Xalq deputatlari Amudaryo tuman Kengashining yigirma oltinchi sessiyasi toʻgʻrisida AXBOROT

2016-yil 29 dekabr kuni Xalq deputatlari Amudaryo tuman Kengashining 26-sessiyasi boʻlib oʻtdi.

Sessiyaga tuman hokimi Sultonboy Yoʻldashev raislik qildi. Sessiyada tuman Kengashi deputatlari, hokim oʻrinbosarlari va hokimlik masʼul xodimlari, boʻlimlar, kommunal soha, tijorat banklari va jamoat tashkilotlari rahbarlari, kasb-hunar kollejlari direktorlari hamda ommaviy axborot vositalari vakillari ishtirok etishdi. Sessiya kotibligiga 17-"Boʻzyop” saylov okrugidan deputat Gulasal Matyakubova saylandi.

Sessiya kun tartibiga "Amudaryo tumani mahalliy byudjetining 2017-yilgi asosiy koʻrsatkichlari toʻgʻrisida”gi, "Sogʻlom ona va bola yili” tuman hududiy dasturining 2016-yildagi ijrosi toʻgʻrisida”gi hamda "Tumanda 2016-yil ish oʻrinlarini yaratish va aholi bandligini taʼminlash dasturining ijrosi va 2017-yilgi Dasturi loyihasi toʻgʻrisida”gi masalalar havola qilindi.

Kun tartibidagi birinchi masala boʻyicha soʻzga tuman moliya boʻlimi mudiri oʻrinbosari Baxtiyor Kamolov chiqib, tuman mahalliy byudjetining 2017-yilgi asosiy koʻrsatkichlari toʻgʻrisida axborot berdi.

Kun tartibidagi ikkinchi, yaʼni "Sogʻlom ona va bola yili” tuman hududiy dasturining 2016-yildagi ijrosi boʻyicha tuman hokimi oʻrinbosari – xotin-qizlar qoʻmitasi raisi Maryam Axmedova soʻzga chiqib, axborot berdi.

Taʼkidlanganidek, "Sogʻlom ona va bola yili” tuman dasturining ijrosi taʼminlanib, dastur doirasida 41 mlrd. 759 mln. 300 ming soʻm va 233 ming AQSh dollaridan ortiq mablagʻ hisobiga tumanda keng koʻlamli ishlar amalga oshirildi.

Navbatdagi masala, yaʼni "Amudaryo tumanida 2016-yil ish oʻrinlarini yaratish va aholi bandligini taʼminlash dasturining ijrosi va 2017-yilgi Dasturi loyihasi toʻgʻrisida”gi masala yuzasidan axborot uchun soʻz tuman hokimining iqtisodiy va ijtimoiy rivojlantirish, xizmat koʻrsatish sohasi va tadbirkorlik masalalari boʻyicha oʻrinbosari Maʼmurjon Temirboyevga berildi.

Axborotda taʼkidlanganidek, 2016-yil davomida 4831 ta yangi ish oʻrinlari tashkil qilinib, 2017-yilda 3030 ta yangi ish oʻrinlarini tashkil qilish rejalashtirilmoqda.

Muhokamalarda tuman Kengashi deputatlari, muassasa va tashkilotlar rahbarlari soʻzga chiqib, kun tartibidagi masalalar boʻyicha fikr-mulohazalarini bildirdilar.

Kun tartibidagi barcha masalalar yuzasidan tuman Kengashining tegishli qarorlari qabul qilindi va shuning bilan sessiya oʻz ishini yakunladi.

Tuman hokimligining axborot xizmati.