"Обод турмуш йили" янгиликлари

Тил ўрганиш – дунёга чиқиш демакдир…

Хорижий тилларни пухта ўзлаштириш – мамлакатнинг иқтисодий салоҳиятини юксалтириш, чет эллик ишбилармонлар билан давлат аҳамиятига молик шартномалар тузиш, ишлаб чиқариш ва саноатни модернизация қилиш, таълим тизимини янада такомиллаштиришда муҳим омил ҳисобланади. Шу боис, Президентимиз И.А.Каримовнинг 2012 йил 10 декабрдаги "Чет тилларни ўргатишни янада такомиллаштириш чора-тадбирлари тўғрисида”ги қарори ҳар бир чет тили фани йилнинг апрель-май ойларида НДПИ қошидаги Амударё академик лицейидан 4 нафар инглиз тили фани ўқитувчилари республикамиздаги нуфузли малака ошириш курсларида таҳсил олиб қайтишди. Мазкур курсларда юқори натижага эришган Орзигул Ибрагимова айни пайтда академик лицейнинг инглиз тили фани ўқитувчилари учун махсус семинар-тренинг ўтказиб, лицей ўқитувчиларига чет тилларини ўқитиш борасидаги энг сўнгги янгиликлар ҳақида зарур тушунчалар бермоқда.

Саховатли болалар

Туманимиздаги 80-сонли умумтаълим мактабида "Оила-маҳалла-мактаб” ҳамкорлиги йўналишининг "Саховатли болалар” бўлими фаолиятидан нафақат мактаб жамоаси, балки ота-оналар ва маҳалла аҳли ҳам мамнун. Чунки мактабнинг "Саховатли болалар” бўлими аъзолари ҳудуддаги имконияти чекланган тенгқур дўстлари аҳволидан тез-тез хабар олишиб, уларнинг фанлардан яхши ўзлаштиришларига ёрдам берадилар. Ҳамкорликда дарс тайёрлашиб, тенгқур дўстларини турли байрам саналарида йўқлаб бирга хурсандчилик қиладилар. Уларнинг бу маънавий ҳимматидан барча хурсанд.

Аҳиллик бор жойда ҳамиша файз-барака, ривожланиш бўлади. Буни "Тараққиёт кўзгуси” газетаси, Амударё телевидениеси таҳририятлари ижодий жамоалари ҳамда туман Давлат архиви, «Манғит матбааси» хусусий корхонаси мисолида яққол кўриш мумкин. Шу йилнинг 19 май куни Хива шаҳрига уюштиришган саёҳатда мазкур идора ва муассаса ходимлари ҳамда уларнинг фарзандлари мириқиб дам олишди. Шаҳарнинг тарихий обидалари билан танишиб, сафардан катта таассуротлар билан қайтишди.

Баркамол авлод тарбияси йўлида

Амударё мелиорация ва сув хўжалиги касб-ҳунар коллежи ўқувчилари "Баркамол авлод” спорт ўйинлари ҳамиша фахрли ўринларни эгаллаб келмоқдалар. Шу йилнинг апрель ойида спорт ўйинларининг волейбол тури бўйича Нукус шаҳрида бўлиб ўтган Қорақалпоғистон Республикаси босқичида коллежнинг ўғил болалар жамоаси учинчи ўринни, қизлар жамоаси эса 4-ўринни эгаллашга муваффақ бўлдилар. Коллеж ўқувчиларини спорт ўйинларига тайёрлашда мураббийлар раҳбари Марат Жарлиқапов ва махсус фан ўқитувчиси Отабек Камоловларнинг ҳиссалари катта бўлди.

Асаларичилик ривожланади

Қипчоқ давлат ўрмон хўжалигида ёрдамчи хўжаликларни ривожлантириш мақсадида бир қанча ибратли ишлар амалга оширилмоқда. Ўрмон хўжалиги ходимлари яқинда Навоий вилоятининг Конимех туманида фаолият кўрсатаётган "Гулбоғ - Умидрахмиддин” асаларичилик фермер хўжалиги билан шартнома тузиб, 74 та асалари оиласини олиб келишди. - Конимехликлар билан ҳамкорлик қилишдан мақсад – уларнинг иш тажрибалари ва ёрдами асосида туманимизда етти хазинанинг бири бўлган асаларичиликни янада ривожлантиришдир, - дейди ўрмон хўжалиги бошлиғи ўринбосари Фарход Мамкаримов.