АЖДОДЛАР ХОТИРАСИ – КЕЛАЖАК ПОЙДЕВОРИ

Эзгулик йўлида қилинган меҳнат ҳамиша қадрланади ва эъзоз топади. Мамлакатимизда миллий қадрият даражасига кўтарилган кексаларга ҳурмат-эҳтиром кўрсатишдек эзгу анъана яқинда юртимизда кенг нишонланган Хотира ва Қадрлаш кунида янада яққолроқ намоён бўлди.

Муҳтарам Президентимиз байрам арафасида пойтахтимиздаги Хотира майдонида оммавий ахборот воситалари вакиллари билан суҳбатда бундан 17 йил олдин мамлакатимизда 9 май санасини Хотира ва Қадрлаш куни деб эълон қилиб, ҳудудларимизда Хотира майдонлари барпо этилганини, хотира ва қадрлаш деган бир-бирини тўлдирадиган тушунча айни шу номда ўзининг ёрқин ифодасини топганини алоҳида эътироф қилиб ўтди.

Дарҳақиқат, юртимизда эл фаровонлиги, юрт тинчлиги йўлида заҳмат чеккан инсоннинг қадри ҳамиша баланд бўлган ва бундай меҳнат, айтиш жоизки, айни кунда ҳам рағбат ва эътибор топмоқда. Бу - халқимизнинг асрлар оша шаклланган фазилатларининг амалдаги ифодасидир. Зотан, Президентимиз таъкидлаганидек, бизга тинчлик керак, омонлик керак.

Шу маънода, халқаро ҳамжамият томонидан кенг эътироф этилаётган ҳужжат, яъни «Ўзбекистон Республикасининг ташқи сиёсий фаолият концепциясини тасдиқлаш тўғрисида»ги Қонун нормаларининг ҳаётга изчил татбиқ этилаётгани муҳим аҳамият касб этмоқда.

Мазкур ҳужжатда Ўзбекистоннинг турли ҳарбий-сиёсий блок ва альянсларга қўшилмаслиги, ўзининг суверенитети ва ҳудудий яхлитлигини ҳимоя қилиш бўйича қатъий позициясига эга экани, ўз ҳудудида хорижий давлатларнинг ҳарбий базалари жойлаштирилишига йўл қўймаслиги, мустақил, изчил ва фаол ташқи сиёсат олиб бориши ҳақидаги принциплар қатъий мустаҳкамлаб қўйилган. Давлатимиз раҳбари буни бугунги мураккаб вазиятда ўзимиз учун маъқул ва тўғри йўл эканини яна бир бор таъкидлаб ўтди.

Бинобарин, бугун ён атрофимизда, умуман дунёда авж олаётган қарама-қаршиликлар, экстремизм, терроризм каби иллатлар таҳдиди тобора кучайиб бораётган бир шароитда бир нарсани фахр ва ифтихор билан айтишимиз мумкинки, Ўзбекистонда тинч ва осуда ҳаёт ҳукм сурмоқда. Юртимизнинг барча гўшасида улкан бунёдкорлик ишлари амалга оширилмоқда. Халқимизнинг дунёқараши юксалиб бораяпти, ҳаётга қараши ўзгараяпти. Янгича фикрлайдиган, юксак салоҳиятга эга бўлган ёш авлод вояга етмоқда. Албатта, буларнинг барчаси юртимизда тинчлик, осойишталик ҳукм сураётганининг амалий тасдиғидир.

Журналистлар билан мулоқот чоғида Юртбошимиз ёшларга қарата, эртанги кун бизники, марра бизники, деб бежизга таъкидламадилар. Зеро, мамлакатимизнинг дунёдаги энг тараққий топган давлатлардан, эркин ва озод яшаётган халқлардан асло кам бўлмаслиги эртанги кунимиз эгаларига бўлган катта ишончда яққол намоён бўлмоқда.

Бу борада эса биз депутатлар, Президентимиз томонидан илгари сурилган ғояларни ҳаётга татбиқ этиш, давлатимизнинг дунёда тинчлик ўрнатиш ва барқарорликни таъминлашдаги ташаббус ва сиёсатини қўллаб-қувватлаб, унинг амалий ижроси бўйича олиб борилаётган ишларда фаол иштирок этишимиз лозим. Зеро, бугунги кунда ватанимизни янада обод қилиш, ҳаётимизни юксалтириш, энг муҳими, ён-атрофимизда рўй бераётган воқеаҳодисаларга дахлдорлик ҳисси билан яшаш талаб этилаётган экан, бунга ҳар биримиз масъулият билан ёндашишимиз мақсадга мувофиқдир.

Жолдасбай Абдижамилов,Олий Мажлис Қонунчилик палатаси депутати, ЎзМТДП фракцияси аъзоси.

(Фото - http://muxlis.uz)