Халқ депутатлари Амударё туман Кенгашининг йигирма олтинчи сессияси тўғрисида АХБОРОТ

2016 йил 29 декабрь куни Халқ депутатлари Амударё туман Кенгашининг 26-сессияси бўлиб ўтди.

Сессияга туман ҳокими Султонбой Йўлдашев раислик қилди. Сессияда туман Кенгаши депутатлари, ҳоким ўринбосарлари ва ҳокимлик масъул ходимлари, бўлимлар, коммунал соҳа, тижорат банклари ва жамоат ташкилотлари раҳбарлари, касб-ҳунар коллежлари директорлари ҳамда оммавий ахборот воситалари вакиллари иштирок этишди. Сессия котиблигига 17-"Бўзёп” сайлов округидан депутат Гуласал Матякубова сайланди.

Сессия кун тартибига "Амударё тумани маҳаллий бюджетининг 2017 йилги асосий кўрсаткичлари тўғрисида”ги, "Соғлом она ва бола йили” туман ҳудудий дастурининг 2016 йилдаги ижроси тўғрисида”ги ҳамда "Туманда 2016 йил иш ўринларини яратиш ва аҳоли бандлигини таъминлаш дастурининг ижроси ва 2017 йилги Дастури лойиҳаси тўғрисида”ги масалалар ҳавола қилинди.

Кун тартибидаги биринчи масала бўйича сўзга туман молия бўлими мудири ўринбосари Бахтиёр Камолов чиқиб, туман маҳаллий бюджетининг 2017 йилги асосий кўрсаткичлари тўғрисида ахборот берди.

Кун тартибидаги иккинчи, яъни "Соғлом она ва бола йили” туман ҳудудий дастурининг 2016 йилдаги ижроси бўйича туман ҳокими ўринбосари – хотин-қизлар қўмитаси раиси Марям Ахмедова сўзга чиқиб, ахборот берди.

Таъкидланганидек, "Соғлом она ва бола йили” туман дастурининг ижроси таъминланиб, дастур доирасида 41 млрд. 759 млн. 300 минг сўм ва 233 минг АҚШ долларидан ортиқ маблағ ҳисобига туманда кенг кўламли ишлар амалга оширилди.

Навбатдаги масала, яъни "Амударё туманида 2016 йил иш ўринларини яратиш ва аҳоли бандлигини таъминлаш дастурининг ижроси ва 2017 йилги Дастури лойиҳаси тўғрисида”ги масала юзасидан ахборот учун сўз туман ҳокимининг иқтисодий ва ижтимоий ривожлантириш, хизмат кўрсатиш соҳаси ва тадбиркорлик масалалари бўйича ўринбосари Маъмуржон Темирбоевга берилди.

Ахборотда таъкидланганидек, 2016 йил давомида 4831 та янги иш ўринлари ташкил қилиниб, 2017 йилда 3030 та янги иш ўринларини ташкил қилиш режалаштирилмоқда.

Муҳокамаларда туман Кенгаши депутатлари, муассаса ва ташкилотлар раҳбарлари сўзга чиқиб, кун тартибидаги масалалар бўйича фикр-мулоҳазаларини билдирдилар.

Кун тартибидаги барча масалалар юзасидан туман Кенгашининг тегишли қарорлари қабул қилинди ва шунинг билан сессия ўз ишини якунлади.

Туман ҳокимлигининг ахборот хизмати.