“Қалдирғоч” болалар ёзги оромгоҳида “Бахтли болалик” номли концерт дастури ташкил этилди
Амударёлик болажонлар учун ёзги таътилни янада қизиқарли ва завқли тадбирларга бой тарзда ташкил этиш ишларига катта эътибор қаратилмоқда. Ёз кунларини тенгдошлари ва янги дўстлари даврасида ўтказаётган болажонларнинг қувончи чексиз. Бу эса уларнинг кейинги ўқув йилини ҳар жиҳатдан кучга тўлиб, завқ билан бошлашларига хизмат қилади.
Дарҳақиқат, мамлакатимизда ёш авлодни ҳар томонлама қўллаб-қувватлаш ва рағбатлантириш, бўш вақтларини мазмунли ташкил қилиш, таълим сифатини ошириш масаласига доимий равишда эътибор қаратиб келинмоқда. Айниқса ижтимоий ҳимояга муҳтож оилалар фарзандларини қўллаб-қувватлаш, уларнинг ҳаётда муносиб ўрин топишларига кўмаклашиш давлатимизнинг доимий эътиборида. Буларнинг бари келажагимиз ворислари бўлмиш ёшлар учун янги имконият эшикларини очмоқда.
Айниқса, Республикамизнинг энг сўлим манзилларида ёш авлодни соғломлаштириш, уларнинг бўш вақтларини мазмунли ўтказиш ҳамда саломатлигини тиклашга кўмаклашиш мақсадида ташкил қилинган оромгоҳлар болаларнинг ёзги таътилни мароқли ўтказишларига хизмат қиляпти.
Амударё туманининг Дўрман овулидаги 84-сонли мактаб биносида фаолият кўрсатаётган “Қалдирғоч” болалар ёзги дам олиш оромгоҳи ҳам шулар жумласидандир. Оромгоҳда ташкил этилаётган маданий-маърифий тадбирлар амударёлик ёшларга кўтаринки кайфият ва зиё улашмоқда. Яқинда тумандаги “Баркамол авлод” болалар мактабининг “Эстрада-вокал” тўгараги раҳбари Шокиржон Худойберганов ҳамда “Шўх болалар” жамоаси томонидан тақдим этилган “Беғубор болалик” номли концерт дастури ҳам оромгоҳ болаларига олам-олам қувонч бахш этди.
Концерт дастури аввалида “Эстрада-вокал” тўгараги раҳбари Шокиржон Худойберганов сўзга чиқиб, оромгоҳ болаларига таътилни мароқли ўтказишларига тилакдош бўлди ва бугунги кунда “Баркамол авлод” болалар мактабида фаолият юритаётган тўгараклар ҳақида маълумот бериб, барча ёшларни мазкур мактабга таклиф қилди.
Шундан кейин “Шўх болалар” жамоаси ёш ижодкорларининг яккахон ва гуруҳ чиқишларига навбат берилди. Ёшлар ижросида она Ватан, дўстлик, болалик, қадрдон мактаб мадҳи тараннум этилган шўх қўшиқлар янгради. Оромгоҳда дам олаётган болалар тенгдошлари куйлаган қўшиқлардан завқланиб, уларни қарсаклар билан олқишлашди.
Бахтли болалик – инсон умрининг энг беғубор, орзу-умидларга тўла жўшқин ва ҳароратли дамларидир. Шубҳасиз, болаларнинг кулгуси, кўзларидаги қувонч бутун оламни ёритадигандек гўё. Осмони мусаффо, тинч ва фаровон Ватанимизда бугун фарзандларимиз ёруғ келажак учун дадил ҳаракат қилишмоқда. Саҳнадаги ёш хонандаларнинг чиқишларини кузатиб, улар ижросидаги шўх қўшиқларни тинглар эканмиз, буларнинг барчаси мамлакатимизда амалга оширилаётган кенг кўламдаги ислоҳотларнинг амалий натижаси эканлигига яна бир бор амин бўламиз. Зеро, бундай байрамона кайфият фақат тинч ва осойишда заминда ҳукм суради.
“Қалдирғоч” болалар ёзги дам олиш оромгоҳида таълим-тарбия сифатини, спортнинг оммавийлиги, китобхонлик маданиятини оширишга алоҳида аҳамият қаратиляпти. Дам олувчиларнинг бўш вақтларини мазмунли ташкил этиш учун “Беш ташаббус” доирасида тадбирлар ташкил этиляпти. Оромгоҳда ҳар бир боланинг ривожланиши, саломатлигига алоҳида эътибор қаратилиши, машғулотларнинг қизиқарли ўтиши эса уларнинг ҳам ақлан, ҳам жисмонан соғлом бўлиб улғайишларига замин яратмоқда. Хусусан, гуруҳлар ўртасида интеллектуал ўйинлар, спорт мусобақалари мунтазам равишда ташкил этиляпти. Туман Ахборот кутубхона маркази томонидан ўтказилаётган “Сайёр кутубхона” тадбирлари болаларни китобларга янада яқинлаштиряпти.
Тадбир якунида барча болалар қўлни-қўлга бериб, дўстлик даврасида севимли оромгоҳларини мадҳ этувчи қўшиқларни биргаликда куйлашди. Дарҳақиқат, бундай маданий-маърифий тадбирлар, концерт дастурлари маданий ҳордиқ чиқариш билан бир қаторда ёшларнинг беғубор қалбига дўстлик туйғуларини ҳам олиб киради.
Шоҳзод Қурбонбоев
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
