МУНОСИБ НОМЗОДГА ЖАМОАТЧИЛИК РОЗИЛИГИ ОЛИНДИ

2017-2021 йилларда Ўзбекистон Республикасини ривожлантиришнинг бешта устувор йўналиши бўйича Ҳаракатлар стратегиясида фуқароларнинг ҳуқуқ ва эркинликларини ишончли ҳимоя қилиш кафолатларини кенгайтириш, уларнинг одил судловга эришиш даражасини, суд иш юритувининг самарадорлиги ва сифатини ошириш, номзодларни танлаш ва судьялик лавозимига тайинлаш тизимини янада такомиллаштириш суд-ҳуқуқ соҳасида амалга оширилаётган ислоҳотларнинг энг муҳим йўналишлари сифатида мустаҳкамланди.

Мамлакатимиз тарихида илк бор Судьялар олий Кенгаши ташкил этилди ва шу муносабат билан амалда судьяларнинг мустақиллиги ва дахлсизлигини таъминловчи ҳимоя тизими яратилди.

Давлатимиз раҳбарининг жорий йил 13 июнда судьялар билан ўтказилган тарихий учрашувидаги "Қонун ва адолат устуворлигини таъминлаш –барча эзгу мақсадларимизга эришишнинг энг муҳим шарти” мавзуидаги маърузасида белгилаб берилган вазифалар ижроси бўйича судьялик лавозимига илк бор тайинланаётган номзодларни туман ва шаҳар жамоатчилигига тавсия этиб, уларнинг фикрини, розилигини олиш тартиби йўлга қўйилди.

Шунга мувофиқ жорий йилнинг 16 октябрида 3-сонли Амударё академик лицейи мажлислар хонасида фуқаролик ишлари бўйича Амударё туман суди раиси лавозимига тавсия қилинган номзод Утениязов Еркин Жабборовичнинг туман фаоллари билан учрашуви бўлиб ўтди.

Фаоллар йиғилишида туман ҳокими ўринбосарлари, масъул ходимлари, "Халқ қабулхонаси”, жамоат ташкилотлари ва ҳуқуқни муҳофаза қилиш идоралари раҳбарлари, мактаблар, корхона, ташкилотлар раҳбарлари ва ўзини ўзи бошқариш органлари раислари, оммавий ахборот воситалари ходимлари иштирок этдилар.

Фаоллар йиғилишида судьялик лавозимига илк бор тавсия этилаётган номзодга жамоатчиликнинг розилигини олиш масаласи кўриб чиқилди.

Йиғилишни Қорақалпоғистон  Республикаси Жўқорғи Кенгеси қўмита раиси С.Турманов олиб борди. Судьялар олий Кенгаши аъзоси Жасуриддин Абдусатторов фуқаролик ишлари бўйича Амударё туман суди раислигига тавсия этилаётган номзод Утениязов Еркин Жабборовичнинг таржимаи ҳоли ва меҳнат фаолияти ҳақида батафсил маълумот берди.

Шундан сўнг туман "Халқ қабулхонаси” раиси Э.Ражабов, туман ФҲДЁ бўлими мудираси С.Холбоева, "Маҳалла” хайрия жамоат фонди раиси А.Қўшаев, 40-сонли мактаб директори С.Хўжамуродовалар сўзга чиқиб, Еркин Утениязов фуқаролик ишлари бўйича туман суди судьялигига муносиб номзод эканлигини таъкидладилар ва уни қўллаб-қувватлашга чақирдилар.

Фаоллар йиғилишида муносиб номзодга туман жамоатчилигининг розилиги олинди.

Йиғилишда иштирок этган Еркин Утениязов ўзига билдирилган ишонч учун кенг жамоатчиликка миннатдорчилик изҳор этди.

Ойгул РАЖАБОВА.

(Фото - http://tafsilot.uz)