ДУНЁДАГИ ЭНГ БАХТЛИ ЁШЛАРМИЗ

Ҳар ким билим олиш ҳуқуқига эга. Бепул умумий таълим давлат томонидан кафолатланади. Мактаб ишлари давлат назоратидадир.

Ўзбекистон Республикаси Конституциясининг  41-моддаси.

Мен умумтаълим мактабининг 9-синфини тугатиш арафасида эдим. Нафақат мен, балки ота-онам ҳам мактабни тугатганимдан сўнг қаерда, қайси касб-ҳунар коллежида таҳсилни давом эттиришим ҳақида тинмай бош қотирардик. Шундай кунларнинг бирида  муҳтарам Президентимиз 11 йиллик таълим тизимини қайта тиклаш фикрини илгари сурдилар. Юртбошимизнинг бу фикрини нафақат менинг ота-онам, балки барча юртдошларимиз  мамнуният билан кутиб олдилар. Чунки биз яшайдиган “Чоқча” маҳалласи “Чойкўл” овулининг Туркманистон Республикаси билан чегара ҳудудида жойлашган, мабодо, бирон касб-ҳунар коллежига ўқишга жойлашсам, камида 10-15 чақирим масофага қатнашимга тўғри келар, ўқиш учун сарфлашим мумкин бўлган қимматли вақтимнинг асосий қисми йўл юриш билан ўтиб кетарди.

Ҳозирги кунда нафақат мен, балки барча синфдошларим ўзимиз учун қадрдон бўлган 22-сонли умумтаълим мактабининг 10-синфида таҳсил олмоқдамиз.

Мамлакатимизда биз ёшларнинг ўз қобилият ва иқтидорларимизни намоён этишимиз учун барча қонуний асослар яратиб берилган. Баъзан интернет тармоқларида, телевидение орқали намойиш этилаётган айрим хориж давлатларидаги тенгдошларимиз ҳаёти ҳақидаги маълумотларга кўзим тушиб, биз Ўзбекистон ёшлари нақадар  бахтли эканлигимизни ҳис этаман. Бизнинг бепул билим  олиш ҳуқуқимиз Конституциямизда мустаҳкам кафолатлаб қўйилганлиги, шахсан Президентимизнинг  ўзлари ҳар бир боланинг,  ёшларнинг бахт-саодати, келажаги учун қайғуриб, ғамхўрлик қилаётганининг ўзи қалбимизга ифтихор бағишлайди.

Мен Конституциявий ҳуқуқимдан тўла фойдаланган ҳолда, ўзим хоҳлаган илм масканида, 10-синфда таҳсил олмоқдаман. Иккита шеърий тўпламим  нашрдан чиқди. Мактабимизда ўз иқтидоримни намоён этишим учун барча шароитлар муҳайё. Биз ёшлар – дунёдаги энг бахтли инсонлармиз.

Умида ЕРДОШЕВА, 22-сонли мактабнинг  10-синф ўқувчиси.