Обод турмуш йили янгиликлари

ЯНГИ МАКТАБ БИНОСИ ИШГА ТУШДИ

"Тақирқалъа” массивига яқин ҳудудда янгидан қурилиб битказилган 76 сонли умумтаълим мактаби 2 сентябрь куни ўқувчиларни ўз бағрига чорлади.

Янги мактабнинг ишга туширилишига бағишланган тантанани мактаб директори Н.Йўлдошев очди ва қувончли кун билан барча ўқитувчилар ва ўқувчиларни қутлади.

Туман ҳокими ўринбосари, туман хотин-қизлар қўмитаси раиси М.Аҳмедова, "Амударё телевидениеси” директори, "Тараққиёт кўзгуси” газетаси муҳаррири Ғ.Ешниёзов, "Тошёп” овули оқсоқоли А.Ўрозбоевларнинг табригидан сўнг мактаб ўқувчилари тайёрлаган байрам концерти намойиш этилди.

Мустақиллик дарси билан бошланган ўқув йилини ўқувчилар шодон қарши олдилар.

Янги ўқув йили бошланишига бағишланди

Мамлакатимиздаўқувчи ёшларнинг билим олибгина қолмай, касб-ҳунарли ҳам бўлиши учун 12 йиллик узлуксиз таълим жорий этилган. Шу боисдан ҳам касб-ҳунар таълими масканларида янги ўқув йилининг бошланиши байрам сифатида нишонланади.

2 сентябрь куни "Манғит” иқтисодиёт касб-ҳунар коллежида янги ўқув йилининг бошланишига бағишланган тантана бўлиб ўтди.

Коллеж директори З.Отамуродов, инглиз тили ўқитувчиси туман Кенгаши депутати Г.Аҳмедовалар ўқувчиларни янги ўқиш йили бошланиши билан табрикладилар. Сўзга чиққан ўқувчилар тенгдошларини ўқув йилида аъло ўқиб, ўз соҳасини мукаммал эгаллаб, етук кадрлар бўлиб етишишга чақирди.

"Зулфияхоним қизлари”

Ҳар йили мактаб, лицей, коллеж, олий ўқув юртларида таълим олаётган аъло хулқи, олийжаноб фазилатлари, зукколиги, донолиги, ўқишдаги муваффақиятлари, ёрқин истеъдодини намойиш қилиб ва истиқлол ғояларини кенг тарғиб қилишда тенгдошларига намуна бўлаётган 14 ёшдан 22 ёшгача бўлган иқтидорли қизларга адабиёт, санъат, фан, таълим ва маданият соҳаларида эришган улкан ютуқлари учун Зулфия номидаги Давлат мукофотлари бериб борилаяпти.

Низомга мувофиқ номзодлар мактаб, коллеж, лицей, олий ўқув юртида танлаб олиниб, туман, вилоят, босқичларидан ўтиб, Республика босқичига йўлланмани кўлга киритадилар. Республика босқичи ғолибаси эса мазкур юксак мкофотга сазовор бўлади.

Яқин туман маданият ва спорт ишлари бўлимида бўлиб ўтган танловда туманимиздаги Зулфияхоним издошлари синовдан ўтдилар.

Бешта йўналиш бўйича қатнашган 22 нафар қизларнинг ҳакамлар ҳайъати қарорига биноан энг муносиблари саралаб олиниб, Қорақалпоғистон республикаси босқичига йўлланма берилди.

Лобарнинг орзулари

Лобар Жумабоева 3-сонли Амударё академик лицейида ўқийди. У фан асосларини чуқур ўрганиб қолмай, бадиий ижод билан ҳам шуғулланади. Унинг истеъдоди шу жиҳати билан қадрлики, у она Ватанимизнинг бетакрор табиати, бахтли болалик ва ўзаро меҳр-оқибат ҳақида ёзган шеърларига мос расмлар ҳам чизади.

У устози Бозорбой Холимбетовнинг сабоқларини пухта ўзлаштираётгани боис, чизган расмлари билан "Келажак овози” танловида қатнашиб, Қорақалпоғистон Республикаси босқичида учинчи ўринни эгаллади.