МУСТАҚИЛЛИК – АЛЛОҲНИНГ УЛУҒ НЕЪМАТИДИР

Бугун жаннатмакон юртимиз мустақиллигининг 26 йиллиги байрамини  катта шодиёналар билан нишонлаяпмиз. Бу кунларни кўриш орзусида бир неча авлодларимиз умид ва ҳасратда дунёдан ўтиб кетишди. Дарҳақиқат, мамлакатимизда мустақиллик йилларида амалга оширилган бунёдкорлик ишлари шаҳар ва қишлоқларимиз қиёфасини бутунлай ўзгартириб, юборди. Муқаддас динимиз, миллий қадриятларимиз қайтадан равнақ топа бошлади.

Ҳозирги пайтда Ўзбекистонда икки мингдан зиёд масжид фаолият кўрсатмоқда. Ҳар йили беш минг нафар ҳамюртимиз ислом динининг асосий арконларидан бири ҳаж ибодатини, умра зиёратини адо этишга муяссар бўлмоқдалар.

Азизлар, мустақиллик йилларида мамлакатимизда амалга оширилган барча соҳадаги ислоҳот ва ўзгаришларга диққат билан назар солсак, уларнинг марказида инсон манфаатлари турганига гувоҳ бўламиз.

Тарихга назар ташланса, ҳамма даврда ҳам давлатнинг ривожланиши, тараққий топиши жамиятнинг фаровон ва осойишта ҳаёт кечиришига боғлиқлиги аён бўлади. Шунинг учун ҳам Пайғамбаримиз (с.а.в.) ҳадисларининг бирида тинчлик-хотиржамлик энг катта неъмат эканлигини таъкидлаб шундай деганлар:

"Икки неъмат борки, кўпчилик инсонлар унинг қадрига етмайдилар. У – хотиржамлик ва сиҳат-саломатлик”.

Тинчлик қарор топган юртда хотиржамлик ҳукм суради, жамиятда ҳар томонлама юксалиш ва ривожланиш рўй беради. Одамларнинг ўзаро бир-бирларига бўлган ишонч ва садоқатлари, меҳр ва мурувватларининг самимий бўлиши ҳам асосан хотиржамликка боғлиқдир. Демак, дунёда ҳаётнинг бир маромда давом этиши, халқнинг Ҳақ таоло буюрган ишларини мукаммал ва хотиржам адо этишлари учун тинчлик ва осойишталик лозим.

Қуръони Карим таълим берадики, ҳар қандай шаклдаги зулм ва зўравонлик ислом ақидасига тубдан қарама-қаршидир ва биронта мусулмон ана шундай жиноятни содир этиши мумкин эмас.

Ислом дини кишиларни тинчликни асраш ва барқарорликни таъминлаш йўлида имон,  ҳамжиҳатлик ва бирдамлик билан ҳаракат қилишга, фитна ва ўзаро адоватга барҳам беришга чақиради, тинчликпарварлик ислом динининг моҳиятини ташкил этади. Барчамиз она Ватанимиздаги тинч, осойишта ва фаровон ҳаётнинг қадрига етиб, шу фаровон, осуда ҳаётни янада мустаҳкамлаш учун ўз ҳиссамизни қўшиб, эл-юрт тақдири, келажаги учун қайғуриб яшайлик.

Азизлар, яхшилик қилишдан чарчамайлик. Бинобарин, бу ҳаётда инсондан фақат савобли амал ва яхшиликкина қолади.

Ушбу саодатли кунларда жаннатмакон диёримизда яшовчи барча юртдошларимизни мустақиллик байрами билан самимий муборакбод этаман. Аллоҳ таолодан бу улуғ байрамни барчамиз учун хурсандчилик, шоду хуррамлик ва ҳамжиҳатликда ўтказишликни сўраймиз.

Ражаббой ҲАБИБУЛЛАЕВ,

"Ҳожи Эшон бобо” жомъе масжиди имоми.

(Фото - http://ijod.uz)