НАЗАРХОНЛИК АЁЛ-ҚИЗЛАР ИШТИРОКИДА “ЯНГИ ЎЗБЕКИСТОННИНГ БАХТЛИ АЁЛЛАРИМИЗ!” МАВЗУСИДА МАЪНАВИЙ-МАЪРИФИЙ ТАДБИР БЎЛИБ ЎТДИ

Назархон ОФЙ масъуллари томонидан аёл-қизларга, ёш болаларга нисбатан зўравонликка қарши курашиш, овул фуқароларининг ўз конституциявий ҳуқуқларидан самарали фойдаланишларини таъминлаш мақсадида ҳудуд аҳолиси иштирокида ҳуқуқий мавзулардаги давра суҳбатлари, масъул мутахассислар иштирокидаги тарғибот-ташвиқот тадбирларини ўтказишга алоҳида эътибор қаратилади.

Хусусан, Конституциямиз қабул қилинган сана – 8 декабрь арафасида, шунингдек, халқаро хотин-қизларга нисбатан зўравонликка қарши курашиш куни муносабати билан ўтказилган “Янги Ўзбекистоннинг бахтиёр аёл-қизларимиз” мавзусидаги маънавий-маърифий учрашув тадбирига овулнинг турли ёш тоифасидаги аёл-қизлар вакиллари тўлиқ қамраб олиниб, улар билан самимий ва ошкора суҳбатлар ўтказилди.

Мазкур тадбирда Амударё туман оила ва хотин-қизлар бўлими бошлиғи Г.Сабурова, хотин-қизларни реабилитация қилиш ва мослаштириш Қорақалпоғистон Республикаси Амударё намунали туманлараро Маркази директори Г.Чимбойчиева, Назархон ОФЙ хотин-қизлар фаоли Г.Ибрагимова, шунингдек, ҳудуддаги умумтаълим мактабларининг амалиётчи-психологлари А.Бекмуратова, Д.Айназарова ҳамда кўча бошчи аёллар, педагоглар, овулдаги ёш келинлар иштирок этишди.

Аёл бахтли бўлса, оила муҳити соғлом, тинч ва осойишта бўлади. Оила тинч бўлса, жамиятда тараққиёт, бахтиёрлик ҳукм суради. Шу боис, ёшлар ўртасидаги бир-бирига мойиллик, севги-муҳаббатдан ташқари, юксак ақл-идрок, маънавий етуклик ҳам талаб этилади. Буни турмуш, дейдилар, турмушнинг баъзан “мушт”лари ҳам бўлишини ёшларимиз билишлари, бундай синовларга тайёр туришлари керак. Сабаби, оила ҳаёти доимо бир текис, равон кечмайди, етар-етмаслик, баъзан ғам-ташкиш соя солиши мумкин. Бундай пайтларда оила бекалари бўлган аёлларимизда сабр-тоқат, оила аъзолари билан оғзибирчилик, ўзаро ҳурмат-эътибор хислатлари бўлиши муҳим аҳамиятга эга. Ана шунда ҳеч бир оилада бир-бирини камситиш, фарзанд ва ота-оналар ўртасида тушунмовчилик, ҳурматсизлик каби салбий ҳолатлар бўлмайди ва оила албатта бахтли ҳаёт кечиради.

Эркак аёлга қачон қўл кўтаради? Аёли тилини тиймаганда, эрининг нафсониятига тегадиган ножўя гап айтганида ёки кайсидир маънода эрини менсимаганида!

Бўлиб ўтган мулоқотларда назархонлик онахонлар ва тадбир меҳмонлари бу каби масалаларда ўзларининг ҳамфикр эканликларини ёш келинларга берган маслаҳат ва ўгитлари орқали ифода этдилар.

Шунингдек, тадбирда овул фуқароларидан А.Раметова, З.Тайирова, У.Дурдибоевалар ўзларини қийнаб келаётган муаммолари юзасидан масъулларга мурожаат қилдилар.

Назархонлик аёлларнинг мурожаатларига Амударё туман оила ва хотин-қизлар бўлими бошлиғи Г.Собурова ҳамда Қорақалпоғистон Республикаси Аёлларни реабилитация қилиш Амударё намунали туманлараро Маркази директори Г.Чимбойчиевалар батафсил жавоблар беришди.

“Янги Ўзбекистоннинг бахтли аёл-қизларимиз” мавзусида ўтказилган маънавий-маърифий тадбир назархонлик аёл-қизлар учун оила мустаҳкамлигини таъминлаш,  зўравонликнинг ҳар қандай кўринишидан сақланиш борасида муҳим аҳамият касб этди.

Тазахон Қдирниязова, 3-сонли мактаб кутубхоначиси.