Халқ депутатлари Амударё туман Кенгашининг ўн иккинчи сессияси тўғрисида АХБОРОТ

2015 йил 28 декабрь куни халқ депутатлари Амударё туман Кенгашининг ўн иккинчи сессияси бўлиб ўтди.

Сессияни халқ депутатлари Амударё туман Кенгаши Регламентининг 16-моддасига мувофиқ, туман ҳокими топшириғига биноан депутат Р.Ўрозбоев очди ва олиб борди.

Сессияда туман Кенгаши депутатлари, ҳоким ўринбосарлари, ҳокимлик масъул ходимлари, ҳуқуқ-тартибот органлари, бўлимлар раҳбарлари, жамоат ташкилотлари, тижорат банклари раҳбарлари ҳамда оммавий ахборот воситалари вакиллари иштирок этдилар.

Сессия котиблигига 29-"Қангли” сайлов округидан депутат З.Сапарова сайланди.

Сессия кун тартибига "Амударё тумани маҳаллий бюджетининг 2016 йилги асосий кўрсаткичлари тўғрисида”ги, "2015 йил "Кексаларни эъзозлаш йили” дастурининг 2015 йилдаги ижроси тўғрисида”ги, "Амударё туманида 2015 йил иш ўринларини яратиш ва аҳоли бандлигини таъминлаш дастурининг ижроси ва 2016 йилги Дастури лойиҳаси тўғрисида”ги ва "Амударё туманида 2016 йил ҳосилига замин яратиш, барча қишлоқ хўжалиги ерларидан самарали фойдаланиш, қишлоқ хўжалигида тўлов интизомини мустаҳкамлаш ҳамда фермер хўжаликларининг ер участкаларини мақбуллаштириш бўйича амалга оширилган ишлар тўғрисида”ги масалалар ҳавола қилинди.

Кун тартибидаги биринчи масала юзасидан туман молия бўлими мудири А.Абдижалиев сўзга чиқиб, Амударё тумани маҳаллий бюджетининг 2016 йилги асосий кўрсаткичларини депутатлар эътиборига ҳавола қилди.

Кун тартибидаги иккинчи масала бўйича туман ҳокимининг ўринбосари,  хотин-қизлар қўмитаси раиси М.Аҳмедова маъруза қилди.

Таъкидланганидек, жорий йил давомида "Кексаларни эъзозлаш йили” туман дастурини амалга ошириш борасида барча манбалар ҳисобидан 18 млрд. 490 млн. 400 минг сўм, 88 минг 50 АҚШ доллари миқдорида маблағ сарфланиб, кенг кўламли ишлар амалга оширилди. Депутатлар якунига етаётган йилда дастур доирасида амалга оширилган ишларга юксак баҳо бердилар.

Кун тартибидаги учинчи масала, яъни Амударё туманида 2015 йил иш ўринларини яратиш ва аҳоли бандлигини таъминлаш дастурининг ижроси ва 2016 йилги Дастур лойиҳаси тўғрисида туман ҳокимининг ўринбосари М.Темирбоев маъруза қилди.

Маърузада таъкидланганидек, 2015 йилда барча йўналишлар бўйича 5321 та янги иш ўринлари яратилди. Келгуси йилда 4814 та иш ўринларини яратиш бўйича дастур тасдиқланди.

Кун тартибидаги тўртинчи масала юзасидан туман қишлоқ ва сув хўжалиги бўлими бошлиғи А.Йўлдошев сўзга чиқиб, 2016 йил ҳосилига замин яратиш, қишлоқ хўжалиги ерларидан самарали фойдаланиш, қишлоқ хўжалигида тўлов интизомини мустаҳкамлаш ҳамда фермер хўжаликларининг ер участкаларини мақбуллаштириш бўйича амалга оширилган ишлар тўғрисида ахборот берди.

Шунингдек, сессияда туман ҳокимининг айрим қарорларини тасдиқлаш масаласи ҳам кўриб чиқилди.

Туман Кенгаши депутатлари, кун тартибидаги масалаларга алоқадор муассаса, корхона ва ташкилотлар раҳбарлари музокараларда иштирок этиб, ўз фикр ва мулоҳазаларини билдирдилар.

Сессия кун тартибидаги барча масалалар бўйича тегишли қарорлар қабул қилинди ва шунинг билан сессия ўз ишини якунлади.