“Адлия сайли” ва “Ёшлар сайли” тадбирлари ўтказилди

Бугунги кунда жамият тараққиёти, аввало, аҳолининг ҳуқуқий онги, фуқаролик масъулияти ва ёшларнинг фаоллиги билан чамбарчас боғлиқ. Шу маънода, Адлия вазирлиги ташаббуси билан ташкил этилган “Адлия сайли” ҳамда “Ёшлар сайли” тадбирлари нафақат ҳуқуқий-маърифий лойиҳа, балки халқ билан очиқ мулоқот, ёшларни қўллаб-қувватлаш ва жамиятда соғлом муҳитни мустаҳкамлашга хизмат қилувчи муҳим платформага айланди.

Мазкур тадбирлар аҳолининг барча қатламларини қамраб олгани билан аҳамиятлидир. Айниқса, ёшларнинг ҳуқуқий билимини ошириш, уларни Ватанга садоқат, қонунга ҳурмат ва фаол фуқаролик руҳида тарбиялаш масалаларига алоҳида эътибор қаратилди. Тадбир давомида Адлия вазирлиги масъуллари ҳамда туман ҳокими Собир Хўжаметов сўзга чиқиб, мамлакатимизда амалга оширилаётган ҳуқуқий ислоҳотлар, аҳолига яратилаётган имкониятлар ҳамда ёшларнинг жамиятдаги ўрни ҳақида фикр билдирди. Шунингдек, фуқароларнинг ҳуқуқий маданиятини юксалтириш ва давлат хизматларини халқчил тизим асосида ташкил этиш бугунги куннинг устувор вазифаларидан бири экани таъкидланди.

Тадбир доирасида ўтказилган “Саломатлик учун беш минг қадам” оммавий юриш акцияси соғлом турмуш тарзини тарғиб қилиш, аҳоли ўртасида жисмоний фаолликни ошириш ҳамда бирдамлик муҳитини мустаҳкамлашга хизмат қилди. Спорт мусобақалари эса ёшларни чиниқиш, иродали бўлиш ва жамоавий ҳамжиҳатлик руҳида тарбиялашга қаратилгани билан эътиборга сазовор бўлди.

Шунингдек, ҳарбий-ватанпарварлик руҳидаги кўргазмали чиқишлар ёшларда миллий ғурур ва Ватанга муҳаббат туйғуларини янада кучайтирди. Ҳарбий техника ва махсус воситалар намойиши, ватанпарварлик мавзусидаги чиқишлар тадбир иштирокчиларида катта қизиқиш уйғотди.

Сайл давомида ташкил этилган миллий ҳунармандчилик, китоб ва маҳсулотлар ярмаркалари эса миллий қадриятларимизни тарғиб қилиш, ёшларни китобхонликка жалб этиш ва тадбиркорлик фаолиятини қўллаб-қувватлашга хизмат қилди. Кўргазмалар ҳамда маданий дастурлар тадбирга ўзгача руҳ ва файз бағишлади.

Айниқса, фуқаролар мурожаатлари юзасидан ташкил этилган сайёр қабуллар тадбирнинг энг муҳим жиҳатларидан бири бўлди. Мутасадди ташкилотлар вакиллари томонидан аҳолининг мурожаат ва таклифлари тингланиб, мавжуд муаммоларни ҳал этиш юзасидан амалий ёрдамлар кўрсатилди. Бу эса давлат идоралари ва халқ ўртасидаги очиқ мулоқотни мустаҳкамлашда муҳим аҳамият касб этди.

Бугунги глобаллашув даврида ҳуқуқий саводхонликни ошириш, ёшларни турли ёт ғоялардан асраш ҳамда уларнинг бўш вақтини мазмунли ташкил этиш долзарб вазифалардан бири ҳисобланади. “Адлия сайли” ва “Ёшлар сайли” ана шу мақсадларни амалга оширишда муҳим ижтимоий лойиҳа сифатида намоён бўлди.

Бир сўз билан айтганда, мазкур тадбирлар аҳолига ҳуқуқий ахборотни етказиш, давлат хизматларини халқчил ва қулай шаклда тақдим этиш, ёшларнинг жамиятдаги фаоллигини ошириш ҳамда жамиятда қонунга ҳурмат руҳини мустаҳкамлашга хизмат қилмоқда. Энг муҳими, бундай лойиҳалар инсон манфаатлари устувор бўлган янги Ўзбекистон тараққиётида муҳим ўрин тутади.

Чарос Арслонова, туман ҳокимлигининг Ахборот хизмати раҳбари.