МУРОЖААТНИ ҚЎЛЛАБ-ҚУВВАТЛАЙМИЗ
Барчамиз ҳам эл фарзандларимиз. Шундай экан, шу эл учун, шу Ватан учун хизмат қилиб унинг равнақи, фаровон ва обод бўлиши йўлида меҳнат қилмоқдамиз, таълим-тарбия ишларини давр талаблари даражасида олиб бориб, ёшларимизнинг баркамол авлод бўлиб етишишлари учун жон куйдирмоқдамиз. Қолаверса ўқувчи-ёшларнинг маънавий-ахлоқий жиҳатдан юксак, чуқур билимли ва интеллектуал салоҳиятли, жисмонан эса соғлом ҳамда чиниққан бўлишлари йўлида бутун куч-ғайратимизни, билимимиз ва педагогик маҳоратимизни сарфламоқдамиз. Зотан, бугунги ёш авлод келажагимиз эгалари бўлиб етишиб, бизнинг эзгу ишларимизни давом эттирадилар.
Мактабимиз "Бўзёп” овули марказида жойлашган етакчи билим масканларидан биридир. 402 нафар ўқувчиларга 70 нафар билимдон ва малакали ўқитувчилар таълим-тарбия бермоқдалар. Синфхоналарда ҳар бир дарс машғулотлари янги педтехнология усуллари асосида қизиқарли ва мазмунли ўтказилмоқда. Натижада ўқувчиларимизнинг фанлардан ўзлаштиришлари талаб даражасида бўлмоқда. Уларнинг "Фанлар олимпиадаси” ва "Билимлар беллашуви” каби интеллектуал кўриклардаги иштироклари йилдан йилга фаоллашмоқда. Мана 2012-2013 ўқув йили ҳам якунланиш арафасида турибди. Фикримча, ўқув йили мактабимизда яхши якунланмоқда. Иккита битирувчи синф – "9А” ва "9Б” синфларидаги 51 нафар ўқувчиларнинг касб танлаш бўйича ўз фикр-мулоҳазалари, қизиққан касб-ҳунарлари бор. Уларни навбатдаги билим олиш босқичига тайёрлаш юзасидан амалий ишлар қилинди ва касб-ҳунар коллежларида ҳамда Манғит шаҳридаги Академик лицейда ўқишни давом эттириш имкониятлари яратилди.
Бизнинг мактабимиз ўқувчилари ва ўқитувчилари аҳил жамоа ҳисобланади. Ўқувчи-ёшларимиз ўз ўқитувчиларини жонкуяр, фидойи устоз деб билишади. Ҳар куни мактаб бўсағасида ва синфхоналарда "Ассалому алайкум” деган муборак калом билан кутиб олишади ва дарс машғулотларида устоз-ўқитувчиларнинг ҳар бир сўзини жон қулоқлари билан тинглашади. Мана шундай аҳиллик ва ҳамжиҳатлик мактабни, ҳар бир синфхонани ва мактаб теварак атрофларини озода ҳамда саранжом-саришта тутишда, синфхоналарни табиий гуллар билан безатишда, мактаб атрофини кўкаламзор қилишда-ям яққол кўзга ташланмоқда. Бу йил эрта баҳордан мактаб атрофидаги дов-дарахтларга шакл бериш, тубларини оҳаклаш, янгидан 550 туп манзарали ва мевали дарахт кўчатларини ўтқазиш ишлари амалга оширилди. Мактабнинг олд қисмидаги майдончани кичик гулзорга айлантирдик. Анвойи гулларни кўриб баҳри дилингиз очилиб яйрайди, чарчоғингиз чиқади.
Ўқитувчиларимиз ва ўқувчиларимиз фақат мактабни ободонлаштириш ва кўкаламзорлаштириш билангина чекланиб қолмай, ўз уйлари ва хонадонларини, кўчалари ва маҳаллаларини янада сўлим ва янада кўркам қилишга ўз ҳиссаларини қўшмоқдалар. Томорқа ерларида сабзавот, полиз, дуккакли ва бошоқли экинлар экиб парваришлашга ёрдам бермоқдалар.
"Тараққиёт кўзгуси" газетасининг олдинги сонида эълон қилинган мурожаатни ўқиб, барчамиз шу эркин ва обод Ватаннинг гуллаб-яшнашига ҳисса қўшишимиз лозимлигини яна бир бор чуқур ҳис қилдик ва юртимизнинг янада равнақ топишига ўз ҳиссамизни қўшишга ахд қилдик. Негаки, эл-юрт фарзанди сифатида уни янада обод ва фаровон қилишга ҳар биримиз масъулмиз. Биз ўқитувчилар ва ўқувчилар Мурожаатни қўллаб-қувватлаб, барчани янада унумли меҳнат қилишга, кўламдор бунёдкорлик ишларини амалга оширишга ва тобора яқинлашаётган мустақиллигимизнинг 22 йиллик байрамини муносиб кутиб олишга чақирамиз. Зеро, тўйга тўёна билан бориш бизнинг қадимий энг яхши удумларимиздир.
Гуласал МАТЁҚУБОВА.
10-сонли умумтаълим мактаби директори, Қорақалпоғистон Республикаси халқ таълими аълочиси, халқ депутатлари туман Кенгаши депутати.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
