Ҳунарли ёшлар юртимиз келажаги
Қорақалпоғистон Республикаси Амударё туманида "Юртимиз келажаги билимли, ҳунарли ёшлар қўлида” деб номланган касблар фестивали ўтказилди.
Ватанимиз мустақиллигининг 22 йиллигига бағишлаб "Қадр-қимматим, таянчим ва ифтихоримсан, мустақил Ўзбекистон!” шиори остида ўтказилган ушбу тадбир ёш ҳунармандлар, хусусий тадбиркорлар томонидан ишлаб чиқарилган маҳсулотлар кўргазмаси билан бошланди.
Жорий йилда тумандаги 7 касб-ҳунар коллежини 2 минг 544 нафар йигит-қиз муваффақиятли тамомлади. Уларнинг 777 нафари ўқишни давом эттириш учун олий ўқув юртига ҳужжат топширган бўлса, 41 нафари тадбиркорлик билан шуғулланиш мақсадида ўз бизнес режасини тақдим қилган. Ёш тадбиркорларга банклар томонидан жами 123 миллион сўмлик имтиёзли кредит маблағлари ажратилди.
Коллеж битирувчиларини иш билан таъминлаш мақсадида тузилган уч томонлама шартномага кўра, "Бойовул пойафзали” кўптармоқли корхонаси аъзолари сафига 10 нафар йигит-қиз келиб қўшилди. Бу ерда асосан катталар ва болалар пойафзали тайёрланади. Шунингдек, қўшимча тармоқда кийим-кечак, қандолатчилик маҳсулотлари ҳам ишлаб чиқарилмоқда.
Маҳсулотларни қадоқлаш учун полиэтилен халтачалари ишлаб чиқарилаётган "Алишер Саъдуллаев” хусусий корхонасида ҳам икки нафар коллеж битирувчиси иш бошлади. Хитой технологияси асосида ойига 10 тонна маҳсулот ишлаб чиқариб, бозорда ўз харидорини топган мазкур жамоада ҳам ёшлар коллежда олган билимлари эвазига тезда ўз ўрнига эга бўлишди.
Йилига икки ярим минг тонна пиллани қайта ишлаш қувватига эга "Aziya silk” қўшма корхонасида ишлаб чиқариш амалиётини ўтаган Нигора Алланиёзова ўнга яқин тенгдошлари қатори шу ерда доимий иш билан таъминланди.
– Устозларимдан кўп нарса ўрганаяпман, – дейди Н.Алланиёзова. – Коллежда олган билимларим қўл келмоқда. Бу ерда биз ёшларга бўлган эътибор юқори, "устоз-шогирд” анъанаси яхши йўлга қўйилган.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
