ИСТЕЪМОЛЧИ ҲУҚУҚИ ҚОНУН ҲИМОЯСИДА

Ўзбекистон Республикасининг «Истеъмолчиларнинг ҳуқуқларини ҳимоя қилиш тўғрисида»ги қонунида истеъмолчиларнинг ҳуқуқларини ҳар томонлама ҳуқуқий ҳимоя қилиш чора-тадбирлари белгилаб қўйилган.

Туман истеъмолчилар ҳуқуқларини ҳимоя қилиш жамияти томонидан овул ва маҳаллаларда, меҳнат жамоаларида ўтказилаётган учрашув йиғилишларида истеъмолчилар ҳуқуқларини ҳимоя қилиш юзасидан кенг миқёсда тушунтириш ишлари олиб борилаяпти. Натижада фуқаролар онгида ўз ҳуқуқларини тушунишлари борасида жуда катта ўзгаришлар содир бўлаяпти.

2016 йил давомида Манғит шаҳрининг Қиличбой кўчасида яшовчи А.Тажимов, Гурлан кўчасида яшовчи Б.Бозорбоев, Амир Темир номли овулдан Х.Юсупов, А.Яссавий кўчасида яшовчи Г.Ақназарова, Дўрман овулида яшовчи Е.Аҳмедов, Қиличбой овулининг "Беш овул” маҳалласида яшовчи А.Абдалов ва "Оқ олтин” овулида яшовчи А.Камоловлар мурожаатлари жамият томонидан қисқа фурсат ичидаёқ ўрганиб чиқилиб, уларга амалий ёрдам кўрсатилганлиги фуқароларда жамиятимизга бўлган ишончни янада оширмоқда.

Мен ушбу мақолам орқали туманимиз аҳолисига мурожаат этиб:

– озиқ овқат маҳсулотларини харид қилишда унинг яроқлилик муддати ўтмаганлигига ва ишлаб чиқарилган санаси кўрсатилганлигига, нуқсонсиз эканлигига эътибор беришларини;

– турли маиший, техник, газ, электр, сув таъминоти ва бошқа  соҳаларда хизмат кўрсатилганида хизмат кўрсатилганлик ҳақидаги ҳужжатларни талаб қилишни;

– бирор нарса харид қилганингизда ёки хизмат кўрсатилганда касса чекини талаб қилишни унутмаслигингизни ва сотувчи пластик карта орқали савдо қилишдан бош тортса ёки нархларни асоссиз равишда кўтарса, бундай ҳолатларда бизнинг 515 10 91 рақамли ишонч телефонимизга қўнғироқ қилишингизни сўрайман.

Икром ХУДАЯРОВ,

туман Истеъмолчилар ҳуқуқларини ҳимоя қилиш жамияти раиси.