Xalq deputatlari Amudaryo tuman Kengashining oʻn ikkinchi sessiyasi toʻgʻrisida AXBOROT

2015-yil 28-dekabr kuni xalq deputatlari Amudaryo tuman Kengashining oʻn ikkinchi sessiyasi boʻlib oʻtdi.

Sessiyani xalq deputatlari Amudaryo tuman Kengashi Reglamentining 16-moddasiga muvofiq, tuman hokimi topshirigʻiga binoan deputat R.Oʻrozboyev ochdi va olib bordi.

Sessiyada tuman Kengashi deputatlari, hokim oʻrinbosarlari, hokimlik masʼul xodimlari, huquq-tartibot organlari, boʻlimlar rahbarlari, jamoat tashkilotlari, tijorat banklari rahbarlari hamda ommaviy axborot vositalari vakillari ishtirok etdilar.

Sessiya kotibligiga 29-"Qangli” saylov okrugidan deputat Z.Saparova saylandi.

Sessiya kun tartibiga "Amudaryo tumani mahalliy byudjetining 2016-yilgi asosiy koʻrsatkichlari toʻgʻrisida”gi, "2015-yil "Keksalarni eʼzozlash yili” dasturining 2015-yildagi ijrosi toʻgʻrisida”gi, "Amudaryo tumanida 2015-yil ish oʻrinlarini yaratish va aholi bandligini taʼminlash dasturining ijrosi va 2016-yilgi Dasturi loyihasi toʻgʻrisida”gi va "Amudaryo tumanida 2016-yil hosiliga zamin yaratish, barcha qishloq xoʻjaligi yerlaridan samarali foydalanish, qishloq xoʻjaligida toʻlov intizomini mustahkamlash hamda fermer xoʻjaliklarining yer uchastkalarini maqbullashtirish boʻyicha amalga oshirilgan ishlar toʻgʻrisida”gi masalalar havola qilindi.

Kun tartibidagi birinchi masala yuzasidan tuman moliya boʻlimi mudiri A.Abdijaliyev soʻzga chiqib, Amudaryo tumani mahalliy byudjetining 2016-yilgi asosiy koʻrsatkichlarini deputatlar eʼtiboriga havola qildi.

Kun tartibidagi ikkinchi masala boʻyicha tuman hokimining oʻrinbosari,  xotin-qizlar qoʻmitasi raisi M.Ahmedova maʼruza qildi.

Taʼkidlanganidek, joriy yil davomida "Keksalarni eʼzozlash yili” tuman dasturini amalga oshirish borasida barcha manbalar hisobidan 18 mlrd. 490 mln. 400 ming soʻm, 88 ming 50 AQSh dollari miqdorida mablagʻ sarflanib, keng koʻlamli ishlar amalga oshirildi. Deputatlar yakuniga yetayotgan yilda dastur doirasida amalga oshirilgan ishlarga yuksak baho berdilar.

Kun tartibidagi uchinchi masala, yaʼni Amudaryo tumanida 2015-yil ish oʻrinlarini yaratish va aholi bandligini taʼminlash dasturining ijrosi va 2016-yilgi Dastur loyihasi toʻgʻrisida tuman hokimining oʻrinbosari M.Temirboyev maʼruza qildi.

Maʼruzada taʼkidlanganidek, 2015-yilda barcha yoʻnalishlar boʻyicha 5321 ta yangi ish oʻrinlari yaratildi. Kelgusi yilda 4814 ta ish oʻrinlarini yaratish boʻyicha dastur tasdiqlandi.

Kun tartibidagi toʻrtinchi masala yuzasidan tuman qishloq va suv xoʻjaligi boʻlimi boshligʻi A.Yoʻldoshev soʻzga chiqib, 2016-yil hosiliga zamin yaratish, qishloq xoʻjaligi yerlaridan samarali foydalanish, qishloq xoʻjaligida toʻlov intizomini mustahkamlash hamda fermer xoʻjaliklarining yer uchastkalarini maqbullashtirish boʻyicha amalga oshirilgan ishlar toʻgʻrisida axborot berdi.

Shuningdek, sessiyada tuman hokimining ayrim qarorlarini tasdiqlash masalasi ham koʻrib chiqildi.

Tuman Kengashi deputatlari, kun tartibidagi masalalarga aloqador muassasa, korxona va tashkilotlar rahbarlari muzokaralarda ishtirok etib, oʻz fikr va mulohazalarini bildirdilar.

Sessiya kun tartibidagi barcha masalalar boʻyicha tegishli qarorlar qabul qilindi va shuning bilan sessiya oʻz ishini yakunladi.