БАНК КРЕДИТЛАРИ – ҲАР БИР ХОНАДОНГА

Мамлакатимизда фуқаролар манфаатларини ишончли ҳимоя қилиш, турмуш фаровонлигини оширишга ғамхўрлик кун сайин кучайтирилмоқда.

Оддий аҳолини тадбиркор қилиш, одамларнинг  даромад манбаларини яратишларига кўмаклашиш мақсадида тижорат банклари томонидан имтиёзли кредитлар жорий этилаётгани фикримизнинг тасдиғидир.

Мамлакатимизда кичик бизнес ва хусусий тадбиркорликни янада ривожлантириш, соҳа субъектлари фаолиятини ҳар томонлама қўллаб-қувватлашга алоҳида эътибор қаратилмоқда.

Банк кредити тадбиркорликни ривожлантиришнинг асосий омилларидан биридир. Ўзбекистон Республикаси Марказий банки Халқ билан мулоқот ва инсон манфаатлари йилида кичик бизнесни қўллаб-қувватлашни янада кенгайтириш чораларини кўрмоқда. "Оддий аҳолини тадбиркорликка жалб қилиш” шиори остидаги лойиҳа шулардан бири.

Муҳтарам Президентимиз банклар олдига қўяётган вазифаларга мувофиқ, банк ходимлари ҳар бир оилага бориб, банк хизматлари ва кредит турлари ҳақида маълумот бермоқдалар. Кредитлар энг кам иш ҳақининг 1000 баробари миқдоригача имтиёзли ставкаларда таклиф этилмоқда, кредит олиш учун тадбиркорлик субъекти сифатида рўйхатдан ўтиш ёки шахсий томорқада бизнес бошлаш мумкин.

Туманимизда фаолият юритаётган акциядорлик тижорат банклари туман филиаллари ҳам юртимизда тадбиркорлар сафини янада кенгайтириш ва уларни ҳар томонлама қўллаб-қувватлаш, банкдан имтиёзли микрокредитлар олиш ва ундан самарали фойдаланишларига кўмаклашиш мақсадида туманимизнинг барча ҳудудларидаги хонадонларга бирма-бир кириб, тарғибот ишларини йўлга қўймоқда. Банк томонидан таклиф этилаётган микрокредитлар 3 йилгача муддатга, йиллик 9 фоизлик имтиёзли ставкаларда берилади.

Банклар ходимлари ҳар бир хонадон эгасига кредит турлари, фоиз ставкалари, фаолият бошлаш учун тадбиркорлик соҳалари ҳақида кенг тушунчалар беришмоқда.

Бу вазифаларни адо этиш учун туманимиздаги мавжуд хонадонларнинг 9100 тасига "Микрокредитбанк” туман филиали, 6972 тасига "Агробанк” туман филиали 10417 тасига "Халқ банки” туман филиали, 10890 тасига "Саноат қурилишбанк” масъул қилиб белгиланди. Мазкур кредитларни олиш учун банкка ариза билан мурожаат қилиниб, бизнес-режа тақдим қилишингиз керак. Шахсий томорқада бизнес бошламоқчи бўлганлардан бизнес режа талаб қилинмайди, шахсий томорқаси мавжудлигини тасдиқловчи маълумотнома кифоя. Энг кам иш ҳақининг 50 баробаригача, яъни 7,5 миллион сўмгача бўлган кредитлар учинчи шахс кафиллиги асосида, ундан кўп миқдордаги кредитлар эса кўчмас мулк, енгил ёки юк ташувчи автомобиль, асбоб-ускуналар ва бошқа гаров асосида берилади.

Банкнинг мижоз олдига бориб ўз хизматини таклиф этиши яхши самара бермоқда. Бу "мижоз – банк учун эмас, банк – мижоз учун” деган тамойилнинг амалий тасдиғидир. Шу кунгача туманимизнинг бир қатор овул ва маҳаллаларида яшовчи фуқаролар чорвачилик фаолиятини йўлга қўйиши учун имтиёзли кредит олиб, бу сармояга қорамол, парранда сотиб олган холда оиласига даромад манбаларини яратмоқдалар.

Амалга оширилаётган бу чора-тадбирлар мамлакатимиз раҳбари муҳтарам Ш.Мирзиёев таъкидлаганларидек халқимиз турмуши сифатини оширишга, ҳар бир хонадонни, пировардида давлатимизни бой ва қудратли қилишга қаратилганлиги билан жуда аҳамиятлидир.

Ойгул РАЖАБОВА.

(Реклама ҳуқуқи асосида. Хизматлар лицензияга эга).

(Фото - http://storage.kun.uz)