiyat kasb etadi.

Promo-tur dasturiga koʻra, ishtirokchilar Taxtakoʻpir tumanidagi Qarateren turistik majmuasi hamda Taxtobe turistik majmuasiga ham tashrif buyurishlari rejalashtirilgan. Ushbu maskanlar oʻzining tabiiy goʻzalligi, ekologik tozaligi va oʻziga xos landshaftlari bilan sayyohlarni oʻziga rom etadi.

Bugungi kunda ichki turizmni rivojlantirish davlat siyosatining ustuvor yoʻnalishlaridan biri hisoblanadi. Ayniqsa, Qoraqalpogʻiston kabi tarixiy maskanlarga boy hududlarda turizm infratuzilmasini rivojlantirish, yangi yoʻnalishlarni ochish, xizmatlar sifatini oshirish orqali nafaqat xorijiy sayyohlarni, balki mahalliy turistlarni ham jalb etish mumkin.

Ichki turizmning rivojlanishi hududiy iqtisodiyotning jonlanishiga, yangi ish oʻrinlarining yaratilishiga, milliy hunarmandchilik va xizmat koʻrsatish sohalarining kengayishiga xizmat qiladi. Shu nuqtai nazardan, “Uzbekistan Road Trip to World Cup 2026” kabi loyihalar nafaqat xalqaro imijni mustahkamlash, balki ichki turizmni ragʻbatlantirishda ham muhim platforma vazifasini oʻtamoqda.

Chilpiq qalʼasida oʻtkazilgan mazkur tadbir yana bir bor shuni koʻrsatdiki, Oʻzbekiston — bu nafaqat boy tarix, balki zamonaviy turizm imkoniyatlari mujassam boʻlgan mamlakatdir. Qoraqalpogʻistonning betakror tabiati, sirli tarixiy obidalari va samimiy insonlari esa uni alohida jozibador maskanga aylantiradi.

Bunday tashabbuslar orqali Oʻzbekistonning turistik salohiyati dunyo miqyosida tobora keng tanilib boraveradi.

Charos Arslonova, tuman hokimligining Axborot xizmati rahbari.