Дастлабки довондан ошдик
Бугунги кунда барчамиз пахтакормиз. Ҳар биримизнинг ўрнимиз пахта далаларида. Негаки, ёз бўйи қилинган меҳнатларимиз пахтазорларда мўл пахта ҳосили бўлиб далаларни тўлдириб турибди. Шу боис, асосий бойлигимиз бўлган оппоқ пахталарни йиғиб териб олишга бутун куч-ғайратимизни сарфламоқдамиз. Ҳар куни 140-150 теримчи йиғим-терим ишларида фаол қатнашиб терим суръатининг ошишига ўз ҳиссаларини қўшмоқдалар. Уларнинг унумли меҳнат қилишлари учун дала бошида барча қулай шарт-шароитларни яратиб берганмиз. Қайнатилган сув ҳамма вақт муҳайё. Тушликда иссиқ чой, иссиқ овқат билан албатта таъминланади. Теримчиларнинг терган пахтасига қараб меҳнат ҳақлари ўз вақтида мунтазам равишда бериб борилмоқда. Илғор теримчилар моддий ва маънавий жиҳатдан рағбатлантирилмоқда. Натижада меҳнат унумдорлиги ошиб, терим суръатига суръат қўшилмоқда. Мана шундай яратувчанлик омилларининг самараси қисқа муддат ичида фермер хўжалигимиз пахтакорлари дастлабки довондан ошиб йиллик шартномавий режаларини ошириб бажардилар ва 92 гектар пахта майдонидан 200 тоннадан зиёд аъло навли пахта ҳосилини давлат хазинасига топширдилар. Пахтани давлатга сотишдан олинган даромад 200 млн. сўмдан ошди.
Бугунги меҳнат ғалабамизда албатта илғор теримчиларнинг муносиб улушлари бор. Оқилжон Ҳайитбоева, Бахтигул Эрлапасова, Гулора Худойберганова, Гуландом Қўшимова, Акмал Оллаберганов ва Равшаной Туримбетоваларнинг ҳар бири мавсум бошидан буён 5-6 тоннадан пахта териб топшириб, бугунги юксак хирмонимизни бунёд этишда ўзларининг салмоқли ҳиссаларини қўшдилар.
Пахтазорларимизни оралаб, қолган ҳосил чўғини чамалаб кўрганимизда яна режага қўшимча 160-165 тонна пахта ҳосилини йиғиб-териб олиш имкониятимиз борлиги аён бўлди. Шунда ялпи хирмонимиз 360 тоннадан ошади ва 40 центнерлик юксак маррага эришамиз.
Эркин РАСУЛОВ,
"Амударё-Панашам” фермер хўжалиги раиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
