“Обод турмуш йили“ янгиликлари

ФУҚАРОЛАР ЙИҒИНЛАРИ ХОДИМЛАРИ УЧУН СЕМИНАР

13-15 май кунлари туманимизда фуқаролар йиғини раиси (оқсоқоли), масъул котиби, йиғиннинг диний-маърифат ва маънавий-аҳлоқий тарбия масалалари бўйича маслаҳатчиси, «Маҳалла посбони» жамоатчилик тузилмаси раҳбарларининг малакасини ошириш бўйича ўқув-семинари бўлиб ўтди. Семинарда тумандаги 47 та фуқаролар йиғинларининг раислари, масъул котиблари, йиғиннинг диний-маърифат ва маънавий-аҳлоқий тарбия масалалари бўйича маслаҳатчилари, «Маҳалла посбони» жамоатчилик тузилмаси раҳбарларидан иборат жами 202 нафар ходим иштирок этди.

3 кун давом этган ушбу семинар ўзини-ўзи бошқариш органларининг келгусидаги фаолияти янада яхшиланишига, шу орқали ҳудудларда ижтимоий-иқтисодий юксалишнинг ўсишига замин яратади.

ҒАМХЎРЛИК ИФОДАСИ

Туман бандликка кўмаклашиш ва аҳолини ижтимоий муҳофаза қилиш Маркази томонидан ўзгалар парваришига муҳтож якка-ёлғиз кишилар ва ногиронларга Президентимиз қарор ва фармонларига мувофиқ доимо ғамхўрлик кўрсатиб келинмоқда.

Шу йилнинг биринчи чораги давомида 143 нафар якка-ёлғиз кишилар ва ногиронлар диспансер кўригидан ўтказилди. Кўрик натижаси бўйича уларнинг ҳаммаси стационар ва амбулатор шароитларида соғломлаштирилди.

Ёлғизларга ижтимоий хизмат кўрсатиш мақсадида 11 миллион 551 минг сўм пул сарфланди, улардан 43 нафарига 3 миллион 225 минг сўмлик моддий ёрдам кўрсатилди, кексалар, пенсионерлар ва ногиронлардан 23 нафарига сиҳатгоҳларга йўлланмалар берилди.

Ўзгаларнинг парваришига муҳтож 125 нафар якка-ёлғиз пенсионерларга 9 хил озиқ-овқат маҳсулотлари ва кир ювиш воситалари ҳар ойда белгиланган миқдорда бепул етказиб берилмоқда.

НОҚОНУНИЙ УСКУНА УЧУН ЖАРИМА

Туман ички ишлар бўлими ҳузуридаги ёнғин хавфсизлиги бўлинмаси ходимлари томонидан туманимиз хонадонларида ёнғин хавфсизлигини таъминлаш мақсадида ОФЙ ва МФЙлар ҳузуридаги профилактика нозирлари, "Шимолгазтаъминот” унитар корхонасининг Амударё тумангаз филиали ходимлари томонидан тез-тез рейдлар ўтказилиб, ёнғин хавфсизлигига қарши аҳоли ўртасида тушунтиришлар олиб борилади.

Яқинда ана шундай рейдлар натижасида туманимизнинг турли ҳудудларида яшовчи 11 нафар киши ўз хонадонларида табиий газ тармоғига ноқонуний равишда тақиқланган газ сўрувчи ускуналарни ўрнатиб қўйганликлари учун жаримага тортилди.

ХАЛҚАРО ОИЛА КУНИ БАЙРАМ ҚИЛИНДИ

"Чойкўл” овулининг 2-маҳалласи қардош Туркманистон Республикаси билан чегара ҳудудда жойлашганлиги боис, маҳалла қўмитаси раиси Қ.Эрназаров маҳалла фаоллари билан тез-тез хонадонларга ташриф буюриб, аҳоли турмуш тарзидан воқиф бўлиб туради.

- 15 май – Халқаро оила куни муносабати билан маҳаллада истиқомат қилувчи туркман, қозоқ, қорақалпоқ, ўзбек оилалари ўз фарзандлари, қўни-қўшнилари билан бу кунни муносиб нишонлашди, - дейди Қ.Эрназаров.

Маҳалладаги Қурол Қурбонбоевнинг оиласи қозоқ, Собир Гурбанов оиласи туркман, Лья опа оиласи украин, Абдулла Собиров оиласи бошқирд, Розия момо оиласи эса татар миллатларига мансуб фуқаролардан иборат аҳил-иноқ оилалардир. Қозоқ миллатига мансуб Қурол Қурбонбоев оиласида 15 май – Халқаро оила куни кенг нишонланди.

- Мен ва фарзандларим учун бу кун қўшалоқ байрам, - дейди у қувонч билан. – Чунки бу сана менинг таваллуд куним, қолаверса, байналмилал оиламизнинг байрами. – Илоҳим, аҳил, иноқ, бағрикенг оилаларимиз кўп бўлсин.

ОИЛАВИЙ ТАДБИРКОРЛИК ТУФАЙЛИ

Манғит шаҳрининг Беруний номли маҳалласида яшовчи Собир Полвонов оилавий тадбиркорликка қўл уриб, кам бўлмади. Ишни майда-чуйда дурадгорлик анжомларини ясашдан бошлаган Собир Полвонов қисқа вақт ичида янги оилалар учун ихчам сандиқлар, хонтахта, дераза ва эшик ромлари, диван-кроватлар ясашни ўзлаштириб, элдошлари олқишига сазовор бўлди. Энг муҳими, ўғли Давронбек ҳам ишли бўлди, ҳам малакали дурадгор-уста даражасига эришди. Оила даромади ошиб, турмуши фаровонлашди.

- Меҳнатдан келса бойлик – турмуш бўлар чиройлик, - дейди у мамнуният билан.