“Qaldirgʻoch” bolalar yozgi oromgohida “Baxtli bolalik” nomli kontsert dasturi tashkil etildi

Amudaryolik bolajonlar uchun yozgi taʼtilni yanada qiziqarli va zavqli tadbirlarga boy tarzda tashkil etish ishlariga katta eʼtibor qaratilmoqda. Yoz kunlarini tengdoshlari va yangi doʻstlari davrasida oʻtkazayotgan bolajonlarning quvonchi cheksiz. Bu esa ularning keyingi oʻquv yilini har jihatdan kuchga toʻlib, zavq bilan boshlashlariga xizmat qiladi.

Darhaqiqat, mamlakatimizda yosh avlodni har tomonlama qoʻllab-quvvatlash va ragʻbatlantirish, boʻsh vaqtlarini mazmunli tashkil qilish, taʼlim sifatini oshirish masalasiga doimiy ravishda eʼtibor qaratib kelinmoqda. Ayniqsa ijtimoiy himoyaga muhtoj oilalar farzandlarini qoʻllab-quvvatlash, ularning hayotda munosib oʻrin topishlariga koʻmaklashish davlatimizning doimiy eʼtiborida. Bularning bari kelajagimiz vorislari boʻlmish yoshlar uchun yangi imkoniyat eshiklarini ochmoqda.

Ayniqsa, Respublikamizning eng soʻlim manzillarida yosh avlodni sogʻlomlashtirish, ularning boʻsh vaqtlarini mazmunli oʻtkazish hamda salomatligini tiklashga koʻmaklashish maqsadida tashkil qilingan oromgohlar bolalarning yozgi taʼtilni maroqli oʻtkazishlariga xizmat qilyapti.

Amudaryo tumanining Doʻrman ovulidagi 84-sonli maktab binosida faoliyat koʻrsatayotgan “Qaldirgʻoch” bolalar yozgi dam olish oromgohi ham shular jumlasidandir. Oromgohda tashkil etilayotgan madaniy-maʼrifiy tadbirlar amudaryolik yoshlarga koʻtarinki kayfiyat va ziyo ulashmoqda. Yaqinda tumandagi “Barkamol avlod” bolalar maktabining “Estrada-vokal” toʻgaragi rahbari Shokirjon Xudoyberganov hamda “Shoʻx bolalar” jamoasi tomonidan taqdim etilgan “Begʻubor bolalik” nomli kontsert dasturi ham oromgoh bolalariga olam-olam quvonch baxsh etdi.

Kontsert dasturi avvalida “Estrada-vokal” toʻgaragi rahbari Shokirjon Xudoyberganov soʻzga chiqib, oromgoh bolalariga taʼtilni maroqli oʻtkazishlariga tilakdosh boʻldi va bugungi kunda “Barkamol avlod” bolalar maktabida faoliyat yuritayotgan toʻgaraklar haqida maʼlumot berib, barcha yoshlarni mazkur maktabga taklif qildi.

Shundan keyin “Shoʻx bolalar” jamoasi yosh ijodkorlarining yakkaxon va guruh chiqishlariga navbat berildi. Yoshlar ijrosida ona Vatan, doʻstlik, bolalik, qadrdon maktab madhi tarannum etilgan shoʻx qoʻshiqlar yangradi. Oromgohda dam olayotgan bolalar tengdoshlari kuylagan qoʻshiqlardan zavqlanib, ularni qarsaklar bilan olqishlashdi.

Baxtli bolalik – inson umrining eng begʻubor, orzu-umidlarga toʻla joʻshqin va haroratli damlaridir. Shubhasiz, bolalarning kulgusi, koʻzlaridagi quvonch butun olamni yoritadigandek goʻyo. Osmoni musaffo, tinch va farovon Vatanimizda bugun farzandlarimiz yorugʻ kelajak uchun dadil harakat qilishmoqda. Sahnadagi yosh xonandalarning chiqishlarini kuzatib, ular ijrosidagi shoʻx qoʻshiqlarni tinglar ekanmiz, bularning barchasi mamlakatimizda amalga oshirilayotgan keng koʻlamdagi islohotlarning amaliy natijasi ekanligiga yana bir bor amin boʻlamiz. Zero, bunday bayramona kayfiyat faqat tinch va osoyishda zaminda hukm suradi.

“Qaldirgʻoch” bolalar yozgi dam olish oromgohida taʼlim-tarbiya sifatini, sportning ommaviyligi, kitobxonlik madaniyatini oshirishga alohida ahamiyat qaratilyapti. Dam oluvchilarning boʻsh vaqtlarini mazmunli tashkil etish uchun “Besh tashabbus” doirasida tadbirlar tashkil etilyapti. Oromgohda har bir bolaning rivojlanishi, salomatligiga alohida eʼtibor qaratilishi, mashgʻulotlarning qiziqarli oʻtishi esa ularning ham aqlan, ham jismonan sogʻlom boʻlib ulgʻayishlariga zamin yaratmoqda. Xususan, guruhlar oʻrtasida intellektual oʻyinlar, sport musobaqalari muntazam ravishda tashkil etilyapti. Tuman Axborot kutubxona markazi tomonidan oʻtkazilayotgan “Sayyor kutubxona” tadbirlari bolalarni kitoblarga yanada yaqinlashtiryapti.

Tadbir yakunida barcha bolalar qoʻlni-qoʻlga berib, doʻstlik davrasida sevimli oromgohlarini madh etuvchi qoʻshiqlarni birgalikda kuylashdi. Darhaqiqat, bunday madaniy-maʼrifiy tadbirlar, kontsert dasturlari madaniy hordiq chiqarish bilan bir qatorda yoshlarning begʻubor qalbiga doʻstlik tuygʻularini ham olib kiradi.

Shohzod Qurbonboyev